Utshovঅধ্যায় 126
126.1
বৈশংপায়ন উবাচ
ততঃ প্রহস্য দাশার্হঃ ক্রোধপর্যাকুলেক্ষণঃ
দুর্যোধনমিদং বাক্যমব্রবীত্কুরুসংসদি
126.2
লপ্স্যসে বীরশয়নং কামমেতদবাপ্স্যসি
স্থিরো ভব সহামাত্যো বিমর্দো ভবিতা মহান্
126.3
যচ্চৈবং মন্যসে মূঢ ন মে কশ্চিদ্ব্যতিক্রমঃ
পাণ্ডবেষ্বিতি তত্সর্বং নিবোধত নরাধিপাঃ
126.4
শ্রিয়া সংতপ্যমানেন পাণ্ডবানাং মহাত্মনাম্
ত্বয়া দুর্মন্ত্রিতং দ্যূতং সৌবলেন চ ভারত
126.5
কথং চ জ্ঞাতয়স্তাত শ্রেয়াংসঃ সাধুসংমতাঃ
তথান্যায্যমুপস্থাতুং জিহ্মেনাজিহ্মচারিণঃ
126.6
অক্ষদ্যূতং মহাপ্রাজ্ঞ সতামরতিনাশনম্
অসতাং তত্র জায়ন্তে ভেদাশ্চ ব্যসনানি চ
126.7
তদিদং ব্যসনং ঘোরং ত্বয়া দ্যূতমুখং কৃতম্
অসমীক্ষ্য সদাচারৈঃ সার্ধং পাপানুবন্ধনৈঃ
126.8
কশ্চান্যো জ্ঞাতিভার্যাং বৈ বিপ্রকর্তুং তথার্হতি
আনীয় চ সভাং বক্তুং যথোক্তা দ্রৌপদী ত্বয়া
126.9
কুলীনা শীলসংপন্না প্রাণেভ্যোঽপি গরীয়সী
মহিষী পাণ্ডুপুত্রাণাং তথা বিনিকৃতা ত্বয়া
126.10
জানন্তি কুরবঃ সর্বে যথোক্তাঃ কুরুসংসদি
দুঃশাসনেন কৌন্তেয়াঃ প্রব্রজন্তঃ পরংতপাঃ
126.11
সম্যগ্বৃত্তেষ্বলুব্ধেষু সততং ধর্মচারিষু
স্বেষু বন্ধুষু কঃ সাধুশ্চরেদেবমসাংপ্রতম্
126.12
নৃশংসানামনার্যাণাং পরুষাণাং চ ভাষণম্
কর্ণদুঃশাসনাভ্যাং চ ত্বয়া চ বহুশঃ কৃতম্
126.13
সহ মাত্রা প্রদগ্ধুং তান্বালকান্বারণাবতে
আস্থিতঃ পরমং যত্নং ন সমৃদ্ধং চ তত্তব
126.14
ঊষুশ্চ সুচিরং কালং প্রচ্ছন্নাঃ পাণ্ডবাস্তদা
মাত্রা সহৈকচক্রায়াং ব্রাহ্মণস্য নিবেশনে
126.15
বিষেণ সর্পবন্ধৈশ্চ যতিতাঃ পাণ্ডবাস্ত্বয়া
সর্বোপায়ৈর্বিনাশায় ন সমৃদ্ধং চ তত্তব
126.16
এবংবুদ্ধিঃ পাণ্ডবেষু মিথ্যাবৃত্তিঃ সদা ভবান্
কথং তে নাপরাধোঽস্তি পাণ্ডবেষু মহাত্মসু
126.17
কৃত্বা বহূন্যকার্যাণি পাণ্ডবেষু নৃশংসবৎ
মিথ্যাবৃত্তিরনার্যঃ সন্নদ্য বিপ্রতিপদ্যসে
126.18
মাতাপিতৃভ্যাং ভীষ্মেণ দ্রোণেন বিদুরেণ চ
শাম্যেতি মুহুরুক্তোঽসি ন চ শাম্যসি পার্থিব
126.19
শমে হি সুমহানর্থস্তব পার্থস্য চোভয়োঃ
ন চ রোচয়সে রাজন্কিমন্যদ্বুদ্ধিলাঘবাৎ
126.20
ন শর্ম প্রাপ্স্যসে রাজন্নুত্ক্রম্য সুহৃদাং বচঃ
অধর্ম্যময়শস্যং চ ক্রিয়তে পার্থিব ত্বয়া
126.21
এবং ব্রুবতি দাশার্হে দুর্যোধনমমর্ষণম্
দুঃশাসন ইদং বাক্যমব্রবীত্কুরুসংসদি
126.22
ন চেত্সংধাস্যসে রাজন্স্বেন কামেন পাণ্ডবৈঃ
বদ্ধ্বা কিল ত্বাং দাস্যন্তি কুন্তীপুত্রায় কৌরবাঃ
126.23
বৈকর্তনং ত্বাং চ মাং চ ত্রীনেতান্মনুজর্ষভ
পাণ্ডবেভ্যঃ প্রদাস্যন্তি ভীষ্মো দ্রোণঃ পিতা চ তে
126.24
ভ্রাতুরেতদ্বচঃ শ্রুত্বা ধার্তরাষ্ট্রঃ সুয়োধনঃ
ক্রুদ্ধঃ প্রাতিষ্ঠতোত্থায় মহানাগ ইব শ্বসন্
126.25
বিদুরং ধৃতরাষ্ট্রং চ মহারাজং চ বাহ্লিকম্
কৃপং চ সোমদত্তং চ ভীষ্মং দ্রোণং জনার্দনম্
126.26
সর্বানেতাননাদৃত্য দুর্মতির্নিরপত্রপঃ
অশিষ্টবদমর্যাদো মানী মান্যাবমানিতা
126.27
তং প্রস্থিতমভিপ্রেক্ষ্য ভ্রাতরো মনুজর্ষভম্
অনুজগ্মুঃ সহামাত্যা রাজানশ্চাপি সর্বশঃ
126.28
সভায়ামুত্থিতং ক্রুদ্ধং প্রস্থিতং ভ্রাতৃভিঃ সহ
দুর্যোধনমভিপ্রেক্ষ্য ভীষ্মঃ শাংতনবোঽব্রবীৎ
126.29
ধর্মার্থাবভিসংত্যজ্য সংরম্ভং যোঽনুমন্যতে
হসন্তি ব্যসনে তস্য দুর্হৃদো নচিরাদিব
126.30
দুরাত্মা রাজপুত্রোঽয়ং ধার্তরাষ্ট্রোঽনুপায়বিৎ
মিথ্যাভিমানী রাজ্যস্য ক্রোধলোভবশানুগঃ
126.31
কালপক্বমিদং মন্যে সর্বক্ষত্রং জনার্দন
সর্বে হ্যনুসৃতা মোহাত্পার্থিবাঃ সহ মন্ত্রিভিঃ
126.32
ভীষ্মস্যাথ বচঃ শ্রুত্বা দাশার্হঃ পুষ্করেক্ষণঃ
ভীষ্মদ্রোণমুখান্সর্বানভ্যভাষত বীর্যবান্
126.33
সর্বেষাং কুরুবৃদ্ধানাং মহানয়মতিক্রমঃ
প্রসহ্য মন্দমৈশ্বর্যে ন নিয়চ্ছত যন্নৃপম্
126.34
তত্র কার্যমহং মন্যে প্রাপ্তকালমরিংদমাঃ
ক্রিয়মাণে ভবেচ্ছ্রেয়স্তত্সর্বং শৃণুতানঘাঃ
126.35
প্রত্যক্ষমেতদ্ভবতাং যদ্বক্ষ্যামি হিতং বচঃ
ভবতামানুকূল্যেন যদি রোচেত ভারতাঃ
126.36
ভোজরাজস্য বৃদ্ধস্য দুরাচারো হ্যনাত্মবান্
জীবতঃ পিতুরৈশ্বর্যং হৃত্বা মন্যুবশং গতঃ
126.37
উগ্রসেনসুতঃ কংসঃ পরিত্যক্তঃ স বান্ধবৈঃ
জ্ঞাতীনাং হিতকামেন ময়া শস্তো মহামৃধে
126.38
আহুকঃ পুনরস্মাভির্জ্ঞাতিভিশ্চাপি সত্কৃতঃ
উগ্রসেনঃ কৃতো রাজা ভোজরাজন্যবর্ধনঃ
126.39
কংসমেকং পরিত্যজ্য কুলার্থে সর্বয়াদবাঃ
সংভূয় সুখমেধন্তে ভারতান্ধকবৃষ্ণয়ঃ
126.40
অপি চাপ্যবদদ্রাজন্পরমেষ্ঠী প্রজাপতিঃ
ব্যূঢে দেবাসুরে যুদ্ধেঽভ্যুদ্যতেষ্বায়ুধেষু চ
126.41
দ্বৈধীভূতেষু লোকেষু বিনশ্যত্সু চ ভারত
অব্রবীত্সৃষ্টিমান্দেবো ভগবাঁল্লোকভাবনঃ
126.42
পরাভবিষ্যন্ত্যসুরা দৈতেয়া দানবৈঃ সহ
আদিত্যা বসবো রুদ্রা ভবিষ্যন্তি দিবৌকসঃ
126.43
দেবাসুরমনুষ্যাশ্চ গন্ধর্বোরগরাক্ষসাঃ
অস্মিন্যুদ্ধে সুসংয়ত্তা হনিষ্যন্তি পরস্পরম্
126.44
ইতি মত্বাব্রবীদ্ধর্মং পরমেষ্ঠী প্রজাপতিঃ
বরুণায় প্রয়চ্ছৈতান্বদ্ধ্বা দৈতেয়দানবান্
126.45
এবমুক্তস্ততো ধর্মো নিয়োগাত্পরমেষ্ঠিনঃ
বরুণায় দদৌ সর্বান্বদ্ধ্বা দৈতেয়দানবান্
126.46
তান্বদ্ধ্বা ধর্মপাশৈশ্চ স্বৈশ্চ পাশৈর্জলেশ্বরঃ
বরুণঃ সাগরে যত্তো নিত্যং রক্ষতি দানবান্
126.47
তথা দুর্যোধনং কর্ণং শকুনিং চাপি সৌবলম্
বদ্ধ্বা দুঃশাসনং চাপি পাণ্ডবেভ্যঃ প্রয়চ্ছত
126.48
ত্যজেত্কুলার্থে পুরুষং গ্রামস্যার্থে কুলং ত্যজেৎ
গ্রামং জনপদস্যার্থে আত্মার্থে পৃথিবীং ত্যজেৎ
126.49
রাজন্দুর্যোধনং বদ্ধ্বা ততঃ সংশাম্য পাণ্ডবৈঃ
ত্বত্কৃতে ন বিনশ্যেয়ুঃ ক্ষত্রিয়াঃ ক্ষত্রিয়র্ষভ