Utshovঅধ্যায় 128
128.1
বৈশংপায়ন উবাচ
তত্তু বাক্যমনাদৃত্য সোঽর্থবন্মাতৃভাষিতম্
পুনঃ প্রতস্থে সংরম্ভাত্সকাশমকৃতাত্মনাম্
128.2
ততঃ সভায়া নির্গম্য মন্ত্রয়ামাস কৌরবঃ
সৌবলেন মতাক্ষেণ রাজ্ঞা শকুনিনা সহ
128.3
দুর্যোধনস্য কর্ণস্য শকুনেঃ সৌবলস্য চ
দুঃশাসনচতুর্থানামিদমাসীদ্বিচেষ্টিতম্
128.4
পুরায়মস্মান্গৃহ্ণাতি ক্ষিপ্রকারী জনার্দনঃ
সহিতো ধৃতরাষ্ট্রেণ রাজ্ঞা শাংতনবেন চ
128.5
বয়মেব হৃষীকেশং নিগৃহ্ণীম বলাদিব
প্রসহ্য পুরুষব্যাঘ্রমিন্দ্রো বৈরোচনিং যথা
128.6
শ্রুত্বা গৃহীতং বার্ষ্ণেয়ং পাণ্ডবা হতচেতসঃ
নিরুত্সাহা ভবিষ্যন্তি ভগ্নদংষ্ট্রা ইবোরগাঃ
128.7
অয়ং হ্যেষাং মহাবাহুঃ সর্বেষাং শর্ম বর্ম চ
অস্মিন্গৃহীতে বরদে ঋষভে সর্বসাত্বতাম্
নিরুদ্যমা ভবিষ্যন্তি পাণ্ডবাঃ সোমকৈঃ সহ
128.8
তস্মাদ্বয়মিহৈবৈনং কেশবং ক্ষিপ্রকারিণম্
ক্রোশতো ধৃতরাষ্ট্রস্য বদ্ধ্বা যোত্স্যামহে রিপূন্
128.9
তেষাং পাপমভিপ্রায়ং পাপানাং দুষ্টচেতসাম্
ইঙ্গিতজ্ঞঃ কবিঃ ক্ষিপ্রমন্ববুধ্যত সাত্যকিঃ
128.10
তদর্থমভিনিষ্ক্রম্য হার্দিক্যেন সহাস্থিতঃ
অব্রবীত্কৃতবর্মাণং ক্ষিপ্রং যোজয় বাহিনীম্
128.11
ব্যূঢানীকঃ সভাদ্বারমুপতিষ্ঠস্ব দংশিতঃ
যাবদাখ্যাম্যহং চৈতত্কৃষ্ণায়াক্লিষ্টকর্মণে
128.12
স প্রবিশ্য সভাং বীরঃ সিংহো গিরিগুহামিব
আচষ্ট তমভিপ্রায়ং কেশবায় মহাত্মনে
128.13
ধৃতরাষ্ট্রং ততশ্চৈব বিদুরং চান্বভাষত
তেষামেতমভিপ্রায়মাচচক্ষে স্ময়ন্নিব
128.14
ধর্মাদপেতমর্থাচ্চ কর্ম সাধুবিগর্হিতম্
মন্দাঃ কর্তুমিহেচ্ছন্তি ন চাবাপ্যং কথংচন
128.15
পুরা বিকুর্বতে মূঢাঃ পাপাত্মানঃ সমাগতাঃ
ধর্ষিতাঃ কামমন্যুভ্যাং ক্রোধলোভবশানুগাঃ
128.16
ইমং হি পুণ্ডরীকাক্ষং জিঘৃক্ষন্ত্যল্পচেতসঃ
পটেনাগ্নিং প্রজ্বলিতং যথা বালা যথা জডাঃ
128.17
সাত্যকেস্তদ্বচঃ শ্রুত্বা বিদুরো দীর্ঘদর্শিবান্
ধৃতরাষ্ট্রং মহাবাহুমব্রবীত্কুরুসংসদি
128.18
রাজন্পরীতকালাস্তে পুত্রাঃ সর্বে পরংতপ
অয়শস্যমশক্যং চ কর্ম কর্তুং সমুদ্যতাঃ
128.19
ইমং হি পুণ্ডরীকাক্ষমভিভূয় প্রসহ্য চ
নিগ্রহীতুং কিলেচ্ছন্তি সহিতা বাসবানুজম্
128.20
ইমং পুরুষশার্দূলমপ্রধৃষ্যং দুরাসদম্
আসাদ্য ন ভবিষ্যন্তি পতংগা ইব পাবকম্
128.21
অয়মিচ্ছন্হি তান্সর্বান্যতমানাঞ্জনার্দনঃ
সিংহো মৃগানিব ক্রুদ্ধো গময়েদ্যমসাদনম্
128.22
ন ত্বয়ং নিন্দিতং কর্ম কুর্যাত্কৃষ্ণঃ কথংচন
ন চ ধর্মাদপক্রামেদচ্যুতঃ পুরুষোত্তমঃ
128.23
বিদুরেণৈবমুক্তে তু কেশবো বাক্যমব্রবীৎ
ধৃতরাষ্ট্রমভিপ্রেক্ষ্য সুহৃদাং শৃণ্বতাং মিথঃ
128.24
রাজন্নেতে যদি ক্রুদ্ধা মাং নিগৃহ্ণীয়ুরোজসা
এতে বা মামহং বৈনাননুজানীহি পার্থিব
128.25
এতান্হি সর্বান্সংরব্ধান্নিয়ন্তুমহমুত্সহে
ন ত্বহং নিন্দিতং কর্ম কুর্যাং পাপং কথংচন
128.26
পাণ্ডবার্থে হি লুভ্যন্তঃ স্বার্থাদ্ধাস্যন্তি তে সুতাঃ
এতে চেদেবমিচ্ছন্তি কৃতকার্যো যুধিষ্ঠিরঃ
128.27
অদ্যৈব হ্যহমেতাংশ্চ যে চৈতাননু ভারত
নিগৃহ্য রাজন্পার্থেভ্যো দদ্যাং কিং দুষ্কৃতং ভবেৎ
128.28
ইদং তু ন প্রবর্তেয়ং নিন্দিতং কর্ম ভারত
সংনিধৌ তে মহারাজ ক্রোধজং পাপবুদ্ধিজম্
128.29
এষ দুর্যোধনো রাজন্যথেচ্ছতি তথাস্তু তৎ
অহং তু সর্বান্সময়াননুজানামি ভারত
128.30
এতচ্ছ্রুত্বা তু বিদুরং ধৃতরাষ্ট্রোঽভ্যভাষত
ক্ষিপ্রমানয় তং পাপং রাজ্যলুব্ধং সুয়োধনম্
128.31
সহমিত্রং সহামাত্যং সসোদর্যং সহানুগম্
শক্নুয়াং যদি পন্থানমবতারয়িতুং পুনঃ
128.32
ততো দুর্যোধনং ক্ষত্তা পুনঃ প্রাবেশয়ত্সভাম্
অকামং ভ্রাতৃভিঃ সার্ধং রাজভিঃ পরিবারিতম্
128.33
অথ দুর্যোধনং রাজা ধৃতরাষ্ট্রোঽভ্যভাষত
কর্ণদুঃশাসনাভ্যাং চ রাজভিশ্চাভিসংবৃতম্
128.34
নৃশংস পাপভূয়িষ্ঠ ক্ষুদ্রকর্মসহায়বান্
পাপৈঃ সহায়ৈঃ সংহত্য পাপং কর্ম চিকীর্ষসি
128.35
অশক্যময়শস্যং চ সদ্ভিশ্চাপি বিগর্হিতম্
যথা ত্বাদৃশকো মূঢো ব্যবস্যেত্কুলপাংসনঃ
128.36
ত্বমিমং পুণ্ডরীকাক্ষমপ্রধৃষ্যং দুরাসদম্
পাপৈঃ সহায়ৈঃ সংহত্য নিগ্রহীতুং কিলেচ্ছসি
128.37
যো ন শক্যো বলাত্কর্তুং দেবৈরপি সবাসবৈঃ
তং ত্বং প্রার্থয়সে মন্দ বালশ্চন্দ্রমসং যথা
128.38
দেবৈর্মনুষ্যৈর্গন্ধর্বৈরসুরৈরুরগৈশ্চ যঃ
ন সোঢুং সমরে শক্যস্তং ন বুধ্যসি কেশবম্
128.39
দুর্গ্রহঃ পাণিনা বায়ুর্দুঃস্পর্শঃ পাণিনা শশী
দুর্ধরা পৃথিবী মূর্ধ্না দুর্গ্রহঃ কেশবো বলাৎ
128.40
ইত্যুক্তে ধৃতরাষ্ট্রেণ ক্ষত্তাপি বিদুরোঽব্রবীৎ
দুর্যোধনমভিপ্রেক্ষ্য ধার্তরাষ্ট্রমমর্ষণম্
128.41
সৌভদ্বারে বানরেন্দ্রো দ্বিবিদো নাম নামতঃ
শিলাবর্ষেণ মহতা ছাদয়ামাস কেশবম্
128.42
গ্রহীতুকামো বিক্রম্য সর্বয়ত্নেন মাধবম্
গ্রহীতুং নাশকত্তত্র তং ত্বং প্রার্থয়সে বলাৎ
128.43
নির্মোচনে ষট্সহস্রাঃ পাশৈর্বদ্ধ্বা মহাসুরাঃ
গ্রহীতুং নাশকংশ্চৈনং তং ত্বং প্রার্থয়সে বলাৎ
128.44
প্রাগ্জ্যোতিষগতং শৌরিং নরকঃ সহ দানবৈঃ
গ্রহীতুং নাশকত্তত্র তং ত্বং প্রার্থয়সে বলাৎ
128.45
অনেন হি হতা বাল্যে পূতনা শিশুনা তথা
গোবর্ধনো ধারিতশ্চ গবার্থে ভরতর্ষভ
128.46
অরিষ্টো ধেনুকশ্চৈব চাণূরশ্চ মহাবলঃ
অশ্বরাজশ্চ নিহতঃ কংসশ্চারিষ্টমাচরন্
128.47
জরাসংধশ্চ বক্রশ্চ শিশুপালশ্চ বীর্যবান্
বাণশ্চ নিহতঃ সংখ্যে রাজানশ্চ নিষূদিতাঃ
128.48
বরুণো নির্জিতো রাজা পাবকশ্চামিতৌজসা
পারিজাতং চ হরতা জিতঃ সাক্ষাচ্ছচীপতিঃ
128.49
একার্ণবে শয়ানেন হতৌ তৌ মধুকৈটভৌ
জন্মান্তরমুপাগম্য হয়গ্রীবস্তথা হতঃ
128.50
অয়ং কর্তা ন ক্রিয়তে কারণং চাপি পৌরুষে
যদ্যদিচ্ছেদয়ং শৌরিস্তত্তত্কুর্যাদয়ত্নতঃ
128.51
তং ন বুধ্যসি গোবিন্দং ঘোরবিক্রমমচ্যুতম্
আশীবিষমিব ক্রুদ্ধং তেজোরাশিমনির্জিতম্
128.52
প্রধর্ষয়ন্মহাবাহুং কৃষ্ণমক্লিষ্টকারিণম্
পতংগোঽগ্নিমিবাসাদ্য সামাত্যো ন ভবিষ্যসি