Utshovঅধ্যায় 133
133.1
পুত্র উবাচ
কৃষ্ণায়সস্যেব চ তে সংহত্য হৃদয়ং কৃতম্
মম মাতস্ত্বকরুণে বৈরপ্রজ্ঞে হ্যমর্ষণে
133.2
অহো ক্ষত্রসমাচারো যত্র মামপরং যথা
ঈদৃশং বচনং ব্রূয়াদ্ভবতী পুত্রমেকজম্
133.3
কিং নু তে মামপশ্যন্ত্যাঃ পৃথিব্যা অপি সর্বয়া
কিমাভরণকৃত্যং তে কিং ভোগৈর্জীবিতেন বা
133.4
মাতোবাচ
সর্বারম্ভা হি বিদুষাং তাত ধর্মার্থকারণাৎ
তানেবাভিসমীক্ষ্যাহং সংজয় ত্বামচূচুদম্
133.5
স সমীক্ষ্যক্রমোপেতো মুখ্যঃ কালোঽয়মাগতঃ
অস্মিংশ্চেদাগতে কালে কার্যং ন প্রতিপদ্যসে
অসংভাবিতরূপস্ত্বং সুনৃশংসং করিষ্যসি
133.6
তং ত্বাময়শসা স্পৃষ্টং ন ব্রূয়াং যদি সংজয়
খরীবাত্সল্যমাহুস্তন্নিঃসামর্থ্যমহেতুকম্
133.7
সদ্ভির্বিগর্হিতং মার্গং ত্যজ মূর্খনিষেবিতম্
অবিদ্যা বৈ মহত্যস্তি যামিমাং সংশ্রিতাঃ প্রজাঃ
133.8
তব স্যাদ্যদি সদ্বৃত্তং তেন মে ত্বং প্রিয়ো ভবেঃ
ধর্মার্থগুণয়ুক্তেন নেতরেণ কথংচন
দৈবমানুষয়ুক্তেন সদ্ভিরাচরিতেন চ
133.9
যো হ্যেবমবিনীতেন রমতে পুত্রনপ্তৃণা
অনুত্থানবতা চাপি মোঘং তস্য প্রজাফলম্
133.10
অকুর্বন্তো হি কর্মাণি কুর্বন্তো নিন্দিতানি চ
সুখং নৈবেহ নামুত্র লভন্তে পুরুষাধমাঃ
133.11
যুদ্ধায় ক্ষত্রিয়ঃ সৃষ্টঃ সংজয়েহ জয়ায় চ
ক্রূরায় কর্মণে নিত্যং প্রজানাং পরিপালনে
জয়ন্বা বধ্যমানো বা প্রাপ্নোতীন্দ্রসলোকতাম্
133.12
ন শক্রভবনে পুণ্যে দিবি তদ্বিদ্যতে সুখম্
যদমিত্রান্বশে কৃত্বা ক্ষত্রিয়ঃ সুখমশ্নুতে
133.13
মন্যুনা দহ্যমানেন পুরুষেণ মনস্বিনা
নিকৃতেনেহ বহুশঃ শত্রূন্প্রতিজিগীষয়া
133.14
আত্মানং বা পরিত্যজ্য শত্রূন্বা বিনিপাত্য বৈ
অতোঽন্যেন প্রকারেণ শান্তিরস্য কুতো ভবেৎ
133.15
ইহ প্রাজ্ঞো হি পুরুষঃ স্বল্পমপ্রিয়মিচ্ছতি
যস্য স্বল্পং প্রিয়ং লোকে ধ্রুবং তস্যাল্পমপ্রিয়ম্
133.16
প্রিয়াভাবাচ্চ পুরুষো নৈব প্রাপ্নোতি শোভনম্
ধ্রুবং চাভাবমভ্যেতি গত্বা গঙ্গেব সাগরম্
133.17
পুত্র উবাচ
নেয়ং মতিস্ত্বয়া বাচ্যা মাতঃ পুত্রে বিশেষতঃ
কারুণ্যমেবাত্র পশ্য ভূত্বেহ জডমূকবৎ
133.18
মাতোবাচ
অতো মে ভূয়সী নন্দির্যদেবমনুপশ্যসি
চোদ্যং মাং চোদয়স্যেতদ্ভৃশং বৈ চোদয়ামি তে
133.19
অথ ত্বাং পূজয়িষ্যামি হত্বা বৈ সর্বসৈন্ধবান্
অহং পশ্যামি বিজয়ং কৃত্স্নং ভাবিনমেব তে
133.20
পুত্র উবাচ
অকোশস্যাসহায়স্য কুতঃ স্বিদ্বিজয়ো মম
ইত্যবস্থাং বিদিত্বেমামাত্মনাত্মনি দারুণাম্
রাজ্যাদ্ভাবো নিবৃত্তো মে ত্রিদিবাদিব দুষ্কৃতেঃ
133.21
ঈদৃশং ভবতী কংচিদুপায়মনুপশ্যতি
তন্মে পরিণতপ্রজ্ঞে সম্যক্প্রব্রূহি পৃচ্ছতে
করিষ্যামি হি তত্সর্বং যথাবদনুশাসনম্
133.22
মাতোবাচ
পুত্রাত্মা নাবমন্তব্যঃ পূর্বাভিরসমৃদ্ধিভিঃ
অভূত্বা হি ভবন্ত্যর্থা ভূত্বা নশ্যন্তি চাপরে
133.23
অমর্ষেণৈব চাপ্যর্থা নারব্ধব্যাঃ সুবালিশৈঃ
সর্বেষাং কর্মণাং তাত ফলে নিত্যমনিত্যতা
133.24
অনিত্যমিতি জানন্তো ন ভবন্তি ভবন্তি চ
অথ যে নৈব কুর্বন্তি নৈব জাতু ভবন্তি তে
133.25
ঐকগুণ্যমনীহায়ামভাবঃ কর্মণাং ফলম্
অথ দ্বৈগুণ্যমীহায়াং ফলং ভবতি বা ন বা
133.26
যস্য প্রাগেব বিদিতা সর্বার্থানামনিত্যতা
নুদেদ্বৃদ্ধিসমৃদ্ধী স প্রতিকূলে নৃপাত্মজ
133.27
উত্থাতব্যং জাগৃতব্যং যোক্তব্যং ভূতিকর্মসু
ভবিষ্যতীত্যেব মনঃ কৃত্বা সততমব্যথৈঃ
মঙ্গলানি পুরস্কৃত্য ব্রাহ্মণৈশ্চেশ্বরৈঃ সহ
133.28
প্রাজ্ঞস্য নৃপতেরাশু বৃদ্ধির্ভবতি পুত্রক
অভিবর্ততি লক্ষ্মীস্তং প্রাচীমিব দিবাকরঃ
133.29
নিদর্শনান্যুপায়াংশ্চ বহূন্যুদ্ধর্ষণানি চ
অনুদর্শিতরূপোঽসি পশ্যামি কুরু পৌরুষম্
পুরুষার্থমভিপ্রেতং সমাহর্তুমিহার্হসি
133.30
ক্রুদ্ধাঁল্লুব্ধান্পরিক্ষীণানবক্ষিপ্তান্বিমানিতান্
স্পর্ধিনশ্চৈব যে কেচিত্তান্যুক্ত উপধারয়
133.31
এতেন ত্বং প্রকারেণ মহতো ভেত্স্যসে গণান্
মহাবেগ ইবোদ্ধূতো মাতরিশ্বা বলাহকান্
133.32
তেষামগ্রপ্রদায়ী স্যাঃ কল্যোত্থায়ী প্রিয়ংবদঃ
তে ত্বাং প্রিয়ং করিষ্যন্তি পুরো ধাস্যন্তি চ ধ্রুবম্
133.33
যদৈব শত্রুর্জানীয়াত্সপত্নং ত্যক্তজীবিতম্
তদৈবাস্মাদুদ্বিজতে সর্পাদ্বেশ্মগতাদিব
133.34
তং বিদিত্বা পরাক্রান্তং বশে ন কুরুতে যদি
নির্বাদৈর্নির্বদেদেনমন্ততস্তদ্ভবিষ্যতি
133.35
নির্বাদাদাস্পদং লব্ধ্বা ধনবৃদ্ধির্ভবিষ্যতি
ধনবন্তং হি মিত্রাণি ভজন্তে চাশ্রয়ন্তি চ
133.36
স্খলিতার্থং পুনস্তাত সংত্যজন্ত্যপি বান্ধবাঃ
অপ্যস্মিন্নাশ্রয়ন্তে চ জুগুপ্সন্তি চ তাদৃশম্
133.37
শত্রুং কৃত্বা যঃ সহায়ং বিশ্বাসমুপগচ্ছতি
অতঃ সংভাব্যমেবৈতদ্যদ্রাজ্যং প্রাপ্নুয়াদিতি