অধ্যায় 120

120.1

নারদ উবাচ
প্রত্যভিজ্ঞাতমাত্রোঽথ সদ্ভিস্তৈর্নরপুংগবঃ
যয়াতির্দিব্যসংস্থানো বভূব বিগতজ্বরঃ

দিব্যমাল্যাম্বরধরো দিব্যাভরণভূষিতঃ
দিব্যগন্ধগুণোপেতো ন পৃথ্বীমস্পৃশত্পদা

ততো বসুমনাঃ পূর্বমুচ্চৈরুচ্চারয়ন্বচঃ
খ্যাতো দানপতির্লোকে ব্যাজহার নৃপং তদা

প্রাপ্তবানস্মি যল্লোকে সর্ববর্ণেষ্বগর্হয়া
তদপ্যথ চ দাস্যামি তেন সংয়ুজ্যতাং ভবান্

যত্ফলং দানশীলস্য ক্ষমাশীলস্য যত্ফলম্
যচ্চ মে ফলমাধানে তেন সংয়ুজ্যতাং ভবান্

ততঃ প্রতর্দনোঽপ্যাহ বাক্যং ক্ষত্রিয়পুংগবঃ
যথা ধর্মরতির্নিত্যং নিত্যং যুদ্ধপরায়ণঃ

প্রাপ্তবানস্মি যল্লোকে ক্ষত্রধর্মোদ্ভবং যশঃ
বীরশব্দফলং চৈব তেন সংয়ুজ্যতাং ভবান্

শিবিরৌশীনরো ধীমানুবাচ মধুরাং গিরম্
যথা বালেষু নারীষু বৈহার্যেষু তথৈব চ

সংগরেষু নিপাতেষু তথাপদ্ব্যসনেষু চ
অনৃতং নোক্তপূর্বং মে তেন সত্যেন খং ব্রজ

যথা প্রাণাংশ্চ রাজ্যং চ রাজন্কর্ম সুখানি চ
ত্যজেয়ং ন পুনঃ সত্যং তেন সত্যেন খং ব্রজ

যথা সত্যেন মে ধর্মো যথা সত্যেন পাবকঃ
প্রীতঃ শক্রশ্চ সত্যেন তেন সত্যেন খং ব্রজ

অষ্টকস্ত্বথ রাজর্ষিঃ কৌশিকো মাধবীসুতঃ
অনেকশতয়জ্বানং বচনং প্রাহ ধর্মবিৎ

শতশঃ পুণ্ডরীকা মে গোসবাশ্চ চিতাঃ প্রভো
ক্রতবো বাজপেয়াশ্চ তেষাং ফলমবাপ্নুহি

ন মে রত্নানি ন ধনং ন তথান্যে পরিচ্ছদাঃ
ক্রতুষ্বনুপয়ুক্তানি তেন সত্যেন খং ব্রজ

যথা যথা হি জল্পন্তি দৌহিত্রাস্তং নরাধিপম্
তথা তথা বসুমতীং ত্যক্ত্বা রাজা দিবং যয়ৌ

এবং সর্বে সমস্তাস্তে রাজানঃ সুকৃতৈস্তদা
যয়াতিং স্বর্গতো ভ্রষ্টং তারয়ামাসুরঞ্জসা

দৌহিত্রাঃ স্বেন ধর্মেণ যজ্ঞদানকৃতেন বৈ
চতুর্ষু রাজবংশেষু সংভূতাঃ কুলবর্ধনাঃ
মাতামহং মহাপ্রাজ্ঞং দিবমারোপয়ন্তি তে

রাজান ঊচুঃ
রাজধর্মগুণোপেতাঃ সর্বধর্মগুণান্বিতাঃ
দৌহিত্রাস্তে বয়ং রাজন্দিবমারোহ পার্থিবঃ