অধ্যায় 117

117.1

নারদ উবাচ
গালবং বৈনতেয়োঽথ প্রহসন্নিদমব্রবীৎ
দিষ্ট্যা কৃতার্থং পশ্যামি ভবন্তমিহ বৈ দ্বিজ

গালবস্তু বচঃ শ্রুত্বা বৈনতেয়েন ভাষিতম্
চতুর্ভাগাবশিষ্টং তদাচখ্যৌ কার্যমস্য হি

সুপর্ণস্ত্বব্রবীদেনং গালবং পততাং বরঃ
প্রয়ত্নস্তে ন কর্তব্যো নৈষ সংপত্স্যতে তব

পুরা হি কন্যকুব্জে বৈ গাধেঃ সত্যবতীং সুতাম্
ভার্যার্থেঽবরয়ত্কন্যামৃচীকস্তেন ভাষিতঃ

একতঃশ্যামকর্ণানাং হয়ানাং চন্দ্রবর্চসাম্
ভগবন্দীয়তাং মহ্যং সহস্রমিতি গালব

ঋচীকস্তু তথেত্যুক্ত্বা বরুণস্যালয়ং গতঃ
অশ্বতীর্থে হয়াঁল্লব্ধ্বা দত্তবান্পার্থিবায় বৈ

ইষ্ট্বা তে পুণ্ডরীকেণ দত্তা রাজ্ঞা দ্বিজাতিষু
তেভ্যো দ্বে দ্বে শতে ক্রীত্বা প্রাপ্তাস্তে পার্থিবৈস্তদা

অপরাণ্যপি চত্বারি শতানি দ্বিজসত্তম
নীয়মানানি সংতারে হৃতান্যাসন্বিতস্তয়া
এবং ন শক্যমপ্রাপ্যং প্রাপ্তুং গালব কর্হিচিৎ

ইমামশ্বশতাভ্যাং বৈ দ্বাভ্যাং তস্মৈ নিবেদয়
বিশ্বামিত্রায় ধর্মাত্মন্ষড্ভিরশ্বশতৈঃ সহ
ততোঽসি গতসংমোহঃ কৃতকৃত্যো দ্বিজর্ষভ

গালবস্তং তথেত্যুক্ত্বা সুপর্ণসহিতস্ততঃ
আদায়াশ্বাংশ্চ কন্যাং চ বিশ্বামিত্রমুপাগমৎ

গালব উবাচ
অশ্বানাং কাঙ্ক্ষিতার্থানাং ষডিমানি শতানি বৈ
শতদ্বয়েন কন্যেয়ং ভবতা প্রতিগৃহ্যতাম্

অস্যাং রাজর্ষিভিঃ পুত্রা জাতা বৈ ধার্মিকাস্ত্রয়ঃ
চতুর্থং জনয়ত্বেকং ভবানপি নরোত্তম

পূর্ণান্যেবং শতান্যষ্টৌ তুরগাণাং ভবন্তু তে
ভবতো হ্যনৃণো ভূত্বা তপঃ কুর্যাং যথাসুখম্

নারদ উবাচ
বিশ্বামিত্রস্তু তং দৃষ্ট্বা গালবং সহ পক্ষিণা
কন্যাং চ তাং বরারোহামিদমিত্যব্রবীদ্বচঃ

কিমিয়ং পূর্বমেবেহ ন দত্তা মম গালব
পুত্রা মমৈব চত্বারো ভবেয়ুঃ কুলভাবনাঃ

প্রতিগৃহ্ণামি তে কন্যামেকপুত্রফলায় বৈ
অশ্বাশ্চাশ্রমমাসাদ্য তিষ্ঠন্তু মম সর্বশঃ

স তয়া রমমাণোঽথ বিশ্বামিত্রো মহাদ্যুতিঃ
আত্মজং জনয়ামাস মাধবীপুত্রমষ্টকম্

জাতমাত্রং সুতং তং চ বিশ্বামিত্রো মহাদ্যুতিঃ
সংয়োজ্যার্থৈস্তথা ধর্মৈরশ্বৈস্তৈঃ সময়োজয়ৎ

অথাষ্টকঃ পুরং প্রায়াত্তদা সোমপুরপ্রভম্
নির্যাত্য কন্যাং শিষ্যায় কৌশিকোঽপি বনং যয়ৌ

গালবোঽপি সুপর্ণেন সহ নির্যাত্য দক্ষিণাম্
মনসাভিপ্রতীতেন কন্যামিদমুবাচ হ

জাতো দানপতিঃ পুত্রস্ত্বয়া শূরস্তথাপরঃ
সত্যধর্মরতশ্চান্যো যজ্বা চাপি তথাপরঃ

তদাগচ্ছ বরারোহে তারিতস্তে পিতা সুতৈঃ
চত্বারশ্চৈব রাজানস্তথাহং চ সুমধ্যমে

গালবস্ত্বভ্যনুজ্ঞায় সুপর্ণং পন্নগাশনম্
পিতুর্নির্যাত্য তাং কন্যাং প্রয়য়ৌ বনমেব হ