অধ্যায় 112

112.1

নারদ উবাচ
অথাহ গালবং দীনং সুপর্ণঃ পততাং বরঃ
নির্মিতং বহ্নিনা ভূমৌ বায়ুনা বৈধিতং তথা
যস্মাদ্ধিরণ্ময়ং সর্বং হিরণ্যং তেন চোচ্যতে

ধত্তে ধারয়তে চেদমেতস্মাত্কারণাদ্ধনম্
তদেতত্ত্রিষু লোকেষু ধনং তিষ্ঠতি শাশ্বতম্

নিত্যং প্রোষ্ঠপদাভ্যাং চ শুক্রে ধনপতৌ তথা
মনুষ্যেভ্যঃ সমাদত্তে শুক্রশ্চিত্তার্জিতং ধনম্

অজৈকপাদহির্বুধ্ন্যৈ রক্ষ্যতে ধনদেন চ
এবং ন শক্যতে লব্ধুমলব্ধব্যং দ্বিজর্ষভ

ঋতে চ ধনমশ্বানাং নাবাপ্তির্বিদ্যতে তব
অর্থং যাচাত্র রাজানং কংচিদ্রাজর্ষিবংশজম্
অপীড্য রাজা পৌরান্হি যো নৌ কুর্যাত্কৃতার্থিনৌ

অস্তি সোমান্ববায়ে মে জাতঃ কশ্চিন্নৃপঃ সখা
অভিগচ্ছাবহে তং বৈ তস্যাস্তি বিভবো ভুবি

যয়াতির্নাম রাজর্ষির্নাহুষঃ সত্যবিক্রমঃ
স দাস্যতি ময়া চোক্তো ভবতা চার্থিতঃ স্বয়ম্

বিভবশ্চাস্য সুমহানাসীদ্ধনপতেরিব
এবং স তু ধনং বিদ্বান্দানেনৈব ব্যশোধয়ৎ

তথা তৌ কথয়ন্তৌ চ চিন্তয়ন্তৌ চ যত্ক্ষমম্
প্রতিষ্ঠানে নরপতিং যয়াতিং প্রত্যুপস্থিতৌ

প্রতিগৃহ্য চ সত্কারমর্ঘাদিং ভোজনং বরম্
পৃষ্টশ্চাগমনে হেতুমুবাচ বিনতাসুতঃ

অয়ং মে নাহুষ সখা গালবস্তপসো নিধিঃ
বিশ্বামিত্রস্য শিষ্যোঽভূদ্বর্ষাণ্যয়ুতশো নৃপ

সোঽয়ং তেনাভ্যনুজ্ঞাত উপকারেপ্সয়া দ্বিজঃ
তমাহ ভগবান্কাং তে দদানি গুরুদক্ষিণাম্

অসকৃত্তেন চোক্তেন কিংচিদাগতমন্যুনা
অয়মুক্তঃ প্রয়চ্ছেতি জানতা বিভবং লঘু

একতঃশ্যামকর্ণানাং শুভ্রাণাং শুদ্ধজন্মনাম্
অষ্টৌ শতানি মে দেহি হয়ানাং চন্দ্রবর্চসাম্

গুর্বর্থো দীয়তামেষ যদি গালব মন্যসে
ইত্যেবমাহ সক্রোধো বিশ্বামিত্রস্তপোধনঃ

সোঽয়ং শোকেন মহতা তপ্যমানো দ্বিজর্ষভঃ
অশক্তঃ প্রতিকর্তুং তদ্ভবন্তং শরণং গতঃ

প্রতিগৃহ্য নরব্যাঘ্র ত্বত্তো ভিক্ষাং গতব্যথঃ
কৃত্বাপবর্গং গুরবে চরিষ্যতি মহত্তপঃ

তপসঃ সংবিভাগেন ভবন্তমপি যোক্ষ্যতে
স্বেন রাজর্ষিতপসা পূর্ণং ত্বাং পূরয়িষ্যতি

যাবন্তি রোমাণি হয়ে ভবন্তি হি নরেশ্বর
তাবতো বাজিদা লোকান্প্রাপ্নুবন্তি মহীপতে

পাত্রং প্রতিগ্রহস্যায়ং দাতুং পাত্রং তথা ভবান্
শঙ্খে ক্ষীরমিবাসক্তং ভবত্বেতত্তথোপমম্