Utshovঅধ্যায় 131
131.1
কুন্ত্যুবাচ
অত্রাপ্যুদাহরন্তীমমিতিহাসং পুরাতনম্
বিদুরায়াশ্চ সংবাদং পুত্রস্য চ পরংতপ
131.2
অত্র শ্রেয়শ্চ ভূয়শ্চ যথা সা বক্তুমর্হতি
যশস্বিনী মন্যুমতী কুলে জাতা বিভাবরী
131.3
ক্ষত্রধর্মরতা ধন্যা বিদুরা দীর্ঘদর্শিনী
বিশ্রুতা রাজসংসত্সু শ্রুতবাক্যা বহুশ্রুতা
131.4
বিদুরা নাম বৈ সত্যা জগর্হে পুত্রমৌরসম্
নির্জিতং সিন্ধুরাজেন শয়ানং দীনচেতসম্
অনন্দনমধর্মজ্ঞং দ্বিষতাং হর্ষবর্ধনম্
131.5
ন ময়া ত্বং ন পিত্রাসি জাতঃ ক্বাভ্যাগতো হ্যসি
নির্মন্যুরুপশাখীয়ঃ পুরুষঃ ক্লীবসাধনঃ
131.6
যাবজ্জীবং নিরাশোঽসি কল্যাণায় ধুরং বহ
মাত্মানমবমন্যস্ব মৈনমল্পেন বীভরঃ
মনঃ কৃত্বা সুকল্যাণং মা ভৈস্ত্বং প্রতিসংস্তভ
131.7
উত্তিষ্ঠ হে কাপুরুষ মা শেষ্বৈবং পরাজিতঃ
অমিত্রান্নন্দয়ন্সর্বান্নির্মানো বন্ধুশোকদঃ
131.8
সুপূরা বৈ কুনদিকা সুপূরো মূষিকাঞ্জলিঃ
সুসংতোষঃ কাপুরুষঃ স্বল্পকেনাপি তুষ্যতি
131.9
অপ্যরেরারুজন্দংষ্ট্রামাশ্বেব নিধনং ব্রজ
অপি বা সংশয়ং প্রাপ্য জীবিতেঽপি পরাক্রম
131.10
অপ্যরেঃ শ্যেনবচ্ছিদ্রং পশ্যেস্ত্বং বিপরিক্রমন্
বিনদন্বাথ বা তূষ্ণীং ব্যোম্নি বাপরিশঙ্কিতঃ
131.11
ত্বমেবং প্রেতবচ্ছেষে কস্মাদ্বজ্রহতো যথা
উত্তিষ্ঠ হে কাপুরুষ মা শেষ্বৈবং পরাজিতঃ
131.12
মাস্তং গমস্ত্বং কৃপণো বিশ্রূয়স্ব স্বকর্মণা
মা মধ্যে মা জঘন্যে ত্বং মাধো ভূস্তিষ্ঠ চোর্জিতঃ
131.13
অলাতং তিন্দুকস্যেব মুহূর্তমপি বিজ্বল
মা তুষাগ্নিরিবানর্চিঃ কাকরঙ্খা জিজীবিষুঃ
মুহূর্তং জ্বলিতং শ্রেয়ো ন তু ধূমায়িতং চিরম্
131.14
মা হ স্ম কস্যচিদ্গেহে জনী রাজ্ঞঃ খরীমৃদুঃ
কৃত্বা মানুষ্যকং কর্ম সৃত্বাজিং যাবদুত্তমম্
ধর্মস্যানৃণ্যমাপ্নোতি ন চাত্মানং বিগর্হতে
131.15
অলব্ধ্বা যদি বা লব্ধ্বা নানুশোচন্তি পণ্ডিতাঃ
আনন্তর্যং চারভতে ন প্রাণানাং ধনায়তে
131.16
উদ্ভাবয়স্ব বীর্যং বা তাং বা গচ্ছ ধ্রুবাং গতিম্
ধর্মং পুত্রাগ্রতঃ কৃত্বা কিংনিমিত্তং হি জীবসি
131.17
ইষ্টাপূর্তং হি তে ক্লীব কীর্তিশ্চ সকলা হতা
বিচ্ছিন্নং ভোগমূলং তে কিংনিমিত্তং হি জীবসি
131.18
শত্রুর্নিমজ্জতা গ্রাহ্যো জঙ্ঘায়াং প্রপতিষ্যতা
বিপরিচ্ছিন্নমূলোঽপি ন বিষীদেত্কথংচন
উদ্যম্য ধুরমুত্কর্ষেদাজানেয়কৃতং স্মরন্
131.19
কুরু সত্ত্বং চ মানং চ বিদ্ধি পৌরুষমাত্মনঃ
উদ্ভাবয় কুলং মগ্নং ত্বত্কৃতে স্বয়মেব হি
131.20
যস্য বৃত্তং ন জল্পন্তি মানবা মহদদ্ভুতম্
রাশিবর্ধনমাত্রং স নৈব স্ত্রী ন পুনঃ পুমান্
131.21
দানে তপসি শৌর্যে চ যস্য ন প্রথিতং যশঃ
বিদ্যায়ামর্থলাভে বা মাতুরুচ্চার এব সঃ
131.22
শ্রুতেন তপসা বাপি শ্রিয়া বা বিক্রমেণ বা
জনান্যোঽভিভবত্যন্যান্কর্মণা হি স বৈ পুমান্
131.23
ন ত্বেব জাল্মীং কাপালীং বৃত্তিমেষিতুমর্হসি
নৃশংস্যাময়শস্যাং চ দুঃখাং কাপুরুষোচিতাম্
131.24
যমেনমভিনন্দেয়ুরমিত্রাঃ পুরুষং কৃশম্
লোকস্য সমবজ্ঞাতং নিহীনাশনবাসসম্
131.25
অহোলাভকরং দীনমল্পজীবনমল্পকম্
নেদৃশং বন্ধুমাসাদ্য বান্ধবঃ সুখমেধতে
131.26
অবৃত্ত্যৈব বিপত্স্যামো বয়ং রাষ্ট্রাত্প্রবাসিতাঃ
সর্বকামরসৈর্হীনাঃ স্থানভ্রষ্টা অকিংচনাঃ
131.27
অবর্ণকারিণং সত্সু কুলবংশস্য নাশনম্
কলিং পুত্রপ্রবাদেন সংজয় ত্বামজীজনম্
131.28
নিরমর্ষং নিরুত্সাহং নির্বীর্যমরিনন্দনম্
মা স্ম সীমন্তিনী কাচিজ্জনয়েত্পুত্রমীদৃশম্
131.29
মা ধূমায় জ্বলাত্যন্তমাক্রম্য জহি শাত্রবান্
জ্বল মূর্ধন্যমিত্রাণাং মুহূর্তমপি বা ক্ষণম্
131.30
এতাবানেব পুরুষো যদমর্ষী যদক্ষমী
ক্ষমাবান্নিরমর্ষশ্চ নৈব স্ত্রী ন পুনঃ পুমান্
131.31
সংতোষো বৈ শ্রিয়ং হন্তি তথানুক্রোশ এব চ
অনুত্থানভয়ে চোভে নিরীহো নাশ্নুতে মহৎ
131.32
এভ্যো নিকৃতিপাপেভ্যঃ প্রমুঞ্চাত্মানমাত্মনা
আয়সং হৃদয়ং কৃত্বা মৃগয়স্ব পুনঃ স্বকম্
131.33
পুরং বিষহতে যস্মাত্তস্মাত্পুরুষ উচ্যতে
তমাহুর্ব্যর্থনামানং স্ত্রীবদ্য ইহ জীবতি
131.34
শূরস্যোর্জিতসত্ত্বস্য সিংহবিক্রান্তগামিনঃ
দিষ্টভাবং গতস্যাপি বিঘসে মোদতে প্রজা
131.35
য আত্মনঃ প্রিয়সুখে হিত্বা মৃগয়তে শ্রিয়ম্
অমাত্যানামথো হর্ষমাদধাত্যচিরেণ সঃ
131.36
পুত্র উবাচ
কিং নু তে মামপশ্যন্ত্যাঃ পৃথিব্যা অপি সর্বয়া
কিমাভরণকৃত্যং তে কিং ভোগৈর্জীবিতেন বা
131.37
মাতোবাচ
কিমদ্যকানাং যে লোকা দ্বিষন্তস্তানবাপ্নুয়ুঃ
যে ত্বাদৃতাত্মনাং লোকাঃ সুহৃদস্তান্ব্রজন্তু নঃ
131.38
ভৃত্যৈর্বিহীয়মানানাং পরপিণ্ডোপজীবিনাম্
কৃপণানামসত্ত্বানাং মা বৃত্তিমনুবর্তিথাঃ
131.39
অনু ত্বাং তাত জীবন্তু ব্রাহ্মণাঃ সুহৃদস্তথা
পর্জন্যমিব ভূতানি দেবা ইব শতক্রতুম্
131.40
যমাজীবন্তি পুরুষং সর্বভূতানি সংজয়
পক্বং দ্রুমমিবাসাদ্য তস্য জীবিতমর্থবৎ
131.41
যস্য শূরস্য বিক্রান্তৈরেধন্তে বান্ধবাঃ সুখম্
ত্রিদশা ইব শক্রস্য সাধু তস্যেহ জীবিতম্
131.42
স্ববাহুবলমাশ্রিত্য যোঽভ্যুজ্জীবতি মানবঃ
স লোকে লভতে কীর্তিং পরত্র চ শুভাং গতিম্