অধ্যায় 124

124.1

বৈশংপায়ন উবাচ
ধৃতরাষ্ট্রবচঃ শ্রুত্বা ভীষ্মদ্রোণৌ সমর্থ্য তৌ
দুর্যোধনমিদং বাক্যমূচতুঃ শাসনাতিগম্

যাবত্কৃষ্ণাবসংনদ্ধৌ যাবত্তিষ্ঠতি গাণ্ডিবম্
যাবদ্ধৌম্যো ন সেনাগ্নৌ জুহোতীহ দ্বিষদ্বলম্

যাবন্ন প্রেক্ষতে ক্রুদ্ধঃ সেনাং তব যুধিষ্ঠিরঃ
হ্রীনিষেধো মহেষ্বাসস্তাবচ্ছাম্যতু বৈশসম্

যাবন্ন দৃশ্যতে পার্থঃ স্বেষ্বনীকেষ্ববস্থিতঃ
ভীমসেনো মহেষ্বাসস্তাবচ্ছাম্যতু বৈশসম্

যাবন্ন চরতে মার্গান্পৃতনামভিহর্ষয়ন্
যাবন্ন শাতয়ত্যাজৌ শিরাংসি গজয়োধিনাম্

গদয়া বীরঘাতিন্যা ফলানীব বনস্পতেঃ
কালেন পরিপক্বানি তাবচ্ছাম্যতু বৈশসম্

নকুলঃ সহদেবশ্চ ধৃষ্টদ্যুম্নশ্চ পার্ষতঃ
বিরাটশ্চ শিখণ্ডী চ শৈশুপালিশ্চ দংশিতাঃ

যাবন্ন প্রবিশন্ত্যেতে নক্রা ইব মহার্ণবম্
কৃতাস্ত্রাঃ ক্ষিপ্রমস্যন্তস্তাবচ্ছাম্যতু বৈশসম্

যাবন্ন সুকুমারেষু শরীরেষু মহীক্ষিতাম্
গার্ধ্রপত্রাঃ পতন্ত্যুগ্রাস্তাবচ্ছাম্যতু বৈশসম্

চন্দনাগরুদিগ্ধেষু হারনিষ্কধরেষু চ
নোরঃসু যাবদ্যোধানাং মহেষ্বাসৈর্মহেষবঃ

কৃতাস্ত্রৈঃ ক্ষিপ্রমস্যদ্ভির্দূরপাতিভিরায়সাঃ
অভিলক্ষ্যৈর্নিপাত্যন্তে তাবচ্ছাম্যতু বৈশসম্

অভিবাদয়মানং ত্বাং শিরসা রাজকুঞ্জরঃ
পাণিভ্যাং প্রতিগৃহ্ণাতু ধর্মরাজো যুধিষ্ঠিরঃ

ধ্বজাঙ্কুশপতাকাঙ্কং দক্ষিণং তে সুদক্ষিণঃ
স্কন্ধে নিক্ষিপতাং বাহুং শান্তয়ে ভরতর্ষভ

রত্নৌষধিসমেতেন রত্নাঙ্গুলিতলেন চ
উপবিষ্টস্য পৃষ্ঠং তে পাণিনা পরিমার্জতু

শালস্কন্ধো মহাবাহুস্ত্বাং স্বজানো বৃকোদরঃ
সাম্নাভিবদতাং চাপি শান্তয়ে ভরতর্ষভ

অর্জুনেন যমাভ্যাং চ ত্রিভিস্তৈরভিবাদিতঃ
মূর্ধ্নি তান্সমুপাঘ্রায় প্রেম্ণাভিবদ পার্থিব

দৃষ্ট্বা ত্বাং পাণ্ডবৈর্বীরৈর্ভ্রাতৃভিঃ সহ সংগতম্
যাবদানন্দজাশ্রূণি প্রমুঞ্চন্তু নরাধিপাঃ

ঘুষ্যতাং রাজধানীষু সর্বসংপন্মহীক্ষিতাম্
পৃথিবী ভ্রাতৃভাবেন ভুজ্যতাং বিজ্বরো ভব