Utshovঅধ্যায় 111
111.1
নারদ উবাচ
ঋষভস্য ততঃ শৃঙ্গে নিপত্য দ্বিজপক্ষিণৌ
শাণ্ডিলীং ব্রাহ্মণীং তত্র দদৃশাতে তপোন্বিতাম্
111.2
অভিবাদ্য সুপর্ণস্তু গালবশ্চাভিপূজ্য তাম্
তয়া চ স্বাগতেনোক্তৌ বিষ্টরে সংনিষীদতুঃ
111.3
সিদ্ধমন্নং তয়া ক্ষিপ্রং বলিমন্ত্রোপবৃংহিতম্
ভুক্ত্বা তৃপ্তাবুভৌ ভূমৌ সুপ্তৌ তাবন্নমোহিতৌ
111.4
মুহূর্তাত্প্রতিবুদ্ধস্তু সুপর্ণো গমনেপ্সয়া
অথ ভ্রষ্টতনূজাঙ্গমাত্মানং দদৃশে খগঃ
111.5
মাংসপিণ্ডোপমোঽভূত্স মুখপাদান্বিতঃ খগঃ
গালবস্তং তথা দৃষ্ট্বা বিষণ্ণঃ পর্যপৃচ্ছত
111.6
কিমিদং ভবতা প্রাপ্তমিহাগমনজং ফলম্
বাসোঽয়মিহ কালং তু কিয়ন্তং নৌ ভবিষ্যতি
111.7
কিং নু তে মনসা ধ্যাতমশুভং ধর্মদূষণম্
ন হ্যয়ং ভবতঃ স্বল্পো ব্যভিচারো ভবিষ্যতি
111.8
সুপর্ণোঽথাব্রবীদ্বিপ্রং প্রধ্যাতং বৈ ময়া দ্বিজ
ইমাং সিদ্ধামিতো নেতুং তত্র যত্র প্রজাপতিঃ
111.9
যত্র দেবো মহাদেবো যত্র বিষ্ণুঃ সনাতনঃ
যত্র ধর্মশ্চ যজ্ঞশ্চ তত্রেয়ং নিবসেদিতি
111.10
সোঽহং ভগবতীং যাচে প্রণতঃ প্রিয়কাম্যয়া
ময়ৈতন্নাম প্রধ্যাতং মনসা শোচতা কিল
111.11
তদেবং বহুমানাত্তে ময়েহানীপ্সিতং কৃতম্
সুকৃতং দুষ্কৃতং বা ত্বং মাহাত্ম্যাত্ক্ষন্তুমর্হসি
111.12
সা তৌ তদাব্রবীত্তুষ্টা পতগেন্দ্রদ্বিজর্ষভৌ
ন ভেতব্যং সুপর্ণোঽসি সুপর্ণ ত্যজ সংভ্রমম্
111.13
নিন্দিতাস্মি ত্বয়া বত্স ন চ নিন্দাং ক্ষমাম্যহম্
লোকেভ্যঃ স পরিভ্রশ্যেদ্যো মাং নিন্দেত পাপকৃৎ
111.14
হীনয়ালক্ষণৈঃ সর্বৈস্তথানিন্দিতয়া ময়া
আচারং প্রতিগৃহ্ণন্ত্যা সিদ্ধিঃ প্রাপ্তেয়মুত্তমা
111.15
আচারাল্লভতে ধর্মমাচারাল্লভতে ধনম্
আচারাচ্ছ্রিয়মাপ্নোতি আচারো হন্ত্যলক্ষণম্
111.16
তদায়ুষ্মন্খগপতে যথেষ্টং গম্যতামিতঃ
ন চ তে গর্হণীয়াপি গর্হিতব্যাঃ স্ত্রিয়ঃ ক্বচিৎ
111.17
ভবিতাসি যথাপূর্বং বলবীর্যসমন্বিতঃ
বভূবতুস্ততস্তস্য পক্ষৌ দ্রবিণবত্তরৌ
111.18
অনুজ্ঞাতশ্চ শাণ্ডিল্যা যথাগতমুপাগমৎ
নৈব চাসাদয়ামাস তথারূপাংস্তুরংগমান্
111.19
বিশ্বামিত্রোঽথ তং দৃষ্ট্বা গালবং চাধ্বনি স্থিতম্
উবাচ বদতাং শ্রেষ্ঠো বৈনতেয়স্য সংনিধৌ
111.20
যস্ত্বয়া স্বয়মেবার্থঃ প্রতিজ্ঞাতো মম দ্বিজ
তস্য কালোঽপবর্গস্য যথা বা মন্যতে ভবান্
111.21
প্রতীক্ষিষ্যাম্যহং কালমেতাবন্তং তথা পরম্
যথা সংসিধ্যতে বিপ্র স মার্গস্তু নিশম্যতাম্
111.22
সুপর্ণোঽথাব্রবীদ্দীনং গালবং ভৃশদুঃখিতম্
প্রত্যক্ষং খল্বিদানীং মে বিশ্বামিত্রো যদুক্তবান্
111.23
তদাগচ্ছ দ্বিজশ্রেষ্ঠ মন্ত্রয়িষ্যাব গালব
নাদত্ত্বা গুরবে শক্যং কৃত্স্নমর্থং ত্বয়াসিতুম্