Utshovঅধ্যায় 129
129.1
বৈশংপায়ন উবাচ
বিদুরেণৈবমুক্তে তু কেশবঃ শত্রুপূগহা
দুর্যোধনং ধার্তরাষ্ট্রমভ্যভাষত বীর্যবান্
129.2
একোঽহমিতি যন্মোহান্মন্যসে মাং সুয়োধন
পরিভূয় চ দুর্বুদ্ধে গ্রহীতুং মাং চিকীর্ষসি
129.3
ইহৈব পাণ্ডবাঃ সর্বে তথৈবান্ধকবৃষ্ণয়ঃ
ইহাদিত্যাশ্চ রুদ্রাশ্চ বসবশ্চ মহর্ষিভিঃ
129.4
এবমুক্ত্বা জহাসোচ্চৈঃ কেশবঃ পরবীরহা
তস্য সংস্ময়তঃ শৌরের্বিদ্যুদ্রূপা মহাত্মনঃ
অঙ্গুষ্ঠমাত্রাস্ত্রিদশা মুমুচুঃ পাবকার্চিষঃ
129.5
তস্য ব্রহ্মা ললাটস্থো রুদ্রো বক্ষসি চাভবৎ
লোকপালা ভুজেষ্বাসন্নগ্নিরাস্যাদজায়ত
129.6
আদিত্যাশ্চৈব সাধ্যাশ্চ বসবোঽথাশ্বিনাবপি
মরুতশ্চ সহেন্দ্রেণ বিশ্বেদেবাস্তথৈব চ
বভূবুশ্চৈব রূপাণি যক্ষগন্ধর্বরক্ষসাম্
129.7
প্রাদুরাস্তাং তথা দোর্ভ্যাং সংকর্ষণধনংজয়ৌ
দক্ষিণেঽথার্জুনো ধন্বী হলী রামশ্চ সব্যতঃ
129.8
ভীমো যুধিষ্ঠিরশ্চৈব মাদ্রীপুত্রৌ চ পৃষ্ঠতঃ
অন্ধকা বৃষ্ণয়শ্চৈব প্রদ্যুম্নপ্রমুখাস্ততঃ
129.9
অগ্রে বভূবুঃ কৃষ্ণস্য সমুদ্যতমহায়ুধাঃ
শঙ্খচক্রগদাশক্তিশার্ঙ্গলাঙ্গলনন্দকাঃ
129.10
অদৃশ্যন্তোদ্যতান্যেব সর্বপ্রহরণানি চ
নানাবাহুষু কৃষ্ণস্য দীপ্যমানানি সর্বশঃ
129.11
নেত্রাভ্যাং নস্ততশ্চৈব শ্রোত্রাভ্যাং চ সমন্ততঃ
প্রাদুরাসন্মহারৌদ্রাঃ সধূমাঃ পাবকার্চিষঃ
রোমকূপেষু চ তথা সূর্যস্যেব মরীচয়ঃ
129.12
তং দৃষ্ট্বা ঘোরমাত্মানং কেশবস্য মহাত্মনঃ
ন্যমীলয়ন্ত নেত্রাণি রাজানস্ত্রস্তচেতসঃ
129.13
ঋতে দ্রোণং চ ভীষ্মং চ বিদুরং চ মহামতিম্
সংজয়ং চ মহাভাগমৃষীংশ্চৈব তপোধনান্
প্রাদাত্তেষাং স ভগবান্দিব্যং চক্ষুর্জনার্দনঃ
129.14
তদ্দৃষ্ট্বা মহদাশ্চর্যং মাধবস্য সভাতলে
দেবদুন্দুভয়ো নেদুঃ পুষ্পবর্ষং পপাত চ
129.15
চচাল চ মহী কৃত্স্না সাগরশ্চাপি চুক্ষুভে
বিস্ময়ং পরমং জগ্মুঃ পার্থিবা ভরতর্ষভ
129.16
ততঃ স পুরুষব্যাঘ্রঃ সংজহার বপুঃ স্বকম্
তাং দিব্যামদ্ভুতাং চিত্রামৃদ্ধিমত্তামরিংদমঃ
129.17
ততঃ সাত্যকিমাদায় পাণৌ হার্দিক্যমেব চ
ঋষিভিস্তৈরনুজ্ঞাতো নির্যয়ৌ মধুসূদনঃ
129.18
ঋষয়োঽন্তর্হিতা জগ্মুস্ততস্তে নারদাদয়ঃ
তস্মিন্কোলাহলে বৃত্তে তদদ্ভুতমভূত্তদা
129.19
তং প্রস্থিতমভিপ্রেক্ষ্য কৌরবাঃ সহ রাজভিঃ
অনুজগ্মুর্নরব্যাঘ্রং দেবা ইব শতক্রতুম্
129.20
অচিন্তয়ন্নমেয়াত্মা সর্বং তদ্রাজমণ্ডলম্
নিশ্চক্রাম ততঃ শৌরিঃ সধূম ইব পাবকঃ
129.21
ততো রথেন শুভ্রেণ মহতা কিঙ্কিণীকিনা
হেমজালবিচিত্রেণ লঘুনা মেঘনাদিনা
129.22
সূপস্করেণ শুভ্রেণ বৈয়াঘ্রেণ বরূথিনা
সৈন্যসুগ্রীবয়ুক্তেন প্রত্যদৃশ্যত দারুকঃ
129.23
তথৈব রথমাস্থায় কৃতবর্মা মহারথঃ
বৃষ্ণীনাং সংমতো বীরো হার্দিক্যঃ প্রত্যদৃশ্যত
129.24
উপস্থিতরথং শৌরিং প্রয়াস্যন্তমরিংদমম্
ধৃতরাষ্ট্রো মহারাজঃ পুনরেবাভ্যভাষত
129.25
যাবদ্বলং মে পুত্রেষু পশ্যস্যেতজ্জনার্দন
প্রত্যক্ষং তে ন তে কিংচিত্পরোক্ষং শত্রুকর্শন
129.26
কুরূণাং শমমিচ্ছন্তং যতমানং চ কেশব
বিদিত্বৈতামবস্থাং মে নাতিশঙ্কিতুমর্হসি
129.27
ন মে পাপোঽস্ত্যভিপ্রায়ঃ পাণ্ডবান্প্রতি কেশব
জ্ঞাতমেব হি তে বাক্যং যন্ময়োক্তঃ সুয়োধনঃ
129.28
জানন্তি কুরবঃ সর্বে রাজানশ্চৈব পার্থিবাঃ
শমে প্রয়তমানং মাং সর্বয়ত্নেন মাধব
129.29
ততোঽব্রবীন্মহাবাহুর্ধৃতরাষ্ট্রং জনেশ্বরম্
দ্রোণং পিতামহং ভীষ্মং ক্ষত্তারং বাহ্লিকং কৃপম্
129.30
প্রত্যক্ষমেতদ্ভবতাং যদ্বৃত্তং কুরুসংসদি
যথা চাশিষ্টবন্মন্দো রোষাদসকৃদুত্থিতঃ
129.31
বদত্যনীশমাত্মানং ধৃতরাষ্ট্রো মহীপতিঃ
আপৃচ্ছে ভবতঃ সর্বান্গমিষ্যামি যুধিষ্ঠিরম্
129.32
আমন্ত্র্য প্রস্থিতং শৌরিং রথস্থং পুরুষর্ষভম্
অনুজগ্মুর্মহেষ্বাসাঃ প্রবীরা ভরতর্ষভাঃ
129.33
ভীষ্মো দ্রোণঃ কৃপঃ ক্ষত্তা ধৃতরাষ্ট্রোঽথ বাহ্লিকঃ
অশ্বত্থামা বিকর্ণশ্চ যুয়ুত্সুশ্চ মহারথঃ
129.34
ততো রথেন শুভ্রেণ মহতা কিঙ্কিণীকিনা
কুরূণাং পশ্যতাং প্রায়াত্পৃথাং দ্রষ্টুং পিতৃষ্বসাম্