অধ্যায় 116

116.1

নারদ উবাচ
তথৈব সা শ্রিয়ং ত্যক্ত্বা কন্যা ভূত্বা যশস্বিনী
মাধবী গালবং বিপ্রমন্বয়াত্সত্যসংগরা

গালবো বিমৃশন্নেব স্বকার্যগতমানসঃ
জগাম ভোজনগরং দ্রষ্টুমৌশীনরং নৃপম্

তমুবাচাথ গত্বা স নৃপতিং সত্যবিক্রমম্
ইয়ং কন্যা সুতৌ দ্বৌ তে জনয়িষ্যতি পার্থিবৌ

অস্যাং ভবানবাপ্তার্থো ভবিতা প্রেত্য চেহ চ
সোমার্কপ্রতিসংকাশৌ জনয়িত্বা সুতৌ নৃপ

শুল্কং তু সর্বধর্মজ্ঞ হয়ানাং চন্দ্রবর্চসাম্
একতঃশ্যামকর্ণানাং দেয়ং মহ্যং চতুঃশতম্

গুর্বর্থোঽয়ং সমারম্ভো ন হয়ৈঃ কৃত্যমস্তি মে
যদি শক্যং মহারাজ ক্রিয়তাং মা বিচার্যতাম্

অনপত্যোঽসি রাজর্ষে পুত্রৌ জনয় পার্থিব
পিতৄন্পুত্রপ্লবেন ত্বমাত্মানং চৈব তারয়

ন পুত্রফলভোক্তা হি রাজর্ষে পাত্যতে দিবঃ
ন যাতি নরকং ঘোরং যত্র গচ্ছন্ত্যনাত্মজাঃ

এতচ্চান্যচ্চ বিবিধং শ্রুত্বা গালবভাষিতম্
উশীনরঃ প্রতিবচো দদৌ তস্য নরাধিপঃ

শ্রুতবানস্মি তে বাক্যং যথা বদসি গালব
বিধিস্তু বলবান্ব্রহ্মন্প্রবণং হি মনো মম

শতে দ্বে তু মমাশ্বানামীদৃশানাং দ্বিজোত্তম
ইতরেষাং সহস্রাণি সুবহূনি চরন্তি মে

অহমপ্যেকমেবাস্যাং জনয়িষ্যামি গালব
পুত্রং দ্বিজ গতং মার্গং গমিষ্যামি পরৈরহম্

মূল্যেনাপি সমং কুর্যাং তবাহং দ্বিজসত্তম
পৌরজানপদার্থং তু মমার্থো নাত্মভোগতঃ

কামতো হি ধনং রাজা পারক্যং যঃ প্রয়চ্ছতি
ন স ধর্মেণ ধর্মাত্মন্যুজ্যতে যশসা ন চ

সোঽহং প্রতিগ্রহীষ্যামি দদাত্বেতাং ভবান্মম
কুমারীং দেবগর্ভাভামেকপুত্রভবায় মে

তথা তু বহুকল্যাণমুক্তবন্তং নরাধিপম্
উশীনরং দ্বিজশ্রেষ্ঠো গালবঃ প্রত্যপূজয়ৎ

উশীনরং প্রতিগ্রাহ্য গালবঃ প্রয়য়ৌ বনম্
রেমে স তাং সমাসাদ্য কৃতপুণ্য ইব শ্রিয়ম্

কন্দরেষু চ শৈলানাং নদীনাং নির্ঝরেষু চ
উদ্যানেষু বিচিত্রেষু বনেষূপবনেষু চ

হর্ম্যেষু রমণীয়েষু প্রাসাদশিখরেষু চ
বাতায়নবিমানেষু তথা গর্ভগৃহেষু চ

ততোঽস্য সময়ে জজ্ঞে পুত্রো বালরবিপ্রভঃ
শিবির্নাম্নাভিবিখ্যাতো যঃ স পার্থিবসত্তমঃ

উপস্থায় স তং বিপ্রো গালবঃ প্রতিগৃহ্য চ
কন্যাং প্রয়াতস্তাং রাজন্দৃষ্টবান্বিনতাত্মজম্