Utshovঅধ্যায় 127
127.1
বৈশংপায়ন উবাচ
কৃষ্ণস্য বচনং শ্রুত্বা ধৃতরাষ্ট্রো জনেশ্বরঃ
বিদুরং সর্বধর্মজ্ঞং ত্বরমাণোঽভ্যভাষত
127.2
গচ্ছ তাত মহাপ্রাজ্ঞাং গান্ধারীং দীর্ঘদর্শিনীম্
আনয়েহ তয়া সার্ধমনুনেষ্যামি দুর্মতিম্
127.3
যদি সাপি দুরাত্মানং শময়েদ্দুষ্টচেতসম্
অপি কৃষ্ণস্য সুহৃদস্তিষ্ঠেম বচনে বয়ম্
127.4
অপি লোভাভিভূতস্য পন্থানমনুদর্শয়েৎ
দুর্বুদ্ধের্দুঃসহায়স্য সমর্থং ব্রুবতী বচঃ
127.5
অপি নো ব্যসনং ঘোরং দুর্যোধনকৃতং মহৎ
শময়েচ্চিররাত্রায় যোগক্ষেমবদব্যয়ম্
127.6
রাজ্ঞস্তু বচনং শ্রুত্বা বিদুরো দীর্ঘদর্শিনীম্
আনয়ামাস গান্ধারীং ধৃতরাষ্ট্রস্য শাসনাৎ
127.7
ধৃতরাষ্ট্র উবাচ
এষ গান্ধারি পুত্রস্তে দুরাত্মা শাসনাতিগঃ
ঐশ্বর্যলোভাদৈশ্বর্যং জীবিতং চ প্রহাস্যতি
127.8
অশিষ্টবদমর্যাদঃ পাপৈঃ সহ দুরাত্মভিঃ
সভায়া নির্গতো মূঢো ব্যতিক্রম্য সুহৃদ্বচঃ
127.9
বৈশংপায়ন উবাচ
সা ভর্তুর্বচনং শ্রুত্বা রাজপুত্রী যশস্বিনী
অন্বিচ্ছন্তী মহচ্ছ্রেয়ো গান্ধারী বাক্যমব্রবীৎ
127.10
আনয়েহ সুতং ক্ষিপ্রং রাজ্যকামুকমাতুরম্
ন হি রাজ্যমশিষ্টেন শক্যং ধর্মার্থলোপিনা
127.11
ত্বং হ্যেবাত্র ভৃশং গর্হ্যো ধৃতরাষ্ট্র সুতপ্রিয়ঃ
যো জানন্পাপতামস্য তত্প্রজ্ঞামনুবর্তসে
127.12
স এষ কামমন্যুভ্যাং প্রলব্ধো মোহমাস্থিতঃ
অশক্যোঽদ্য ত্বয়া রাজন্বিনিবর্তয়িতুং বলাৎ
127.13
রাজ্যপ্রদানে মূঢস্য বালিশস্য দুরাত্মনঃ
দুঃসহায়স্য লুব্ধস্য ধৃতরাষ্ট্রোঽশ্নুতে ফলম্
127.14
কথং হি স্বজনে ভেদমুপেক্ষেত মহামতিঃ
ভিন্নং হি স্বজনেন ত্বাং প্রসহিষ্যন্তি শত্রবঃ
127.15
যা হি শক্যা মহারাজ সাম্না দানেন বা পুনঃ
নিস্তর্তুমাপদঃ স্বেষু দণ্ডং কস্তত্র পাতয়েৎ
127.16
শাসনাদ্ধৃতরাষ্ট্রস্য দুর্যোধনমমর্ষণম্
মাতুশ্চ বচনাত্ক্ষত্তা সভাং প্রাবেশয়ত্পুনঃ
127.17
স মাতুর্বচনাকাঙ্ক্ষী প্রবিবেশ সভাং পুনঃ
অভিতাম্রেক্ষণঃ ক্রোধান্নিঃশ্বসন্নিব পন্নগঃ
127.18
তং প্রবিষ্টমভিপ্রেক্ষ্য পুত্রমুত্পথমাস্থিতম্
বিগর্হমাণা গান্ধারী সমর্থং বাক্যমব্রবীৎ
127.19
দুর্যোধন নিবোধেদং বচনং মম পুত্রক
হিতং তে সানুবন্ধস্য তথায়ত্যাং সুখোদয়ম্
127.20
ভীষ্মস্য তু পিতুশ্চৈব মম চাপচিতিঃ কৃতা
ভবেদ্দ্রোণমুখানাং চ সুহৃদাং শাম্যতা ত্বয়া
127.21
ন হি রাজ্যং মহাপ্রাজ্ঞ স্বেন কামেন শক্যতে
অবাপ্তুং রক্ষিতুং বাপি ভোক্তুং বা ভরতর্ষভ
127.22
ন হ্যবশ্যেন্দ্রিয়ো রাজ্যমশ্নীয়াদ্দীর্ঘমন্তরম্
বিজিতাত্মা তু মেধাবী স রাজ্যমভিপালয়েৎ
127.23
কামক্রোধৌ হি পুরুষমর্থেভ্যো ব্যপকর্ষতঃ
তৌ তু শত্রূ বিনির্জিত্য রাজা বিজয়তে মহীম্
127.24
লোকেশ্বরপ্রভুত্বং হি মহদেতদ্দুরাত্মভিঃ
রাজ্যং নামেপ্সিতং স্থানং ন শক্যমভিরক্ষিতুম্
127.25
ইন্দ্রিয়াণি মহত্প্রেপ্সুর্নিয়চ্ছেদর্থধর্ময়োঃ
ইন্দ্রিয়ৈর্নিয়তৈর্বুদ্ধির্বর্ধতেঽগ্নিরিবেন্ধনৈঃ
127.26
অবিধেয়ানি হীমানি ব্যাপাদয়িতুমপ্যলম্
অবিধেয়া ইবাদান্তা হয়াঃ পথি কুসারথিম্
127.27
অবিজিত্য য আত্মানমমাত্যান্বিজিগীষতে
অজিতাত্মাজিতামাত্যঃ সোঽবশঃ পরিহীয়তে
127.28
আত্মানমেব প্রথমং দেশরূপেণ যো জয়েৎ
ততোঽমাত্যানমিত্রাংশ্চ ন মোঘং বিজিগীষতে
127.29
বশ্যেন্দ্রিয়ং জিতামাত্যং ধৃতদণ্ডং বিকারিষু
পরীক্ষ্যকারিণং ধীরমত্যন্তং শ্রীর্নিষেবতে
127.30
ক্ষুদ্রাক্ষেণেব জালেন ঝষাবপিহিতাবুভৌ
কামক্রোধৌ শরীরস্থৌ প্রজ্ঞানং তৌ বিলুম্পতঃ
127.31
যাভ্যাং হি দেবাঃ স্বর্যাতুঃ স্বর্গস্যাপিদধুর্মুখম্
বিভ্যতোঽনুপরাগস্য কামক্রোধৌ স্ম বর্ধিতৌ
127.32
কামং ক্রোধং চ লোভং চ দম্ভং দর্পং চ ভূমিপঃ
সম্যগ্বিজেতুং যো বেদ স মহীমভিজায়তে
127.33
সততং নিগ্রহে যুক্ত ইন্দ্রিয়াণাং ভবেন্নৃপঃ
ঈপ্সন্নর্থং চ ধর্মং চ দ্বিষতাং চ পরাভবম্
127.34
কামাভিভূতঃ ক্রোধাদ্বা যো মিথ্যা প্রতিপদ্যতে
স্বেষু চান্যেষু বা তস্য ন সহায়া ভবন্ত্যুত
127.35
একীভূতৈর্মহাপ্রাজ্ঞৈঃ শূরৈররিনিবর্হণৈঃ
পাণ্ডবৈঃ পৃথিবীং তাত ভোক্ষ্যসে সহিতঃ সুখী
127.36
যথা ভীষ্মঃ শাংতনবো দ্রোণশ্চাপি মহারথঃ
আহতুস্তাত তত্সত্যমজেয়ৌ কৃষ্ণপাণ্ডবৌ
127.37
প্রপদ্যস্ব মহাবাহুং কৃষ্ণমক্লিষ্টকারিণম্
প্রসন্নো হি সুখায় স্যাদুভয়োরেব কেশবঃ
127.38
সুহৃদামর্থকামানাং যো ন তিষ্ঠতি শাসনে
প্রাজ্ঞানাং কৃতবিদ্যানাং স নরঃ শত্রুনন্দনঃ
127.39
ন যুদ্ধে তাত কল্যাণং ন ধর্মার্থৌ কুতঃ সুখম্
ন চাপি বিজয়ো নিত্যং মা যুদ্ধে চেত আধিথাঃ
127.40
ভীষ্মেণ হি মহাপ্রাজ্ঞ পিত্রা তে বাহ্লিকেন চ
দত্তোংঽশঃ পাণ্ডুপুত্রাণাং ভেদাদ্ভীতৈররিংদম
127.41
তস্য চৈতত্প্রদানস্য ফলমদ্যানুপশ্যসি
যদ্ভুঙ্ক্ষে পৃথিবীং সর্বাং শূরৈর্নিহতকণ্টকাম্
127.42
প্রয়চ্ছ পাণ্ডুপুত্রাণাং যথোচিতমরিংদম
যদীচ্ছসি সহামাত্যো ভোক্তুমর্ধং মহীক্ষিতাম্
127.43
অলমর্ধং পৃথিব্যাস্তে সহামাত্যস্য জীবনম্
সুহৃদাং বচনে তিষ্ঠন্যশঃ প্রাপ্স্যসি ভারত
127.44
শ্রীমদ্ভিরাত্মবদ্ভির্হি বুদ্ধিমদ্ভির্জিতেন্দ্রিয়ৈঃ
পাণ্ডবৈর্বিগ্রহস্তাত ভ্রংশয়েন্মহতঃ সুখাৎ
127.45
নিগৃহ্য সুহৃদাং মন্যুং শাধি রাজ্যং যথোচিতম্
স্বমংশং পাণ্ডুপুত্রেভ্যঃ প্রদায় ভরতর্ষভ
127.46
অলমহ্না নিকারোঽয়ং ত্রয়োদশ সমাঃ কৃতঃ
শময়ৈনং মহাপ্রাজ্ঞ কামক্রোধসমেধিতম্
127.47
ন চৈষ শক্তঃ পার্থানাং যস্ত্বদর্থমভীপ্সতি
সূতপুত্রো দৃঢক্রোধো ভ্রাতা দুঃশাসনশ্চ তে
127.48
ভীষ্মে দ্রোণে কৃপে কর্ণে ভীমসেনে ধনংজয়ে
ধৃষ্টদ্যুম্নে চ সংক্রুদ্ধে ন স্যুঃ সর্বাঃ প্রজা ধ্রুবম্
127.49
অমর্ষবশমাপন্নো মা কুরূংস্তাত জীঘনঃ
সর্বা হি পৃথিবী স্পৃষ্টা ত্বত্পাণ্ডবকৃতে বধম্
127.50
যচ্চ ত্বং মন্যসে মূঢ ভীষ্মদ্রোণকৃপাদয়ঃ
যোত্স্যন্তে সর্বশক্ত্যেতি নৈতদদ্যোপপদ্যতে
127.51
সমং হি রাজ্যং প্রীতিশ্চ স্থানং চ বিজিতাত্মনাম্
পাণ্ডবেষ্বথ যুষ্মাসু ধর্মস্ত্বভ্যধিকস্ততঃ
127.52
রাজপিণ্ডভয়াদেতে যদি হাস্যন্তি জীবিতম্
ন হি শক্ষ্যন্তি রাজানং যুধিষ্ঠিরমুদীক্ষিতুম্
127.53
ন লোভাদর্থসংপত্তির্নরাণামিহ দৃশ্যতে
তদলং তাত লোভেন প্রশাম্য ভরতর্ষভ