Utshovঅধ্যায় 122
122.1
ধৃতরাষ্ট্র উবাচ
ভগবন্নেবমেবৈতদ্যথা বদসি নারদ
ইচ্ছামি চাহমপ্যেবং ন ত্বীশো ভগবন্নহম্
122.2
বৈশংপায়ন উবাচ
এবমুক্ত্বা ততঃ কৃষ্ণমভ্যভাষত ভারত
স্বর্গ্যং লোক্যং চ মামাত্থ ধর্ম্যং ন্যায্যং চ কেশব
122.3
ন ত্বহং স্ববশস্তাত ক্রিয়মাণং ন মে প্রিয়ম্
অঙ্গ দুর্যোধনং কৃষ্ণ মন্দং শাস্ত্রাতিগং মম
122.4
অনুনেতুং মহাবাহো যতস্ব পুরুষোত্তম
সুহৃত্কার্যং তু সুমহত্কৃতং তে স্যাজ্জনার্দন
122.5
ততোঽভ্যাবৃত্য বার্ষ্ণেয়ো দুর্যোধনমমর্ষণম্
অব্রবীন্মধুরাং বাচং সর্বধর্মার্থতত্ত্ববিৎ
122.6
দুর্যোধন নিবোধেদং মদ্বাক্যং কুরুসত্তম
সমর্থং তে বিশেষেণ সানুবন্ধস্য ভারত
122.7
মহাপ্রাজ্ঞ কুলে জাতঃ সাধ্বেতত্কর্তুমর্হসি
শ্রুতবৃত্তোপসংপন্নঃ সর্বৈঃ সমুদিতো গুণৈঃ
122.8
দৌষ্কুলেয়া দুরাত্মানো নৃশংসা নিরপত্রপাঃ
ত এতদীদৃশং কুর্যুর্যথা ত্বং তাত মন্যসে
122.9
ধর্মার্থয়ুক্তা লোকেঽস্মিন্প্রবৃত্তির্লক্ষ্যতে সতাম্
অসতাং বিপরীতা তু লক্ষ্যতে ভরতর্ষভ
122.10
বিপরীতা ত্বিয়ং বৃত্তিরসকৃল্লক্ষ্যতে ত্বয়ি
অধর্মশ্চানুবন্ধোঽত্র ঘোরঃ প্রাণহরো মহান্
122.11
অনেকশস্ত্বন্নিমিত্তময়শস্যং চ ভারত
তমনর্থং পরিহরন্নাত্মশ্রেয়ঃ করিষ্যসি
122.12
ভ্রাতৄণামথ ভৃত্যানাং মিত্রাণাং চ পরংতপ
অধর্ম্যাদয়শস্যাচ্চ কর্মণস্ত্বং প্রমোক্ষ্যসে
122.13
প্রাজ্ঞৈঃ শূরৈর্মহোত্সাহৈরাত্মবদ্ভির্বহুশ্রুতৈঃ
সংধত্স্ব পুরুষব্যাঘ্র পাণ্ডবৈর্ভরতর্ষভ
122.14
তদ্ধিতং চ প্রিয়ং চৈব ধৃতরাষ্ট্রস্য ধীমতঃ
পিতামহস্য দ্রোণস্য বিদুরস্য মহামতেঃ
122.15
কৃপস্য সোমদত্তস্য বাহ্লীকস্য চ ধীমতঃ
অশ্বত্থাম্নো বিকর্ণস্য সংজয়স্য বিশাং পতে
122.16
জ্ঞাতীনাং চৈব ভূয়িষ্ঠং মিত্রাণাং চ পরংতপ
শমে শর্ম ভবেত্তাত সর্বস্য জগতস্তথা
122.17
হ্রীমানসি কুলে জাতঃ শ্রুতবাননৃশংসবান্
তিষ্ঠ তাত পিতুঃ শাস্ত্রে মাতুশ্চ ভরতর্ষভ
122.18
এতচ্ছ্রেয়ো হি মন্যন্তে পিতা যচ্ছাস্তি ভারত
উত্তমাপদ্গতঃ সর্বঃ পিতুঃ স্মরতি শাসনম্
122.19
রোচতে তে পিতুস্তাত পাণ্ডবৈঃ সহ সংগমঃ
সামাত্যস্য কুরুশ্রেষ্ঠ তত্তুভ্যং তাত রোচতাম্
122.20
শ্রুত্বা যঃ সুহৃদাং শাস্ত্রং মর্ত্যো ন প্রতিপদ্যতে
বিপাকান্তে দহত্যেনং কিংপাকমিব ভক্ষিতম্
122.21
যস্তু নিঃশ্রেয়সং বাক্যং মোহান্ন প্রতিপদ্যতে
স দীর্ঘসূত্রো হীনার্থঃ পশ্চাত্তাপেন যুজ্যতে
122.22
যস্তু নিঃশ্রেয়সং শ্রুত্বা প্রাপ্তমেবাভিপদ্যতে
আত্মনো মতমুত্সৃজ্য স লোকে সুখমেধতে
122.23
যোঽর্থকামস্য বচনং প্রাতিকূল্যান্ন মৃষ্যতে
শৃণোতি প্রতিকূলানি দ্বিষতাং বশমেতি সঃ
122.24
সতাং মতমতিক্রম্য যোঽসতাং বর্ততে মতে
শোচন্তে ব্যসনে তস্য সুহৃদো নচিরাদিব
122.25
মুখ্যানমাত্যানুত্সৃজ্য যো নিহীনান্নিষেবতে
স ঘোরামাপদং প্রাপ্য নোত্তারমধিগচ্ছতি
122.26
যোঽসত্সেবী বৃথাচারো ন শ্রোতা সুহৃদাং সদা
পরান্বৃণীতে স্বান্দ্বেষ্টি তং গৌঃ শপতি ভারত
122.27
স ত্বং বিরুধ্য তৈর্বীরৈরন্যেভ্যস্ত্রাণমিচ্ছসি
অশিষ্টেভ্যোঽসমর্থেভ্যো মূঢেভ্যো ভরতর্ষভ
122.28
কো হি শক্রসমাঞ্জ্ঞাতীনতিক্রম্য মহারথান্
অন্যেভ্যস্ত্রাণমাশংসেত্ত্বদন্যো ভুবি মানবঃ
122.29
জন্মপ্রভৃতি কৌন্তেয়া নিত্যং বিনিকৃতাস্ত্বয়া
ন চ তে জাতু কুপ্যন্তি ধর্মাত্মানো হি পাণ্ডবাঃ
122.30
মিথ্যাপ্রচরিতাস্তাত জন্মপ্রভৃতি পাণ্ডবাঃ
ত্বয়ি সম্যঙ্মহাবাহো প্রতিপন্না যশস্বিনঃ
122.31
ত্বয়াপি প্রতিপত্তব্যং তথৈব ভরতর্ষভ
স্বেষু বন্ধুষু মুখ্যেষু মা মন্যুবশমন্বগাঃ
122.32
ত্রিবর্গয়ুক্তা প্রাজ্ঞানামারম্ভা ভরতর্ষভ
ধর্মার্থাবনুরুধ্যন্তে ত্রিবর্গাসংভবে নরাঃ
122.33
পৃথক্তু বিনিবিষ্টানাং ধর্মং ধীরোঽনুরুধ্যতে
মধ্যমোঽর্থং কলিং বালঃ কামমেবানুরুধ্যতে
122.34
ইন্দ্রিয়ৈঃ প্রসৃতো লোভাদ্ধর্মং বিপ্রজহাতি যঃ
কামার্থাবনুপায়েন লিপ্সমানো বিনশ্যতি
122.35
কামার্থৌ লিপ্সমানস্তু ধর্মমেবাদিতশ্চরেৎ
ন হি ধর্মাদপৈত্যর্থঃ কামো বাপি কদাচন
122.36
উপায়ং ধর্মমেবাহুস্ত্রিবর্গস্য বিশাং পতে
লিপ্সমানো হি তেনাশু কক্ষেঽগ্নিরিব বর্ধতে
122.37
স ত্বং তাতানুপায়েন লিপ্সসে ভরতর্ষভ
আধিরাজ্যং মহদ্দীপ্তং প্রথিতং সর্বরাজসু
122.38
আত্মানং তক্ষতি হ্যেষ বনং পরশুনা যথা
যঃ সম্যগ্বর্তমানেষু মিথ্যা রাজন্প্রবর্ততে
122.39
ন তস্য হি মতিং ছিন্দ্যাদ্যস্য নেচ্ছেত্পরাভবম্
অবিচ্ছিন্নস্য ধীরস্য কল্যাণে ধীয়তে মতিঃ
122.40
ত্যক্তাত্মানং ন বাধেত ত্রিষু লোকেষু ভারত
অপ্যন্যং প্রাকৃতং কিংচিত্কিমু তান্পাণ্ডবর্ষভান্
122.41
অমর্ষবশমাপন্নো ন কিংচিদ্বুধ্যতে নরঃ
ছিদ্যতে হ্যাততং সর্বং প্রমাণং পশ্য ভারত
122.42
শ্রেয়স্তে দুর্জনাত্তাত পাণ্ডবৈঃ সহ সংগমঃ
তৈর্হি সংপ্রীয়মাণস্ত্বং সর্বান্কামানবাপ্স্যসি
122.43
পাণ্ডবৈর্নির্জিতাং ভূমিং ভুঞ্জানো রাজসত্তম
পাণ্ডবান্পৃষ্ঠতঃ কৃত্বা ত্রাণমাশংসসেঽন্যতঃ
122.44
দুঃশাসনে দুর্বিষহে কর্ণে চাপি সসৌবলে
এতেষ্বৈশ্বর্যমাধায় ভূতিমিচ্ছসি ভারত
122.45
ন চৈতে তব পর্যাপ্তা জ্ঞানে ধর্মার্থয়োস্তথা
বিক্রমে চাপ্যপর্যাপ্তাঃ পাণ্ডবান্প্রতি ভারত
122.46
ন হীমে সর্বরাজানঃ পর্যাপ্তাঃ সহিতাস্ত্বয়া
ক্রুদ্ধস্য ভীমসেনস্য প্রেক্ষিতুং মুখমাহবে
122.47
ইদং সংনিহিতং তাত সমগ্রং পার্থিবং বলম্
অয়ং ভীষ্মস্তথা দ্রোণঃ কর্ণশ্চায়ং তথা কৃপঃ
122.48
ভূরিশ্রবাঃ সৌমদত্তিরশ্বত্থামা জয়দ্রথঃ
অশক্তাঃ সর্ব এবৈতে প্রতিয়োদ্ধুং ধনংজয়ম্
122.49
অজেয়ো হ্যর্জুনঃ ক্রুদ্ধঃ সর্বৈরপি সুরাসুরৈঃ
মানুষৈরপি গন্ধর্বৈর্মা যুদ্ধে চেত আধিথাঃ
122.50
দৃশ্যতাং বা পুমান্কশ্চিত্সমগ্রে পার্থিবে বলে
যোঽর্জুনং সমরে প্রাপ্য স্বস্তিমানাব্রজেদ্গৃহান্
122.51
কিং তে জনক্ষয়েণেহ কৃতেন ভরতর্ষভ
যস্মিঞ্জিতে জিতং তে স্যাত্পুমানেকঃ স দৃশ্যতাম্
122.52
যঃ স দেবান্সগন্ধর্বান্সয়ক্ষাসুরপন্নগান্
অজয়ত্খাণ্ডবপ্রস্থে কস্তং যুধ্যেত মানবঃ
122.53
তথা বিরাটনগরে শ্রূয়তে মহদদ্ভুতম্
একস্য চ বহূনাং চ পর্যাপ্তং তন্নিদর্শনম্
122.54
তমজেয়মনাধৃষ্যং বিজেতুং জিষ্ণুমচ্যুতম্
আশংসসীহ সমরে বীরমর্জুনমূর্জিতম্
122.55
মদ্দ্বিতীয়ং পুনঃ পার্থং কঃ প্রার্থয়িতুমর্হতি
যুদ্ধে প্রতীপমায়ান্তমপি সাক্ষাত্পুরংদরঃ
122.56
বাহুভ্যামুদ্ধরেদ্ভূমিং দহেত্ক্রুদ্ধ ইমাঃ প্রজাঃ
পাতয়েত্ত্রিদিবাদ্দেবান্যোঽর্জুনং সমরে জয়েৎ
122.57
পশ্য পুত্রাংস্তথা ভ্রাতৄঞ্জ্ঞাতীন্সংবন্ধিনস্তথা
ত্বত্কৃতে ন বিনশ্যেয়ুরেতে ভরতসত্তম
122.58
অস্তু শেষং কৌরবাণাং মা পরাভূদিদং কুলম্
কুলঘ্ন ইতি নোচ্যেথা নষ্টকীর্তির্নরাধিপ
122.59
ত্বামেব স্থাপয়িষ্যন্তি যৌবরাজ্যে মহারথাঃ
মহারাজ্যে চ পিতরং ধৃতরাষ্ট্রং জনেশ্বরম্
122.60
মা তাত শ্রিয়মায়ান্তীমবমংস্থাঃ সমুদ্যতাম্
অর্ধং প্রদায় পার্থেভ্যো মহতীং শ্রিয়মাপ্স্যসি
122.61
পাণ্ডবৈঃ সংশমং কৃত্বা কৃত্বা চ সুহৃদাং বচঃ
সংপ্রীয়মাণো মিত্রৈশ্চ চিরং ভদ্রাণ্যবাপ্স্যসি