Utshovঅধ্যায় 119
119.1
নারদ উবাচ
অথ প্রচলিতঃ স্থানাদাসনাচ্চ পরিচ্যুতঃ
কম্পিতেনৈব মনসা ধর্ষিতঃ শোকবহ্নিনা
119.2
ম্লানস্রগ্ভ্রষ্টবিজ্ঞানঃ প্রভ্রষ্টমুকুটাঙ্গদঃ
বিঘূর্ণন্স্রস্তসর্বাঙ্গঃ প্রভ্রষ্টাভরণাম্বরঃ
119.3
অদৃশ্যমানস্তান্পশ্যন্নপশ্যংশ্চ পুনঃ পুনঃ
শূন্যঃ শূন্যেন মনসা প্রপতিষ্যন্মহীতলম্
119.4
কিং ময়া মনসা ধ্যাতমশুভং ধর্মদূষণম্
যেনাহং চলিতঃ স্থানাদিতি রাজা ব্যচিন্তয়ৎ
119.5
তে তু তত্রৈব রাজানঃ সিদ্ধাশ্চাপ্সরসস্তথা
অপশ্যন্ত নিরালম্বং যয়াতিং তং পরিচ্যুতম্
119.6
অথৈত্য পুরুষঃ কশ্চিত্ক্ষীণপুণ্যনিপাতকঃ
যয়াতিমব্রবীদ্রাজন্দেবরাজস্য শাসনাৎ
119.7
অতীব মদমত্তস্ত্বং ন কংচিন্নাবমন্যসে
মানেন ভ্রষ্টঃ স্বর্গস্তে নার্হস্ত্বং পার্থিবাত্মজ
ন চ প্রজ্ঞায়সে গচ্ছ পতস্বেতি তমব্রবীৎ
119.8
পতেয়ং সত্স্বিতি বচস্ত্রিরুক্ত্বা নহুষাত্মজঃ
পতিষ্যংশ্চিন্তয়ামাস গতিং গতিমতাং বরঃ
119.9
এতস্মিন্নেব কালে তু নৈমিষে পার্থিবর্ষভান্
চতুরোঽপশ্যত নৃপস্তেষাং মধ্যে পপাত সঃ
119.10
প্রতর্দনো বসুমনাঃ শিবিরৌশীনরোঽষ্টকঃ
বাজপেয়েন যজ্ঞেন তর্পয়ন্তি সুরেশ্বরম্
119.11
তেষামধ্বরজং ধূমং স্বর্গদ্বারমুপস্থিতম্
যয়াতিরুপজিঘ্রন্বৈ নিপপাত মহীং প্রতি
119.12
ভূমৌ স্বর্গে চ সংবদ্ধাং নদীং ধূমময়ীং নৃপঃ
স গঙ্গামিব গচ্ছন্তীমালম্ব্য জগতীপতিঃ
119.13
শ্রীমত্স্ববভৃথাগ্র্যেষু চতুর্ষু প্রতিবন্ধুষু
মধ্যে নিপতিতো রাজা লোকপালোপমেষু চ
119.14
চতুর্ষু হুতকল্পেষু রাজসিংহমহাগ্নিষু
পপাত মধ্যে রাজর্ষির্যয়াতিঃ পুণ্যসংক্ষয়ে
119.15
তমাহুঃ পার্থিবাঃ সর্বে প্রতিমানমিব শ্রিয়ঃ
কো ভবান্কস্য বা বন্ধুর্দেশস্য নগরস্য বা
119.16
যক্ষো বাপ্যথ বা দেবো গন্ধর্বো রাক্ষসোঽপি বা
ন হি মানুষরূপোঽসি কো বার্থঃ কাঙ্ক্ষিতস্ত্বয়া
119.17
যয়াতিরুবাচ
যয়াতিরস্মি রাজর্ষিঃ ক্ষীণপুণ্যশ্চ্যুতো দিবঃ
পতেয়ং সত্স্বিতি ধ্যায়ন্ভবত্সু পতিতস্ততঃ
119.18
রাজান ঊচুঃ
সত্যমেতদ্ভবতু তে কাঙ্ক্ষিতং পুরুষর্ষভ
সর্বেষাং নঃ ক্রতুফলং ধর্মশ্চ প্রতিগৃহ্যতাম্
119.19
যয়াতিরুবাচ
নাহং প্রতিগ্রহধনো ব্রাহ্মণঃ ক্ষত্রিয়ো হ্যহম্
ন চ মে প্রবণা বুদ্ধিঃ পরপুণ্যবিনাশনে
119.20
নারদ উবাচ
এতস্মিন্নেব কালে তু মৃগচর্যাক্রমাগতাম্
মাধবীং প্রেক্ষ্য রাজানস্তেঽভিবাদ্যেদমব্রুবন্
119.21
কিমাগমনকৃত্যং তে কিং কুর্মঃ শাসনং তব
আজ্ঞাপ্যা হি বয়ং সর্বে তব পুত্রাস্তপোধনে
119.22
তেষাং তদ্ভাষিতং শ্রুত্বা মাধবী পরয়া মুদা
পিতরং সমুপাগচ্ছদ্যয়াতিং সা ববন্দ চ
119.23
দৃষ্ট্বা মূর্ধ্না নতান্পুত্রাংস্তাপসী বাক্যমব্রবীৎ
দৌহিত্রাস্তব রাজেন্দ্র মম পুত্রা ন তে পরাঃ
ইমে ত্বাং তারয়িষ্যন্তি দিষ্টমেতত্পুরাতনম্
119.24
অহং তে দুহিতা রাজন্মাধবী মৃগচারিণী
ময়াপ্যুপচিতো ধর্মস্ততোঽর্ধং প্রতিগৃহ্যতাম্
119.25
যস্মাদ্রাজন্নরাঃ সর্বে অপত্যফলভাগিনঃ
তস্মাদিচ্ছন্তি দৌহিত্রান্যথা ত্বং বসুধাধিপ
119.26
ততস্তে পার্থিবাঃ সর্বে শিরসা জননীং তদা
অভিবাদ্য নমস্কৃত্য মাতামহমথাব্রুবন্
119.27
উচ্চৈরনুপমৈঃ স্নিগ্ধৈঃ স্বরৈরাপূর্য মেদিনীম্
মাতামহং নৃপতয়স্তারয়ন্তো দিবশ্চ্যুতম্
119.28
অথ তস্মাদুপগতো গালবোঽপ্যাহ পার্থিবম্
তপসো মেঽষ্টভাগেন স্বর্গমারোহতাং ভবান্