UtshovChapter 115
115.1
गालव उवाच
महावीर्यो महीपालः काशीनामीश्वरः प्रभुः
दिवोदास इति ख्यातो भैमसेनिर्नराधिपः
Galava uvacha
Mahaviryo mahipalah kashinamishvarah prabhuh
Divodasa iti khyato bhaimasenirnaradhipah
115.2
तत्र गच्छावहे भद्रे शनैरागच्छ मा शुचः
धार्मिकः संयमे युक्तः सत्यश्चैव जनेश्वरः
Tatra gachchhavahe bhadre shanairagachchha ma shuchah
Dharmikah sanyame yuktah satyashchaiva janeshvarah
115.3
नारद उवाच
तमुपागम्य स मुनिर्न्यायतस्तेन सत्कृतः
गालवः प्रसवस्यार्थे तं नृपं प्रत्यचोदयत्
Narada uvacha
Tamupagamya sa munirnyayatastena satkritah
Galavah prasavasyarthe tam nripam pratyachodayat
115.4
दिवोदास उवाच
श्रुतमेतन्मया पूर्वं किमुक्त्वा विस्तरं द्विज
काङ्क्षितो हि मयैषोऽर्थः श्रुत्वैतद्द्विजसत्तम
Divodasa uvacha
Shrutametanmaya purvam kimuktva vistaram dvija
Kankshito hi mayaishorthah shrutvaitaddvijasattama
115.5
एतच्च मे बहुमतं यदुत्सृज्य नराधिपान्
मामेवमुपयातोऽसि भावि चैतदसंशयम्
Etachcha me bahumatam yadutsrijya naradhipan
Mamevamupayatosi bhavi chaitadasanshayam
115.6
स एव विभवोऽस्माकमश्वानामपि गालव
अहमप्येकमेवास्यां जनयिष्यामि पार्थिवम्
Sa eva vibhavosmakamashvanamapi galava
Ahamapyekamevasyam janayishyami parthivam
115.7
नारद उवाच
तथेत्युक्त्वा द्विजश्रेष्ठः प्रादात्कन्यां महीपतेः
विधिपूर्वं च तां राजा कन्यां प्रतिगृहीतवान्
Narada uvacha
Tathetyuktva dvijashreshthah pradatkanyam mahipateh
Vidhipurvam cha tam raja kanyam pratigrihitavan
115.8
रेमे स तस्यां राजर्षिः प्रभावत्यां यथा रविः
स्वाहायां च यथा वह्निर्यथा शच्यां स वासवः
Reme sa tasyam rajarshih prabhavatyam yatha ravih
Svahayam cha yatha vahniryatha shachyam sa vasavah
115.9
यथा चन्द्रश्च रोहिण्यां यथा धूमोर्णया यमः
वरुणश्च यथा गौर्यां यथा चर्द्ध्यां धनेश्वरः
Yatha chandrashcha rohinyam yatha dhumornaya yamah
Varunashcha yatha gauryam yatha charddhyam dhaneshvarah
115.10
यथा नारायणो लक्ष्म्यां जाह्नव्यां च यथोदधिः
यथा रुद्रश्च रुद्राण्यां यथा वेद्यां पितामहः
Yatha narayano lakshmyam jahnavyam cha yathodadhih
Yatha rudrashcha rudranyam yatha vedyam pitamahah
115.11
अदृश्यन्त्यां च वासिष्ठो वसिष्ठश्चाक्षमालया
च्यवनश्च सुकन्यायां पुलस्त्यः संध्यया यथा
Adrishyantyam cha vasishtho vasishthashchakshamalaya
Chyavanashcha sukanyayam pulastyah sandhyaya yatha
115.12
अगस्त्यश्चापि वैदर्भ्यां सावित्र्यां सत्यवान्यथा
यथा भृगुः पुलोमायामदित्यां कश्यपो यथा
Agastyashchapi vaidarbhyam savitryam satyavanyatha
Yatha bhriguh pulomayamadityam kashyapo yatha
115.13
रेणुकायां यथार्चीको हैमवत्यां च कौशिकः
बृहस्पतिश्च तारायां शुक्रश्च शतपर्वया
Renukayam yatharchiko haimavatyam cha kaushikah
Brihaspatishcha tarayam shukrashcha shataparvaya
115.14
यथा भूम्यां भूमिपतिरुर्वश्यां च पुरूरवाः
ऋचीकः सत्यवत्यां च सरस्वत्यां यथा मनुः
Yatha bhumyam bhumipatirurvashyam cha pururavah
Richikah satyavatyam cha sarasvatyam yatha manuh
115.15
तथा तु रममाणस्य दिवोदासस्य भूपतेः
माधवी जनयामास पुत्रमेकं प्रतर्दनम्
Tatha tu ramamanasya divodasasya bhupateh
Madhavi janayamasa putramekam pratardanam
115.16
अथाजगाम भगवान्दिवोदासं स गालवः
समये समनुप्राप्ते वचनं चेदमब्रवीत्
Athajagama bhagavandivodasam sa galavah
Samaye samanuprapte vachanam chedamabravit
115.17
निर्यातयतु मे कन्यां भवांस्तिष्ठन्तु वाजिनः
यावदन्यत्र गच्छामि शुल्कार्थं पृथिवीपते
Niryatayatu me kanyam bhavanstishthantu vajinah
Yavadanyatra gachchhami shulkartham prithivipate
115.18
दिवोदासोऽथ धर्मात्मा समये गालवस्य ताम्
कन्यां निर्यातयामास स्थितः सत्ये महीपतिः
Divodasotha dharmatma samaye galavasya tam
Kanyam niryatayamasa sthitah satye mahipatih