অধ্যায় 113

113.1

নারদ উবাচ
এবমুক্তঃ সুপর্ণেন তথ্যং বচনমুত্তমম্
বিমৃশ্যাবহিতো রাজা নিশ্চিত্য চ পুনঃ পুনঃ

যষ্টা ক্রতুসহস্রাণাং দাতা দানপতিঃ প্রভুঃ
যয়াতির্বত্সকাশীশ ইদং বচনমব্রবীৎ

দৃষ্ট্বা প্রিয়সখং তার্ক্ষ্যং গালবং চ দ্বিজর্ষভম্
নিদর্শনং চ তপসো ভিক্ষাং শ্লাঘ্যাং চ কীর্তিতাম্

অতীত্য চ নৃপানন্যানাদিত্যকুলসংভবান্
মত্সকাশমনুপ্রাপ্তাবেতৌ বুদ্ধিমবেক্ষ্য চ

অদ্য মে সফলং জন্ম তারিতং চাদ্য মে কুলম্
অদ্যায়ং তারিতো দেশো মম তার্ক্ষ্য ত্বয়ানঘ

বক্তুমিচ্ছামি তু সখে যথা জানাসি মাং পুরা
ন তথা বিত্তবানস্মি ক্ষীণং বিত্তং হি মে সখে

ন চ শক্তোঽস্মি তে কর্তুং মোঘমাগমনং খগ
ন চাশামস্য বিপ্রর্ষের্বিতথাং কর্তুমুত্সহে

তত্তু দাস্যামি যত্কার্যমিদং সংপাদয়িষ্যতি
অভিগম্য হতাশো হি নিবৃত্তো দহতে কুলম্

নাতঃ পরং বৈনতেয় কিংচিত্পাপিষ্ঠমুচ্যতে
যথাশানাশনং লোকে দেহি নাস্তীতি বা বচঃ

হতাশো হ্যকৃতার্থঃ সন্হতঃ সংভাবিতো নরঃ
হিনস্তি তস্য পুত্রাংশ্চ পৌত্রাংশ্চাকুর্বতোঽর্থিনাম্

তস্মাচ্চতুর্ণাং বংশানাং স্থাপয়িত্রী সুতা মম
ইয়ং সুরসুতপ্রখ্যা সর্বধর্মোপচায়িনী

সদা দেবমনুষ্যাণামসুরাণাং চ গালব
কাঙ্ক্ষিতা রূপতো বালা সুতা মে প্রতিগৃহ্যতাম্

অস্যাঃ শুল্কং প্রদাস্যন্তি নৃপা রাজ্যমপি ধ্রুবম্
কিং পুনঃ শ্যামকর্ণানাং হয়ানাং দ্বে চতুঃশতে

স ভবান্প্রতিগৃহ্ণাতু মমেমাং মাধবীং সুতাম্
অহং দৌহিত্রবান্স্যাং বৈ বর এষ মম প্রভো

প্রতিগৃহ্য চ তাং কন্যাং গালবঃ সহ পক্ষিণা
পুনর্দ্রক্ষ্যাব ইত্যুক্ত্বা প্রতস্থে সহ কন্যয়া

উপলব্ধমিদং দ্বারমশ্বানামিতি চাণ্ডজঃ
উক্ত্বা গালবমাপৃচ্ছ্য জগাম ভবনং স্বকম্

গতে পতগরাজে তু গালবঃ সহ কন্যয়া
চিন্তয়ানঃ ক্ষমং দানে রাজ্ঞাং বৈ শুল্কতোঽগমৎ

সোঽগচ্ছন্মনসেক্ষ্বাকুং হর্যশ্বং রাজসত্তমম্
অয়োধ্যায়াং মহাবীর্যং চতুরঙ্গবলান্বিতম্

কোশধান্যবলোপেতং প্রিয়পৌরং দ্বিজপ্রিয়ম্
প্রজাভিকামং শাম্যন্তং কুর্বাণং তপ উত্তমম্

তমুপাগম্য বিপ্রঃ স হর্যশ্বং গালবোঽব্রবীৎ
কন্যেয়ং মম রাজেন্দ্র প্রসবৈঃ কুলবর্ধিনী

ইয়ং শুল্কেন ভার্যার্থে হর্যশ্ব প্রতিগৃহ্যতাম্
শুল্কং তে কীর্তয়িষ্যামি তচ্ছ্রুত্বা সংপ্রধার্যতাম্