Utshovঅধ্যায় 123
123.1
বৈশংপায়ন উবাচ
ততঃ শাংতনবো ভীষ্মো দুর্যোধনমমর্ষণম্
কেশবস্য বচঃ শ্রুত্বা প্রোবাচ ভরতর্ষভ
123.2
কৃষ্ণেন বাক্যমুক্তোঽসি সুহৃদাং শমমিচ্ছতা
অনুপশ্যস্ব তত্তাত মা মন্যুবশমন্বগাঃ
123.3
অকৃত্বা বচনং তাত কেশবস্য মহাত্মনঃ
শ্রেয়ো ন জাতু ন সুখং ন কল্যাণমবাপ্স্যসি
123.4
ধর্ম্যমর্থং মহাবাহুরাহ ত্বাং তাত কেশবঃ
তমর্থমভিপদ্যস্ব মা রাজন্নীনশঃ প্রজাঃ
123.5
ইমাং শ্রিয়ং প্রজ্বলিতাং ভারতীং সর্বরাজসু
জীবতো ধৃতরাষ্ট্রস্য দৌরাত্ম্যাদ্ভ্রংশয়িষ্যসি
123.6
আত্মানং চ সহামাত্যং সপুত্রপশুবান্ধবম্
সহমিত্রমসদ্বুদ্ধ্যা জীবিতাদ্ভ্রংশয়িষ্যসি
123.7
অতিক্রামন্কেশবস্য তথ্যং বচনমর্থবৎ
পিতুশ্চ ভরতশ্রেষ্ঠ বিদুরস্য চ ধীমতঃ
123.8
মা কুলঘ্নোঽন্তপুরুষো দুর্মতিঃ কাপথং গমঃ
পিতরং মাতরং চৈব বৃদ্ধৌ শোকায় মা দদঃ
123.9
অথ দ্রোণোঽব্রবীত্তত্র দুর্যোধনমিদং বচঃ
অমর্ষবশমাপন্নং নিঃশ্বসন্তং পুনঃ পুনঃ
123.10
ধর্মার্থয়ুক্তং বচনমাহ ত্বাং তাত কেশবঃ
তথা ভীষ্মঃ শাংতনবস্তজ্জুষস্ব নরাধিপ
123.11
প্রাজ্ঞৌ মেধাবিনৌ দান্তাবর্থকামৌ বহুশ্রুতৌ
আহতুস্ত্বাং হিতং বাক্যং তদাদত্স্ব পরংতপ
123.12
অনুতিষ্ঠ মহাপ্রাজ্ঞ কৃষ্ণভীষ্মৌ যদূচতুঃ
মা বচো লঘুবুদ্ধীনাং সমাস্থাস্ত্বং পরংতপ
123.13
যে ত্বাং প্রোত্সাহয়ন্ত্যেতে নৈতে কৃত্যায় কর্হিচিৎ
বৈরং পরেষাং গ্রীবায়াং প্রতিমোক্ষ্যন্তি সংয়ুগে
123.14
মা কুরূঞ্জীঘনঃ সর্বান্পুত্রান্ভ্রাতৄংস্তথৈব চ
বাসুদেবার্জুনৌ যত্র বিদ্ধ্যজেয়ং বলং হি তৎ
123.15
এতচ্চৈব মতং সত্যং সুহৃদোঃ কৃষ্ণভীষ্ময়োঃ
যদি নাদাস্যসে তাত পশ্চাত্তপ্স্যসি ভারত
123.16
যথোক্তং জামদগ্ন্যেন ভূয়ানেব ততোঽর্জুনঃ
কৃষ্ণো হি দেবকীপুত্রো দেবৈরপি দুরুত্সহঃ
123.17
কিং তে সুখপ্রিয়েণেহ প্রোক্তেন ভরতর্ষভ
এতত্তে সর্বমাখ্যাতং যথেচ্ছসি তথা কুরু
ন হি ত্বামুত্সহে বক্তুং ভূয়ো ভরতসত্তম
123.18
তস্মিন্বাক্যান্তরে বাক্যং ক্ষত্তাপি বিদুরোঽব্রবীৎ
দুর্যোধনমভিপ্রেক্ষ্য ধার্তরাষ্ট্রমমর্ষণম্
123.19
দুর্যোধন ন শোচামি ত্বামহং ভরতর্ষভ
ইমৌ তু বৃদ্ধৌ শোচামি গান্ধারীং পিতরং চ তে
123.20
যাবনাথৌ চরিষ্যেতে ত্বয়া নাথেন দুর্হৃদা
হতমিত্রৌ হতামাত্যৌ লূনপক্ষাবিব দ্বিজৌ
123.21
ভিক্ষুকৌ বিচরিষ্যেতে শোচন্তৌ পৃথিবীমিমাম্
কুলঘ্নমীদৃশং পাপং জনয়িত্বা কুপূরুষম্
123.22
অথ দুর্যোধনং রাজা ধৃতরাষ্ট্রোঽভ্যভাষত
আসীনং ভ্রাতৃভিঃ সার্ধং রাজভিঃ পরিবারিতম্
123.23
দুর্যোধন নিবোধেদং শৌরিণোক্তং মহাত্মনা
আদত্স্ব শিবমত্যন্তং যোগক্ষেমবদব্যয়ম্
123.24
অনেন হি সহায়েন কৃষ্ণেনাক্লিষ্টকর্মণা
ইষ্টান্সর্বানভিপ্রায়ান্প্রাপ্স্যামঃ সর্বরাজসু
123.25
সুসংহিতঃ কেশবেন গচ্ছ তাত যুধিষ্ঠিরম্
চর স্বস্ত্যয়নং কৃত্স্নং ভারতানামনাময়ম্
123.26
বাসুদেবেন তীর্থেন তাত গচ্ছস্ব সংগমম্
কালপ্রাপ্তমিদং মন্যে মা ত্বং দুর্যোধনাতিগাঃ
123.27
শমং চেদ্যাচমানং ত্বং প্রত্যাখ্যাস্যসি কেশবম্
ত্বদর্থমভিজল্পন্তং ন তবাস্ত্যপরাভবঃ