অধ্যায় 115

115.1

গালব উবাচ
মহাবীর্যো মহীপালঃ কাশীনামীশ্বরঃ প্রভুঃ
দিবোদাস ইতি খ্যাতো ভৈমসেনির্নরাধিপঃ

তত্র গচ্ছাবহে ভদ্রে শনৈরাগচ্ছ মা শুচঃ
ধার্মিকঃ সংয়মে যুক্তঃ সত্যশ্চৈব জনেশ্বরঃ

নারদ উবাচ
তমুপাগম্য স মুনির্ন্যায়তস্তেন সত্কৃতঃ
গালবঃ প্রসবস্যার্থে তং নৃপং প্রত্যচোদয়ৎ

দিবোদাস উবাচ
শ্রুতমেতন্ময়া পূর্বং কিমুক্ত্বা বিস্তরং দ্বিজ
কাঙ্ক্ষিতো হি ময়ৈষোঽর্থঃ শ্রুত্বৈতদ্দ্বিজসত্তম

এতচ্চ মে বহুমতং যদুত্সৃজ্য নরাধিপান্
মামেবমুপয়াতোঽসি ভাবি চৈতদসংশয়ম্

স এব বিভবোঽস্মাকমশ্বানামপি গালব
অহমপ্যেকমেবাস্যাং জনয়িষ্যামি পার্থিবম্

নারদ উবাচ
তথেত্যুক্ত্বা দ্বিজশ্রেষ্ঠঃ প্রাদাত্কন্যাং মহীপতেঃ
বিধিপূর্বং চ তাং রাজা কন্যাং প্রতিগৃহীতবান্

রেমে স তস্যাং রাজর্ষিঃ প্রভাবত্যাং যথা রবিঃ
স্বাহায়াং চ যথা বহ্নির্যথা শচ্যাং স বাসবঃ

যথা চন্দ্রশ্চ রোহিণ্যাং যথা ধূমোর্ণয়া যমঃ
বরুণশ্চ যথা গৌর্যাং যথা চর্দ্ধ্যাং ধনেশ্বরঃ

যথা নারায়ণো লক্ষ্ম্যাং জাহ্নব্যাং চ যথোদধিঃ
যথা রুদ্রশ্চ রুদ্রাণ্যাং যথা বেদ্যাং পিতামহঃ

অদৃশ্যন্ত্যাং চ বাসিষ্ঠো বসিষ্ঠশ্চাক্ষমালয়া
চ্যবনশ্চ সুকন্যায়াং পুলস্ত্যঃ সংধ্যয়া যথা

অগস্ত্যশ্চাপি বৈদর্ভ্যাং সাবিত্র্যাং সত্যবান্যথা
যথা ভৃগুঃ পুলোমায়ামদিত্যাং কশ্যপো যথা

রেণুকায়াং যথার্চীকো হৈমবত্যাং চ কৌশিকঃ
বৃহস্পতিশ্চ তারায়াং শুক্রশ্চ শতপর্বয়া

যথা ভূম্যাং ভূমিপতিরুর্বশ্যাং চ পুরূরবাঃ
ঋচীকঃ সত্যবত্যাং চ সরস্বত্যাং যথা মনুঃ

তথা তু রমমাণস্য দিবোদাসস্য ভূপতেঃ
মাধবী জনয়ামাস পুত্রমেকং প্রতর্দনম্

অথাজগাম ভগবান্দিবোদাসং স গালবঃ
সময়ে সমনুপ্রাপ্তে বচনং চেদমব্রবীৎ

নির্যাতয়তু মে কন্যাং ভবাংস্তিষ্ঠন্তু বাজিনঃ
যাবদন্যত্র গচ্ছামি শুল্কার্থং পৃথিবীপতে

দিবোদাসোঽথ ধর্মাত্মা সময়ে গালবস্য তাম্
কন্যাং নির্যাতয়ামাস স্থিতঃ সত্যে মহীপতিঃ