Utshovঅধ্যায় 125
125.1
বৈশংপায়ন উবাচ
শ্রুত্বা দুর্যোধনো বাক্যমপ্রিয়ং কুরুসংসদি
প্রত্যুবাচ মহাবাহুং বাসুদেবং যশস্বিনম্
125.2
প্রসমীক্ষ্য ভবানেতদ্বক্তুমর্হতি কেশব
মামেব হি বিশেষেণ বিভাষ্য পরিগর্হসে
125.3
ভক্তিবাদেন পার্থানামকস্মান্মধুসূদন
ভবান্গর্হয়তে নিত্যং কিং সমীক্ষ্য বলাবলম্
125.4
ভবান্ক্ষত্তা চ রাজা চ আচার্যো বা পিতামহঃ
মামেব পরিগর্হন্তে নান্যং কংচন পার্থিবম্
125.5
ন চাহং লক্ষয়ে কংচিদ্ব্যভিচারমিহাত্মনঃ
অথ সর্বে ভবন্তো মাং বিদ্বিষন্তি সরাজকাঃ
125.6
ন চাহং কংচিদত্যর্থমপরাধমরিংদম
বিচিন্তয়ন্প্রপশ্যামি সুসূক্ষ্মমপি কেশব
125.7
প্রিয়াভ্যুপগতে দ্যূতে পাণ্ডবা মধুসূদন
জিতাঃ শকুনিনা রাজ্যং তত্র কিং মম দুষ্কৃতম্
125.8
যত্পুনর্দ্রবিণং কিংচিত্তত্রাজীয়ন্ত পাণ্ডবাঃ
তেভ্য এবাভ্যনুজ্ঞাতং তত্তদা মধুসূদন
125.9
অপরাধো ন চাস্মাকং যত্তে হ্যক্ষপরাজিতাঃ
অজেয়া জয়তাং শ্রেষ্ঠ পার্থাঃ প্রব্রাজিতা বনম্
125.10
কেন চাপ্যপবাদেন বিরুধ্যন্তেঽরিভিঃ সহ
অশক্তাঃ পাণ্ডবাঃ কৃষ্ণ প্রহৃষ্টাঃ প্রত্যমিত্রবৎ
125.11
কিমস্মাভিঃ কৃতং তেষাং কস্মিন্বা পুনরাগসি
ধার্তরাষ্ট্রাঞ্জিঘাংসন্তি পাণ্ডবাঃ সৃঞ্জয়ৈঃ সহ
125.12
ন চাপি বয়মুগ্রেণ কর্মণা বচনেন বা
বিত্রস্তাঃ প্রণমামেহ ভয়াদপি শতক্রতোঃ
125.13
ন চ তং কৃষ্ণ পশ্যামি ক্ষত্রধর্মমনুষ্ঠিতম্
উত্সহেত যুধা জেতুং যো নঃ শত্রুনিবর্হণ
125.14
ন হি ভীষ্মকৃপদ্রোণাঃ সগণা মধুসূদন
দেবৈরপি যুধা জেতুং শক্যাঃ কিমুত পাণ্ডবৈঃ
125.15
স্বধর্মমনুতিষ্ঠন্তো যদি মাধব সংয়ুগে
শস্ত্রেণ নিধনং কালে প্রাপ্স্যামঃ স্বর্গমেব তৎ
125.16
মুখ্যশ্চৈবৈষ নো ধর্মঃ ক্ষত্রিয়াণাং জনার্দন
যচ্ছয়ীমহি সংগ্রামে শরতল্পগতা বয়ম্
125.17
তে বয়ং বীরশয়নং প্রাপ্স্যামো যদি সংয়ুগে
অপ্রণম্যৈব শত্রূণাং ন নস্তপ্স্যতি মাধব
125.18
কশ্চ জাতু কুলে জাতঃ ক্ষত্রধর্মেণ বর্তয়ন্
ভয়াদ্বৃত্তিং সমীক্ষ্যৈবং প্রণমেদিহ কস্যচিৎ
125.19
উদ্যচ্ছেদেব ন নমেদুদ্যমো হ্যেব পৌরুষম্
অপ্যপর্বণি ভজ্যেত ন নমেদিহ কস্যচিৎ
125.20
ইতি মাতঙ্গবচনং পরীপ্সন্তি হিতেপ্সবঃ
ধর্মায় চৈব প্রণমেদ্ব্রাহ্মণেভ্যশ্চ মদ্বিধঃ
125.21
অচিন্তয়ন্কংচিদন্যং যাবজ্জীবং তথাচরেৎ
এষ ধর্মঃ ক্ষত্রিয়াণাং মতমেতচ্চ মে সদা
125.22
রাজ্যাংশশ্চাভ্যনুজ্ঞাতো যো মে পিত্রা পুরাভবৎ
ন স লভ্যঃ পুনর্জাতু ময়ি জীবতি কেশব
125.23
যাবচ্চ রাজা ধ্রিয়তে ধৃতরাষ্ট্রো জনার্দন
ন্যস্তশস্ত্রা বয়ং তে বাপ্যুপজীবাম মাধব
125.24
যদ্যদেয়ং পুরা দত্তং রাজ্যং পরবতো মম
অজ্ঞানাদ্বা ভয়াদ্বাপি ময়ি বালে জনার্দন
125.25
ন তদদ্য পুনর্লভ্যং পাণ্ডবৈর্বৃষ্ণিনন্দন
ধ্রিয়মাণে মহাবাহো ময়ি সংপ্রতি কেশব
125.26
যাবদ্ধি সূচ্যাস্তীক্ষ্ণায়া বিধ্যেদগ্রেণ মাধব
তাবদপ্যপরিত্যাজ্যং ভূমের্নঃ পাণ্ডবান্প্রতি