অধ্যায় 134

134.1

মাতোবাচ
নৈব রাজ্ঞা দরঃ কার্যো জাতু কস্যাংচিদাপদি
অথ চেদপি দীর্ণঃ স্যান্নৈব বর্তেত দীর্ণবৎ

দীর্ণং হি দৃষ্ট্বা রাজানং সর্বমেবানুদীর্যতে
রাষ্ট্রং বলমমাত্যাশ্চ পৃথক্কুর্বন্তি তে মতিম্

শত্রূনেকে প্রপদ্যন্তে প্রজহত্যপরে পুনঃ
অন্বেকে প্রজিহীর্ষন্তি যে পুরস্তাদ্বিমানিতাঃ

য এবাত্যন্তসুহৃদস্ত এনং পর্যুপাসতে
অশক্তয়ঃ স্বস্তিকামা বদ্ধবত্সা ইডা ইব
শোচন্তমনুশোচন্তি প্রতীতানিব বান্ধবান্

অপি তে পূজিতাঃ পূর্বমপি তে সুহৃদো মতাঃ
যে রাষ্ট্রমভিমন্যন্তে রাজ্ঞো ব্যসনমীয়ুষঃ
মা দীদরস্ত্বং সুহৃদো মা ত্বাং দীর্ণং প্রহাসিষুঃ

প্রভাবং পৌরুষং বুদ্ধিং জিজ্ঞাসন্ত্যা ময়া তব
উল্লপন্ত্যা সমাশ্বাসং বলবানিব দুর্বলম্

যদ্যেতত্সংবিজানাসি যদি সম্যগ্ব্রবীম্যহম্
কৃত্বাসৌম্যমিবাত্মানং জয়ায়োত্তিষ্ঠ সংজয়

অস্তি নঃ কোশনিচয়ো মহানবিদিতস্তব
তমহং বেদ নান্যস্তমুপসংপাদয়ামি তে

সন্তি নৈকশতা ভূয়ঃ সুহৃদস্তব সংজয়
সুখদুঃখসহা বীর শতার্হা অনিবর্তিনঃ

তাদৃশা হি সহায়া বৈ পুরুষস্য বুভূষতঃ
ঈষদুজ্জিহতঃ কিংচিত্সচিবাঃ শত্রুকর্শনাঃ

পুত্র উবাচ
কস্য ত্বীদৃশকং বাক্যং শ্রুত্বাপি স্বল্পচেতসঃ
তমো ন ব্যপহন্যেত সুচিত্রার্থপদাক্ষরম্

উদকে ধূরিয়ং ধার্যা সর্তব্যং প্রবণে ময়া
যস্য মে ভবতী নেত্রী ভবিষ্যদ্ভূতদর্শিনী

অহং হি বচনং ত্বত্তঃ শুশ্রূষুরপরাপরম্
কিংচিত্কিংচিত্প্রতিবদংস্তূষ্ণীমাসং মুহুর্মুহুঃ

অতৃপ্যন্নমৃতস্যেব কৃচ্ছ্রাল্লব্ধস্য বান্ধবাৎ
উদ্যচ্ছাম্যেষ শত্রূণাং নিয়মায় জয়ায় চ

কুন্ত্যুবাচ
সদশ্ব ইব স ক্ষিপ্তঃ প্রণুন্নো বাক্যসায়কৈঃ
তচ্চকার তথা সর্বং যথাবদনুশাসনম্

ইদমুদ্ধর্ষণং ভীমং তেজোবর্ধনমুত্তমম্
রাজানং শ্রাবয়েন্মন্ত্রী সীদন্তং শত্রুপীডিতম্

জয়ো নামেতিহাসোঽয়ং শ্রোতব্যো বিজিগীষুণা
মহীং বিজয়তে ক্ষিপ্রং শ্রুত্বা শত্রূংশ্চ মর্দতি

ইদং পুংসবনং চৈব বীরাজননমেব চ
অভীক্ষ্ণং গর্ভিণী শ্রুত্বা ধ্রুবং বীরং প্রজায়তে

বিদ্যাশূরং তপঃশূরং দমশূরং তপস্বিনম্
ব্রাহ্ম্যা শ্রিয়া দীপ্যমানং সাধুবাদেন সংমতম্

অর্চিষ্মন্তং বলোপেতং মহাভাগং মহারথম্
ধৃষ্টবন্তমনাধৃষ্যং জেতারমপরাজিতম্

নিয়ন্তারমসাধূনাং গোপ্তারং ধর্মচারিণাম্
তদর্থং ক্ষত্রিয়া সূতে বীরং সত্যপরাক্রমম্