Utshovঅধ্যায় 132
132.1
বিদুরোবাচ
অথৈতস্যামবস্থায়াং পৌরুষং হাতুমিচ্ছসি
নিহীনসেবিতং মার্গং গমিষ্যস্যচিরাদিব
132.2
যো হি তেজো যথাশক্তি ন দর্শয়তি বিক্রমাৎ
ক্ষত্রিয়ো জীবিতাকাঙ্ক্ষী স্তেন ইত্যেব তং বিদুঃ
132.3
অর্থবন্ত্যুপপন্নানি বাক্যানি গুণবন্তি চ
নৈব সংপ্রাপ্নুবন্তি ত্বাং মুমূর্ষুমিব ভেষজম্
132.4
সন্তি বৈ সিন্ধুরাজস্য সংতুষ্টা বহবো জনাঃ
দৌর্বল্যাদাসতে মূঢা ব্যসনৌঘপ্রতীক্ষিণঃ
132.5
সহায়োপচয়ং কৃত্বা ব্যবসায্য ততস্ততঃ
অনুদুষ্যেয়ুরপরে পশ্যন্তস্তব পৌরুষম্
132.6
তৈঃ কৃত্বা সহ সংঘাতং গিরিদুর্গালয়াংশ্চর
কালে ব্যসনমাকাঙ্ক্ষন্নৈবায়মজরামরঃ
132.7
সংজয়ো নামতশ্চ ত্বং ন চ পশ্যামি তত্ত্বয়ি
অন্বর্থনামা ভব মে পুত্র মা ব্যর্থনামকঃ
132.8
সম্যগ্দৃষ্টির্মহাপ্রাজ্ঞো বালং ত্বাং ব্রাহ্মণোঽব্রবীৎ
অয়ং প্রাপ্য মহত্কৃচ্ছ্রং পুনর্বৃদ্ধিং গমিষ্যতি
132.9
তস্য স্মরন্তী বচনমাশংসে বিজয়ং তব
তস্মাত্তাত ব্রবীমি ত্বাং বক্ষ্যামি চ পুনঃ পুনঃ
132.10
যস্য হ্যর্থাভিনির্বৃত্তৌ ভবন্ত্যাপ্যায়িতাঃ পরে
তস্যার্থসিদ্ধির্নিয়তা নয়েষ্বর্থানুসারিণঃ
132.11
সমৃদ্ধিরসমৃদ্ধির্বা পূর্বেষাং মম সংজয়
এবং বিদ্বান্যুদ্ধমনা ভব মা প্রত্যুপাহর
132.12
নাতঃ পাপীয়সীং কাংচিদবস্থাং শম্বরোঽব্রবীৎ
যত্র নৈবাদ্য ন প্রাতর্ভোজনং প্রতিদৃশ্যতে
132.13
পতিপুত্রবধাদেতত্পরমং দুঃখমব্রবীৎ
দারিদ্র্যমিতি যত্প্রোক্তং পর্যায়মরণং হি তৎ
132.14
অহং মহাকুলে জাতা হ্রদাদ্ধ্রদমিবাগতা
ঈশ্বরী সর্বকল্যাণৈর্ভর্ত্রা পরমপূজিতা
132.15
মহার্হমাল্যাভরণাং সুমৃষ্টাম্বরবাসসম্
পুরা দৃষ্ট্বা সুহৃদ্বর্গো মামপশ্যত্সুদুর্গতাম্
132.16
যদা মাং চৈব ভার্যাং চ দ্রষ্টাসি ভৃশদুর্বলে
ন তদা জীবিতেনার্থো ভবিতা তব সংজয়
132.17
দাসকর্মকরান্ভৃত্যানাচার্যর্ত্বিক্পুরোহিতান্
অবৃত্ত্যাস্মান্প্রজহতো দৃষ্ট্বা কিং জীবিতেন তে
132.18
যদি কৃত্যং ন পশ্যামি তবাদ্যেহ যথা পুরা
শ্লাঘনীয়ং যশস্যং চ কা শান্তির্হৃদয়স্য মে
132.19
নেতি চেদ্ব্রাহ্মণান্ব্রূয়াং দীর্যতে হৃদয়ং মম
ন হ্যহং ন চ মে ভর্তা নেতি ব্রাহ্মণমুক্তবান্
132.20
বয়মাশ্রয়ণীয়াঃ স্ম নাশ্রিতারঃ পরস্য চ
সান্যানাশ্রিত্য জীবন্তী পরিত্যক্ষ্যামি জীবিতম্
132.21
অপারে ভব নঃ পারমপ্লবে ভব নঃ প্লবঃ
কুরুষ্ব স্থানমস্থানে মৃতান্সংজীবয়স্ব নঃ
132.22
সর্বে তে শত্রবঃ সহ্যা ন চেজ্জীবিতুমিচ্ছসি
অথ চেদীদৃশীং বৃত্তিং ক্লীবামভ্যুপপদ্যসে
132.23
নির্বিণ্ণাত্মা হতমনা মুঞ্চৈতাং পাপজীবিকাম্
একশত্রুবধেনৈব শূরো গচ্ছতি বিশ্রুতিম্
132.24
ইন্দ্রো বৃত্রবধেনৈব মহেন্দ্রঃ সমপদ্যত
মাহেন্দ্রং চ গ্রহং লেভে লোকানাং চেশ্বরোঽভবৎ
132.25
নাম বিশ্রাব্য বা সংখ্যে শত্রূনাহূয় দংশিতান্
সেনাগ্রং বাপি বিদ্রাব্য হত্বা বা পুরুষং বরম্
132.26
যদৈব লভতে বীরঃ সুয়ুদ্ধেন মহদ্যশঃ
তদৈব প্রব্যথন্তেঽস্য শত্রবো বিনমন্তি চ
132.27
ত্যক্ত্বাত্মানং রণে দক্ষং শূরং কাপুরুষা জনাঃ
অবশাঃ পূরয়ন্তি স্ম সর্বকামসমৃদ্ধিভিঃ
132.28
রাজ্যং বাপ্যুগ্রবিভ্রংশং সংশয়ো জীবিতস্য বা
প্রলব্ধস্য হি শত্রোর্বৈ শেষং কুর্বন্তি সাধবঃ
132.29
স্বর্গদ্বারোপমং রাজ্যমথ বাপ্যমৃতোপমম্
রুদ্ধমেকায়নে মত্বা পতোল্মুক ইবারিষু
132.30
জহি শত্রূন্রণে রাজন্স্বধর্মমনুপালয়
মা ত্বা পশ্যেত্সুকৃপণং শত্রুঃ শ্রীমান্কদাচন
132.31
অস্মদীয়ৈশ্চ শোচদ্ভির্নদদ্ভিশ্চ পরৈর্বৃতম্
অপি ত্বাং নানুপশ্যেয়ং দীনা দীনমবস্থিতম্
132.32
উষ্য সৌবীরকন্যাভিঃ শ্লাঘস্বার্থৈর্যথা পুরা
মা চ সৈন্ধবকন্যানামবসন্নো বশং গমঃ
132.33
যুবা রূপেণ সংপন্নো বিদ্যয়াভিজনেন চ
যস্ত্বাদৃশো বিকুর্বীত যশস্বী লোকবিশ্রুতঃ
বোঢব্যে ধুর্যনডুবন্মন্যে মরণমেব তৎ
132.34
যদি ত্বামনুপশ্যামি পরস্য প্রিয়বাদিনম্
পৃষ্ঠতোঽনুব্রজন্তং বা কা শান্তির্হৃদয়স্য মে
132.35
নাস্মিঞ্জাতু কুলে জাতো গচ্ছেদ্যোঽন্যস্য পৃষ্ঠতঃ
ন ত্বং পরস্যানুধুরং তাত জীবিতুমর্হসি
132.36
অহং হি ক্ষত্রহৃদয়ং বেদ যত্পরিশাশ্বতম্
পূর্বৈঃ পূর্বতরৈঃ প্রোক্তং পরৈঃ পরতরৈরপি
132.37
যো বৈ কশ্চিদিহাজাতঃ ক্ষত্রিয়ঃ ক্ষত্রধর্মবিৎ
ভয়াদ্বৃত্তিসমীক্ষো বা ন নমেদিহ কস্যচিৎ
132.38
উদ্যচ্ছেদেব ন নমেদুদ্যমো হ্যেব পৌরুষম্
অপ্যপর্বণি ভজ্যেত ন নমেদিহ কস্যচিৎ
132.39
মাতঙ্গো মত্ত ইব চ পরীয়াত্সুমহামনাঃ
ব্রাহ্মণেভ্যো নমেন্নিত্যং ধর্মায়ৈব চ সংজয়
132.40
নিয়চ্ছন্নিতরান্বর্ণান্বিনিঘ্নন্সর্বদুষ্কৃতঃ
সসহায়োঽসহায়ো বা যাবজ্জীবং তথা ভবেৎ