UtshovChapter 113
113.1
नारद उवाच
एवमुक्तः सुपर्णेन तथ्यं वचनमुत्तमम्
विमृश्यावहितो राजा निश्चित्य च पुनः पुनः
Narada uvacha
Evamuktah suparnena tathyam vachanamuttamam
Vimrishyavahito raja nishchitya cha punah punah
113.2
यष्टा क्रतुसहस्राणां दाता दानपतिः प्रभुः
ययातिर्वत्सकाशीश इदं वचनमब्रवीत्
Yashta kratusahasranam data danapatih prabhuh
Yayatirvatsakashisha idam vachanamabravit
113.3
दृष्ट्वा प्रियसखं तार्क्ष्यं गालवं च द्विजर्षभम्
निदर्शनं च तपसो भिक्षां श्लाघ्यां च कीर्तिताम्
Drishtva priyasakham tarkshyam galavam cha dvijarshabham
Nidarshanam cha tapaso bhiksham shlaghyam cha kirtitam
113.4
अतीत्य च नृपानन्यानादित्यकुलसंभवान्
मत्सकाशमनुप्राप्तावेतौ बुद्धिमवेक्ष्य च
Atitya cha nripananyanadityakulasambhavan
Matsakashamanupraptavetau buddhimavekshya cha
113.5
अद्य मे सफलं जन्म तारितं चाद्य मे कुलम्
अद्यायं तारितो देशो मम तार्क्ष्य त्वयानघ
Adya me saphalam janma taritam chadya me kulam
Adyayam tarito desho mama tarkshya tvayanagha
113.6
वक्तुमिच्छामि तु सखे यथा जानासि मां पुरा
न तथा वित्तवानस्मि क्षीणं वित्तं हि मे सखे
Vaktumichchhami tu sakhe yatha janasi mam pura
Na tatha vittavanasmi kshinam vittam hi me sakhe
113.7
न च शक्तोऽस्मि ते कर्तुं मोघमागमनं खग
न चाशामस्य विप्रर्षेर्वितथां कर्तुमुत्सहे
Na cha shaktosmi te kartum moghamagamanam khaga
Na chashamasya viprarshervitatham kartumutsahe
113.8
तत्तु दास्यामि यत्कार्यमिदं संपादयिष्यति
अभिगम्य हताशो हि निवृत्तो दहते कुलम्
Tattu dasyami yatkaryamidam sampadayishyati
Abhigamya hatasho hi nivritto dahate kulam
113.9
नातः परं वैनतेय किंचित्पापिष्ठमुच्यते
यथाशानाशनं लोके देहि नास्तीति वा वचः
Natah param vainateya kinchitpapishthamuchyate
Yathashanashanam loke dehi nastiti va vachah
113.10
हताशो ह्यकृतार्थः सन्हतः संभावितो नरः
हिनस्ति तस्य पुत्रांश्च पौत्रांश्चाकुर्वतोऽर्थिनाम्
Hatasho hyakritarthah sanhatah sambhavito narah
Hinasti tasya putranshcha pautranshchakurvatorthinam
113.11
तस्माच्चतुर्णां वंशानां स्थापयित्री सुता मम
इयं सुरसुतप्रख्या सर्वधर्मोपचायिनी
Tasmachchaturnam vanshanam sthapayitri suta mama
Iyam surasutaprakhya sarvadharmopachayini
113.12
सदा देवमनुष्याणामसुराणां च गालव
काङ्क्षिता रूपतो बाला सुता मे प्रतिगृह्यताम्
Sada devamanushyanamasuranam cha galava
Kankshita rupato bala suta me pratigrihyatam
113.13
अस्याः शुल्कं प्रदास्यन्ति नृपा राज्यमपि ध्रुवम्
किं पुनः श्यामकर्णानां हयानां द्वे चतुःशते
Asyah shulkam pradasyanti nripa rajyamapi dhruvam
Kim punah shyamakarnanam hayanam dve chatuhshate
113.14
स भवान्प्रतिगृह्णातु ममेमां माधवीं सुताम्
अहं दौहित्रवान्स्यां वै वर एष मम प्रभो
Sa bhavanpratigrihnatu mamemam madhavim sutam
Aham dauhitravansyam vai vara esha mama prabho
113.15
प्रतिगृह्य च तां कन्यां गालवः सह पक्षिणा
पुनर्द्रक्ष्याव इत्युक्त्वा प्रतस्थे सह कन्यया
Pratigrihya cha tam kanyam galavah saha pakshina
Punardrakshyava ityuktva pratasthe saha kanyaya
113.16
उपलब्धमिदं द्वारमश्वानामिति चाण्डजः
उक्त्वा गालवमापृच्छ्य जगाम भवनं स्वकम्
Upalabdhamidam dvaramashvanamiti chandajah
Uktva galavamaprichchhya jagama bhavanam svakam
113.17
गते पतगराजे तु गालवः सह कन्यया
चिन्तयानः क्षमं दाने राज्ञां वै शुल्कतोऽगमत्
Gate patagaraje tu galavah saha kanyaya
Chintayanah kshamam dane ragyam vai shulkatogamat
113.18
सोऽगच्छन्मनसेक्ष्वाकुं हर्यश्वं राजसत्तमम्
अयोध्यायां महावीर्यं चतुरङ्गबलान्वितम्
Sogachchhanmanasekshvakum haryashvam rajasattamam
Ayodhyayam mahaviryam chaturangabalanvitam
113.19
कोशधान्यबलोपेतं प्रियपौरं द्विजप्रियम्
प्रजाभिकामं शाम्यन्तं कुर्वाणं तप उत्तमम्
Koshadhanyabalopetam priyapauram dvijapriyam
Prajabhikamam shamyantam kurvanam tapa uttamam
113.20
तमुपागम्य विप्रः स हर्यश्वं गालवोऽब्रवीत्
कन्येयं मम राजेन्द्र प्रसवैः कुलवर्धिनी
Tamupagamya viprah sa haryashvam galavobravit
Kanyeyam mama rajendra prasavaih kulavardhini
113.21
इयं शुल्केन भार्यार्थे हर्यश्व प्रतिगृह्यताम्
शुल्कं ते कीर्तयिष्यामि तच्छ्रुत्वा संप्रधार्यताम्
Iyam shulkena bharyarthe haryashva pratigrihyatam
Shulkam te kirtayishyami tachchhrutva sampradharyatam