অধ্যায় 121

121.1

নারদ উবাচ
সদ্ভিরারোপিতঃ স্বর্গং পার্থিবৈর্ভূরিদক্ষিণৈঃ
অভ্যনুজ্ঞায় দৌহিত্রান্যয়াতির্দিবমাস্থিতঃ

অভিবৃষ্টশ্চ বর্ষেণ নানাপুষ্পসুগন্ধিনা
পরিষ্বক্তশ্চ পুণ্যেন বায়ুনা পুণ্যগন্ধিনা

অচলং স্থানমারুহ্য দৌহিত্রফলনির্জিতম্
কর্মভিঃ স্বৈরুপচিতো জজ্বাল পরয়া শ্রিয়া

উপগীতোপনৃত্তশ্চ গন্ধর্বাপ্সরসাং গণৈঃ
প্রীত্যা প্রতিগৃহীতশ্চ স্বর্গে দুন্দুভিনিস্বনৈঃ

অভিষ্টুতশ্চ বিবিধৈর্দেবরাজর্ষিচারণৈঃ
অর্চিতশ্চোত্তমার্ঘেণ দৈবতৈরভিনন্দিতঃ

প্রাপ্তঃ স্বর্গফলং চৈব তমুবাচ পিতামহঃ
নির্বৃতং শান্তমনসং বচোভিস্তর্পয়ন্নিব

চতুষ্পাদস্ত্বয়া ধর্মশ্চিতো লোক্যেন কর্মণা
অক্ষয়স্তব লোকোঽয়ং কীর্তিশ্চৈবাক্ষয়া দিবি
পুনস্তবাদ্য রাজর্ষে সুকৃতেনেহ কর্মণা

আবৃতং তমসা চেতঃ সর্বেষাং স্বর্গবাসিনাম্
যেন ত্বাং নাভিজানন্তি ততোঽজ্ঞাত্বাসি পাতিতঃ

প্রীত্যৈব চাসি দৌহিত্রৈস্তারিতস্ত্বমিহাগতঃ
স্থানং চ প্রতিপন্নোঽসি কর্মণা স্বেন নির্জিতম্
অচলং শাশ্বতং পুণ্যমুত্তমং ধ্রুবমব্যয়ম্

যয়াতিরুবাচ
ভগবন্সংশয়ো মেঽস্তি কশ্চিত্তং ছেত্তুমর্হসি
ন হ্যন্যমহমর্হামি প্রষ্টুং লোকপিতামহ

বহুবর্ষসহস্রান্তং প্রজাপালনবর্ধিতম্
অনেকক্রতুদানৌঘৈরর্জিতং মে মহত্ফলম্

কথং তদল্পকালেন ক্ষীণং যেনাস্মি পাতিতঃ
ভগবন্বেত্থ লোকাংশ্চ শাশ্বতান্মম নির্জিতান্

পিতামহ উবাচ
বহুবর্ষসহস্রান্তং প্রজাপালনবর্ধিতম্
অনেকক্রতুদানৌঘৈর্যত্ত্বয়োপার্জিতং ফলম্

তদনেনৈব দোষেণ ক্ষীণং যেনাসি পাতিতঃ
অভিমানেন রাজেন্দ্র ধিক্কৃতঃ স্বর্গবাসিভিঃ

নায়ং মানেন রাজর্ষে ন বলেন ন হিংসয়া
ন শাঠ্যেন ন মায়াভির্লোকো ভবতি শাশ্বতঃ

নাবমান্যাস্ত্বয়া রাজন্নবরোত্কৃষ্টমধ্যমাঃ
ন হি মানপ্রদগ্ধানাং কশ্চিদস্তি সমঃ ক্বচিৎ

পতনারোহণমিদং কথয়িষ্যন্তি যে নরাঃ
বিষমাণ্যপি তে প্রাপ্তাস্তরিষ্যন্তি ন সংশয়ঃ

নারদ উবাচ
এষ দোষোঽভিমানেন পুরা প্রাপ্তো যয়াতিনা
নির্বন্ধতশ্চাতিমাত্রং গালবেন মহীপতে

শ্রোতব্যং হিতকামানাং সুহৃদাং ভূতিমিচ্ছতাম্
ন কর্তব্যো হি নির্বন্ধো নির্বন্ধো হি ক্ষয়োদয়ঃ

তস্মাত্ত্বমপি গান্ধারে মানং ক্রোধং চ বর্জয়
সংধত্স্ব পাণ্ডবৈর্বীর সংরম্ভং ত্যজ পার্থিব

দদাতি যত্পার্থিব যত্করোতি; যদ্বা তপস্তপ্যতি যজ্জুহোতি
ন তস্য নাশোঽস্তি ন চাপকর্ষো; নান্যস্তদশ্নাতি স এব কর্তা

ইদং মহাখ্যানমনুত্তমং মতং; বহুশ্রুতানাং গতরোষরাগিণাম্
সমীক্ষ্য লোকে বহুধা প্রধাবিতা; ত্রিবর্গদৃষ্টিঃ পৃথিবীমুপাশ্নুতে