Utshovঅধ্যায় 130
130.1
বৈশংপায়ন উবাচ
প্রবিশ্যাথ গৃহং তস্যাশ্চরণাবভিবাদ্য চ
আচখ্যৌ তত্সমাসেন যদ্বৃত্তং কুরুসংসদি
130.2
বাসুদেব উবাচ
উক্তং বহুবিধং বাক্যং গ্রহণীয়ং সহেতুকম্
ঋষিভিশ্চ ময়া চৈব ন চাসৌ তদ্গৃহীতবান্
130.3
কালপক্বমিদং সর্বং দুর্যোধনবশানুগম্
আপৃচ্ছে ভবতীং শীঘ্রং প্রয়াস্যে পাণ্ডবান্প্রতি
130.4
কিং বাচ্যাঃ পাণ্ডবেয়াস্তে ভবত্যা বচনান্ময়া
তদ্ব্রূহি ত্বং মহাপ্রাজ্ঞে শুশ্রূষে বচনং তব
130.5
কুন্ত্যুবাচ
ব্রূয়াঃ কেশব রাজানং ধর্মাত্মানং যুধিষ্ঠিরম্
ভূয়াংস্তে হীয়তে ধর্মো মা পুত্রক বৃথা কৃথাঃ
130.6
শ্রোত্রিয়স্যেব তে রাজন্মন্দকস্যাবিপশ্চিতঃ
অনুবাকহতা বুদ্ধির্ধর্মমেবৈকমীক্ষতে
130.7
অঙ্গাবেক্ষস্ব ধর্মং ত্বং যথা সৃষ্টঃ স্বয়ংভুবা
উরস্তঃ ক্ষত্রিয়ঃ সৃষ্টো বাহুবীর্যোপজীবিতা
ক্রূরায় কর্মণে নিত্যং প্রজানাং পরিপালনে
130.8
শৃণু চাত্রোপমামেকাং যা বৃদ্ধেভ্যঃ শ্রুতা ময়া
মুচুকুন্দস্য রাজর্ষেরদদাত্পৃথিবীমিমাম্
পুরা বৈশ্রবণঃ প্রীতো ন চাসৌ তাং গৃহীতবান্
130.9
বাহুবীর্যার্জিতং রাজ্যমশ্নীয়ামিতি কাময়ে
ততো বৈশ্রবণঃ প্রীতো বিস্মিতঃ সমপদ্যত
130.10
মুচুকুন্দস্ততো রাজা সোঽন্বশাসদ্বসুংধরাম্
বাহুবীর্যার্জিতাং সম্যক্ক্ষত্রধর্মমনুব্রতঃ
130.11
যং হি ধর্মং চরন্তীহ প্রজা রাজ্ঞা সুরক্ষিতাঃ
চতুর্থং তস্য ধর্মস্য রাজা ভারত বিন্দতি
130.12
রাজা চরতি চেদ্ধর্মং দেবত্বায়ৈব কল্পতে
স চেদধর্মং চরতি নরকায়ৈব গচ্ছতি
130.13
দণ্ডনীতিঃ স্বধর্মেণ চাতুর্বর্ণ্যং নিয়চ্ছতি
প্রয়ুক্তা স্বামিনা সম্যগধর্মেভ্যশ্চ যচ্ছতি
130.14
দণ্ডনীত্যাং যদা রাজা সম্যক্কার্ত্স্ন্যেন বর্ততে
তদা কৃতয়ুগং নাম কালঃ শ্রেষ্ঠঃ প্রবর্ততে
130.15
কালো বা কারণং রাজ্ঞো রাজা বা কালকারণম্
ইতি তে সংশয়ো মা ভূদ্রাজা কালস্য কারণম্
130.16
রাজা কৃতয়ুগস্রষ্টা ত্রেতায়া দ্বাপরস্য চ
যুগস্য চ চতুর্থস্য রাজা ভবতি কারণম্
130.17
কৃতস্য কারণাদ্রাজা স্বর্গমত্যন্তমশ্নুতে
ত্রেতায়াঃ কারণাদ্রাজা স্বর্গং নাত্যন্তমশ্নুতে
প্রবর্তনাদ্দ্বাপরস্য যথাভাগমুপাশ্নুতে
130.18
ততো বসতি দুষ্কর্মা নরকে শাশ্বতীঃ সমাঃ
রাজদোষেণ হি জগত্স্পৃশ্যতে জগতঃ স চ
130.19
রাজধর্মানবেক্ষস্ব পিতৃপৈতামহোচিতান্
নৈতদ্রাজর্ষিবৃত্তং হি যত্র ত্বং স্থাতুমিচ্ছসি
130.20
ন হি বৈক্লব্যসংসৃষ্ট আনৃশংস্যে ব্যবস্থিতঃ
প্রজাপালনসংভূতং কিংচিত্প্রাপ ফলং নৃপঃ
130.21
ন হ্যেতামাশিষং পাণ্ডুর্ন চাহং ন পিতামহঃ
প্রয়ুক্তবন্তঃ পূর্বং তে যয়া চরসি মেধয়া
130.22
যজ্ঞো দানং তপঃ শৌর্যং প্রজাসংতানমেব চ
মাহাত্ম্যং বলমোজশ্চ নিত্যমাশংসিতং ময়া
130.23
নিত্যং স্বাহা স্বধা নিত্যং দদুর্মানুষদেবতাঃ
দীর্ঘমায়ুর্ধনং পুত্রান্সম্যগারাধিতাঃ শুভাঃ
130.24
পুত্রেষ্বাশাসতে নিত্যং পিতরো দৈবতানি চ
দানমধ্যয়নং যজ্ঞং প্রজানাং পরিপালনম্
130.25
এতদ্ধর্মমধর্মং বা জন্মনৈবাভ্যজায়থাঃ
তে স্থ বৈদ্যাঃ কুলে জাতা অবৃত্ত্যা তাত পীডিতাঃ
130.26
যত্তু দানপতিং শূরং ক্ষুধিতাঃ পৃথিবীচরাঃ
প্রাপ্য তৃপ্তাঃ প্রতিষ্ঠন্তে ধর্মঃ কোঽভ্যধিকস্ততঃ
130.27
দানেনান্যং বলেনান্যং তথা সূনৃতয়াপরম্
সর্বতঃ প্রতিগৃহ্ণীয়াদ্রাজ্যং প্রাপ্যেহ ধার্মিকঃ
130.28
ব্রাহ্মণঃ প্রচরেদ্ভৈক্ষং ক্ষত্রিয়ঃ পরিপালয়েৎ
বৈশ্যো ধনার্জনং কুর্যাচ্ছূদ্রঃ পরিচরেচ্চ তান্
130.29
ভৈক্ষং বিপ্রতিষিদ্ধং তে কৃষির্নৈবোপপদ্যতে
ক্ষত্রিয়োঽসি ক্ষতাত্ত্রাতা বাহুবীর্যোপজীবিতা
130.30
পিত্র্যমংশং মহাবাহো নিমগ্নং পুনরুদ্ধর
সাম্না দানেন ভেদেন দণ্ডেনাথ নয়েন চ
130.31
ইতো দুঃখতরং কিং নু যদহং হীনবান্ধবা
পরপিণ্ডমুদীক্ষামি ত্বাং সূত্বামিত্রনন্দন
130.32
যুধ্যস্ব রাজধর্মেণ মা নিমজ্জীঃ পিতামহান্
মা গমঃ ক্ষীণপুণ্যস্ত্বং সানুজঃ পাপিকাং গতিম্