UtshovChapter 114
114.1
नारद उवाच
हर्यश्वस्त्वब्रवीद्राजा विचिन्त्य बहुधा ततः
दीर्घमुष्णं च निःश्वस्य प्रजाहेतोर्नृपोत्तमः
Narada uvacha
Haryashvastvabravidraja vichintya bahudha tatah
Dirghamushnam cha nihshvasya prajahetornripottamah
114.2
उन्नतेषून्नता षट्सु सूक्ष्मा सूक्ष्मेषु सप्तसु
गम्भीरा त्रिषु गम्भीरेष्वियं रक्ता च पञ्चसु
Unnateshunnata shatsu sukshma sukshmeshu saptasu
Gambhira trishu gambhireshviyam rakta cha panchasu
114.3
बहुदेवासुरालोका बहुगन्धर्वदर्शना
बहुलक्षणसंपन्ना बहुप्रसवधारिणी
Bahudevasuraloka bahugandharvadarshana
Bahulakshanasampanna bahuprasavadharini
114.4
समर्थेयं जनयितुं चक्रवर्तिनमात्मजम्
ब्रूहि शुल्कं द्विजश्रेष्ठ समीक्ष्य विभवं मम
Samartheyam janayitum chakravartinamatmajam
Bruhi shulkam dvijashreshtha samikshya vibhavam mama
114.5
गालव उवाच
एकतःश्यामकर्णानां शतान्यष्टौ ददस्व मे
हयानां चन्द्रशुभ्राणां देशजानां वपुष्मताम्
Galava uvacha
Ekatahshyamakarnanam shatanyashtau dadasva me
Hayanam chandrashubhranam deshajanam vapushmatam
114.6
ततस्तव भवित्रीयं पुत्राणां जननी शुभा
अरणीव हुताशानां योनिरायतलोचना
Tatastava bhavitriyam putranam janani shubha
Araniva hutashanam yonirayatalochana
114.7
नारद उवाच
एतच्छ्रुत्वा वचो राजा हर्यश्वः काममोहितः
उवाच गालवं दीनो राजर्षिरृषिसत्तमम्
Narada uvacha
Etachchhrutva vacho raja haryashvah kamamohitah
Uvacha galavam dino rajarshirrishisattamam
114.8
द्वे मे शते संनिहिते हयानां यद्विधास्तव
एष्टव्याः शतशस्त्वन्ये चरन्ति मम वाजिनः
Dve me shate sannihite hayanam yadvidhastava
Eshtavyah shatashastvanye charanti mama vajinah
114.9
सोऽहमेकमपत्यं वै जनयिष्यामि गालव
अस्यामेतं भवान्कामं संपादयतु मे वरम्
Sohamekamapatyam vai janayishyami galava
Asyametam bhavankamam sampadayatu me varam
114.10
एतच्छ्रुत्वा तु सा कन्या गालवं वाक्यमब्रवीत्
मम दत्तो वरः कश्चित्केनचिद्ब्रह्मवादिना
Etachchhrutva tu sa kanya galavam vakyamabravit
Mama datto varah kashchitkenachidbrahmavadina
114.11
प्रसूत्यन्ते प्रसूत्यन्ते कन्यैव त्वं भविष्यसि
स त्वं ददस्व मां राज्ञे प्रतिगृह्य हयोत्तमान्
Prasutyante prasutyante kanyaiva tvam bhavishyasi
Sa tvam dadasva mam ragye pratigrihya hayottaman
114.12
नृपेभ्यो हि चतुर्भ्यस्ते पूर्णान्यष्टौ शतानि वै
भविष्यन्ति तथा पुत्रा मम चत्वार एव च
Nripebhyo hi chaturbhyaste purnanyashtau shatani vai
Bhavishyanti tatha putra mama chatvara eva cha
114.13
क्रियतां मम संहारो गुर्वर्थं द्विजसत्तम
एषा तावन्मम प्रज्ञा यथा वा मन्यसे द्विज
Kriyatam mama sanharo gurvartham dvijasattama
Esha tavanmama pragya yatha va manyase dvija
114.14
एवमुक्तस्तु स मुनिः कन्यया गालवस्तदा
हर्यश्वं पृथिवीपालमिदं वचनमब्रवीत्
Evamuktastu sa munih kanyaya galavastada
Haryashvam prithivipalamidam vachanamabravit
114.15
इयं कन्या नरश्रेष्ठ हर्यश्व प्रतिगृह्यताम्
चतुर्भागेन शुल्कस्य जनयस्वैकमात्मजम्
Iyam kanya narashreshtha haryashva pratigrihyatam
Chaturbhagena shulkasya janayasvaikamatmajam
114.16
प्रतिगृह्य स तां कन्यां गालवं प्रतिनन्द्य च
समये देशकाले च लब्धवान्सुतमीप्सितम्
Pratigrihya sa tam kanyam galavam pratinandya cha
Samaye deshakale cha labdhavansutamipsitam
114.17
ततो वसुमना नाम वसुभ्यो वसुमत्तरः
वसुप्रख्यो नरपतिः स बभूव वसुप्रदः
Tato vasumana nama vasubhyo vasumattarah
Vasuprakhyo narapatih sa babhuva vasupradah
114.18
अथ काले पुनर्धीमान्गालवः प्रत्युपस्थितः
उपसंगम्य चोवाच हर्यश्वं प्रीतिमानसम्
Atha kale punardhimangalavah pratyupasthitah
Upasangamya chovacha haryashvam pritimanasam
114.19
जातो नृप सुतस्तेऽयं बालभास्करसंनिभः
कालो गन्तुं नरश्रेष्ठ भिक्षार्थमपरं नृपम्
Jato nripa sutasteyam balabhaskarasannibhah
Kalo gantum narashreshtha bhiksharthamaparam nripam
114.20
हर्यश्वः सत्यवचने स्थितः स्थित्वा च पौरुषे
दुर्लभत्वाद्धयानां च प्रददौ माधवीं पुनः
Haryashvah satyavachane sthitah sthitva cha paurushe
Durlabhatvaddhayanam cha pradadau madhavim punah
114.21
माधवी च पुनर्दीप्तां परित्यज्य नृपश्रियम्
कुमारी कामतो भूत्वा गालवं पृष्ठतोऽन्वगात्
Madhavi cha punardiptam parityajya nripashriyam
Kumari kamato bhutva galavam prishthatonvagat
114.22
त्वय्येव तावत्तिष्ठन्तु हया इत्युक्तवान्द्विजः
प्रययौ कन्यया सार्धं दिवोदासं प्रजेश्वरम्
Tvayyeva tavattishthantu haya ityuktavandvijah
Prayayau kanyaya sardham divodasam prajeshvaram