UtshovChapter 124
124.1
वैशंपायन उवाच
धृतराष्ट्रवचः श्रुत्वा भीष्मद्रोणौ समर्थ्य तौ
दुर्योधनमिदं वाक्यमूचतुः शासनातिगम्
Vaishampayana uvacha
Dhritarashtravachah shrutva bhishmadronau samarthya tau
Duryodhanamidam vakyamuchatuh shasanatigam
124.2
यावत्कृष्णावसंनद्धौ यावत्तिष्ठति गाण्डिवम्
यावद्धौम्यो न सेनाग्नौ जुहोतीह द्विषद्बलम्
Yavatkrishnavasannaddhau yavattishthati gandivam
Yavaddhaumyo na senagnau juhotiha dvishadbalam
124.3
यावन्न प्रेक्षते क्रुद्धः सेनां तव युधिष्ठिरः
ह्रीनिषेधो महेष्वासस्तावच्छाम्यतु वैशसम्
Yavanna prekshate kruddhah senam tava yudhishthirah
Hrinishedho maheshvasastavachchhamyatu vaishasam
124.4
यावन्न दृश्यते पार्थः स्वेष्वनीकेष्ववस्थितः
भीमसेनो महेष्वासस्तावच्छाम्यतु वैशसम्
Yavanna drishyate parthah sveshvanikeshvavasthitah
Bhimaseno maheshvasastavachchhamyatu vaishasam
124.5
यावन्न चरते मार्गान्पृतनामभिहर्षयन्
यावन्न शातयत्याजौ शिरांसि गजयोधिनाम्
Yavanna charate marganpritanamabhiharshayan
Yavanna shatayatyajau shiransi gajayodhinam
124.6
गदया वीरघातिन्या फलानीव वनस्पतेः
कालेन परिपक्वानि तावच्छाम्यतु वैशसम्
Gadaya viraghatinya phalaniva vanaspateh
Kalena paripakvani tavachchhamyatu vaishasam
124.7
नकुलः सहदेवश्च धृष्टद्युम्नश्च पार्षतः
विराटश्च शिखण्डी च शैशुपालिश्च दंशिताः
Nakulah sahadevashcha dhrishtadyumnashcha parshatah
Viratashcha shikhandi cha shaishupalishcha danshitah
124.8
यावन्न प्रविशन्त्येते नक्रा इव महार्णवम्
कृतास्त्राः क्षिप्रमस्यन्तस्तावच्छाम्यतु वैशसम्
Yavanna pravishantyete nakra iva maharnavam
Kritastrah kshipramasyantastavachchhamyatu vaishasam
124.9
यावन्न सुकुमारेषु शरीरेषु महीक्षिताम्
गार्ध्रपत्राः पतन्त्युग्रास्तावच्छाम्यतु वैशसम्
Yavanna sukumareshu sharireshu mahikshitam
Gardhrapatrah patantyugrastavachchhamyatu vaishasam
124.10
चन्दनागरुदिग्धेषु हारनिष्कधरेषु च
नोरःसु यावद्योधानां महेष्वासैर्महेषवः
Chandanagarudigdheshu haranishkadhareshu cha
Norahsu yavadyodhanam maheshvasairmaheshavah
124.11
कृतास्त्रैः क्षिप्रमस्यद्भिर्दूरपातिभिरायसाः
अभिलक्ष्यैर्निपात्यन्ते तावच्छाम्यतु वैशसम्
Kritastraih kshipramasyadbhirdurapatibhirayasah
Abhilakshyairnipatyante tavachchhamyatu vaishasam
124.12
अभिवादयमानं त्वां शिरसा राजकुञ्जरः
पाणिभ्यां प्रतिगृह्णातु धर्मराजो युधिष्ठिरः
Abhivadayamanam tvam shirasa rajakunjarah
Panibhyam pratigrihnatu dharmarajo yudhishthirah
124.13
ध्वजाङ्कुशपताकाङ्कं दक्षिणं ते सुदक्षिणः
स्कन्धे निक्षिपतां बाहुं शान्तये भरतर्षभ
Dhvajankushapatakankam dakshinam te sudakshinah
Skandhe nikshipatam bahum shantaye bharatarshabha
124.14
रत्नौषधिसमेतेन रत्नाङ्गुलितलेन च
उपविष्टस्य पृष्ठं ते पाणिना परिमार्जतु
Ratnaushadhisametena ratnangulitalena cha
Upavishtasya prishtham te panina parimarjatu
124.15
शालस्कन्धो महाबाहुस्त्वां स्वजानो वृकोदरः
साम्नाभिवदतां चापि शान्तये भरतर्षभ
Shalaskandho mahabahustvam svajano vrikodarah
Samnabhivadatam chapi shantaye bharatarshabha
124.16
अर्जुनेन यमाभ्यां च त्रिभिस्तैरभिवादितः
मूर्ध्नि तान्समुपाघ्राय प्रेम्णाभिवद पार्थिव
Arjunena yamabhyam cha tribhistairabhivaditah
Murdhni tansamupaghraya premnabhivada parthiva
124.17
दृष्ट्वा त्वां पाण्डवैर्वीरैर्भ्रातृभिः सह संगतम्
यावदानन्दजाश्रूणि प्रमुञ्चन्तु नराधिपाः
Drishtva tvam pandavairvirairbhratribhih saha sangatam
Yavadanandajashruni pramunchantu naradhipah
124.18
घुष्यतां राजधानीषु सर्वसंपन्महीक्षिताम्
पृथिवी भ्रातृभावेन भुज्यतां विज्वरो भव
Ghushyatam rajadhanishu sarvasampanmahikshitam
Prithivi bhratribhavena bhujyatam vijvaro bhava