অধ্যায় 118

118.1

নারদ উবাচ
স তু রাজা পুনস্তস্যাঃ কর্তুকামঃ স্বয়ংবরম্
উপগম্যাশ্রমপদং গঙ্গায়মুনসংগমে

গৃহীতমাল্যদামাং তাং রথমারোপ্য মাধবীম্
পূরুর্যদুশ্চ ভগিনীমাশ্রমে পর্যধাবতাম্

নাগয়ক্ষমনুষ্যাণাং পতত্রিমৃগপক্ষিণাম্
শৈলদ্রুমবনৌকানামাসীত্তত্র সমাগমঃ

নানাপুরুষদেশানামীশ্বরৈশ্চ সমাকুলম্
ঋষিভির্ব্রহ্মকল্পৈশ্চ সমন্তাদাবৃতং বনম্

নির্দিশ্যমানেষু তু সা বরেষু বরবর্ণিনী
বরানুত্ক্রম্য সর্বাংস্তান্বনং বৃতবতী বরম্

অবতীর্য রথাত্কন্যা নমস্কৃত্বা চ বন্ধুষু
উপগম্য বনং পুণ্যং তপস্তেপে যয়াতিজা

উপবাসৈশ্চ বিবিধৈর্দীক্ষাভির্নিয়মৈস্তথা
আত্মনো লঘুতাং কৃত্বা বভূব মৃগচারিণী

বৈডূর্যাঙ্কুরকল্পানি মৃদূনি হরিতানি চ
চরন্তী শষ্পমুখ্যানি তিক্তানি মধুরাণি চ

স্রবন্তীনাং চ পুণ্যানাং সুরসানি শুচীনি চ
পিবন্তী বারিমুখ্যানি শীতানি বিমলানি চ

বনেষু মৃগরাজেষু সিংহবিপ্রোষিতেষু চ
দাবাগ্নিবিপ্রমুক্তেষু শূন্যেষু গহনেষু চ

চরন্তী হরিণৈঃ সার্ধং মৃগীব বনচারিণী
চচার বিপুলং ধর্মং ব্রহ্মচর্যেণ সংবৃতা

যয়াতিরপি পূর্বেষাং রাজ্ঞাং বৃত্তমনুষ্ঠিতঃ
বহুবর্ষসহস্রায়ুরয়ুজত্কালধর্মণা

পূরুর্যদুশ্চ দ্বৌ বংশৌ বর্ধমানৌ নরোত্তমৌ
তাভ্যাং প্রতিষ্ঠিতো লোকে পরলোকে চ নাহুষঃ

মহীয়তে নরপতির্যয়াতিঃ স্বর্গমাস্থিতঃ
মহর্ষিকল্পো নৃপতিঃ স্বর্গাগ্র্যফলভুগ্বিভুঃ

বহুবর্ষসহস্রাখ্যে কালে বহুগুণে গতে
রাজর্ষিষু নিষণ্ণেষু মহীয়ঃসু মহর্ষিষু

অবমেনে নরান্সর্বান্দেবানৃষিগণাংস্তথা
যয়াতির্মূঢবিজ্ঞানো বিস্ময়াবিষ্টচেতনঃ

ততস্তং বুবুধে দেবঃ শক্রো বলনিষূদনঃ
তে চ রাজর্ষয়ঃ সর্বে ধিগ্ধিগিত্যেবমব্রুবন্

বিচারশ্চ সমুত্পন্নো নিরীক্ষ্য নহুষাত্মজম্
কো ন্বয়ং কস্য বা রাজ্ঞঃ কথং বা স্বর্গমাগতঃ

কর্মণা কেন সিদ্ধোঽয়ং ক্ব বানেন তপশ্চিতম্
কথং বা জ্ঞায়তে স্বর্গে কেন বা জ্ঞায়তেঽপ্যুত

এবং বিচারয়ন্তস্তে রাজানঃ স্বর্গবাসিনঃ
দৃষ্ট্বা পপ্রচ্ছুরন্যোন্যং যয়াতিং নৃপতিং প্রতি

বিমানপালাঃ শতশঃ স্বর্গদ্বারাভিরক্ষিণঃ
পৃষ্টা আসনপালাশ্চ ন জানীমেত্যথাব্রুবন্

সর্বে তে হ্যাবৃতজ্ঞানা নাভ্যজানন্ত তং নৃপম্
স মুহূর্তাদথ নৃপো হতৌজা অভবত্তদা