Utshovঅধ্যায় 135
135.1
কুন্ত্যুবাচ
অর্জুনং কেশব ব্রূয়াস্ত্বয়ি জাতে স্ম সূতকে
উপোপবিষ্টা নারীভিরাশ্রমে পরিবারিতা
135.2
অথান্তরিক্ষে বাগাসীদ্দিব্যরূপা মনোরমা
সহস্রাক্ষসমঃ কুন্তি ভবিষ্যত্যেষ তে সুতঃ
135.3
এষ জেষ্যতি সংগ্রামে কুরূন্সর্বান্সমাগতান্
ভীমসেনদ্বিতীয়শ্চ লোকমুদ্বর্তয়িষ্যতি
135.4
পুত্রস্তে পৃথিবীং জেতা যশশ্চাস্য দিবস্পৃশম্
হত্বা কুরূন্গ্রামজন্যে বাসুদেবসহায়বান্
135.5
পিত্র্যমংশং প্রনষ্টং চ পুনরপ্যুদ্ধরিষ্যতি
ভ্রাতৃভিঃ সহিতঃ শ্রীমাংস্ত্রীন্মেধানাহরিষ্যতি
135.6
তং সত্যসংধং বীভত্সুং সব্যসাচিনমচ্যুত
যথাহমেবং জানামি বলবন্তং দুরাসদম্
তথা তদস্তু দাশার্হ যথা বাগভ্যভাষত
135.7
ধর্মশ্চেদস্তি বার্ষ্ণেয় তথা সত্যং ভবিষ্যতি
ত্বং চাপি তত্তথা কৃষ্ণ সর্বং সংপাদয়িষ্যসি
135.8
নাহং তদভ্যসূয়ামি যথা বাগভ্যভাষত
নমো ধর্মায় মহতে ধর্মো ধারয়তি প্রজাঃ
135.9
এতদ্ধনংজয়ো বাচ্যো নিত্যোদ্যুক্তো বৃকোদরঃ
যদর্থং ক্ষত্রিয়া সূতে তস্য কালোঽয়মাগতঃ
ন হি বৈরং সমাসাদ্য সীদন্তি পুরুষর্ষভাঃ
135.10
বিদিতা তে সদা বুদ্ধির্ভীমস্য ন স শাম্যতি
যাবদন্তং ন কুরুতে শত্রূণাং শত্রুকর্শনঃ
135.11
সর্বধর্মবিশেষজ্ঞাং স্নুষাং পাণ্ডোর্মহাত্মনঃ
ব্রূয়া মাধব কল্যাণীং কৃষ্ণাং কৃষ্ণ যশস্বিনীম্
135.12
যুক্তমেতন্মহাভাগে কুলে জাতে যশস্বিনি
যন্মে পুত্রেষু সর্বেষু যথাবত্ত্বমবর্তিথাঃ
135.13
মাদ্রীপুত্রৌ চ বক্তব্যৌ ক্ষত্রধর্মরতাবুভৌ
বিক্রমেণার্জিতান্ভোগান্বৃণীতং জীবিতাদপি
135.14
বিক্রমাধিগতা হ্যর্থাঃ ক্ষত্রধর্মেণ জীবতঃ
মনো মনুষ্যস্য সদা প্রীণন্তি পুরুষোত্তম
135.15
যচ্চ বঃ প্রেক্ষমাণানাং সর্বধর্মোপচায়িনী
পাঞ্চালী পরুষাণ্যুক্তা কো নু তত্ক্ষন্তুমর্হতি
135.16
ন রাজ্যহরণং দুঃখং দ্যূতে চাপি পরাজয়ঃ
প্রব্রাজনং সুতানাং বা ন মে তদ্দুঃখকারণম্
135.17
যত্তু সা বৃহতী শ্যামা সভায়াং রুদতী তদা
অশ্রৌষীত্পরুষা বাচস্তন্মে দুঃখতরং মতম্
135.18
স্ত্রীধর্মিণী বরারোহা ক্ষত্রধর্মরতা সদা
নাধ্যগচ্ছত্তদা নাথং কৃষ্ণা নাথবতী সতী
135.19
তং বৈ ব্রূহি মহাবাহো সর্বশস্ত্রভৃতাং বরম্
অর্জুনং পুরুষব্যাঘ্রং দ্রৌপদ্যাঃ পদবীং চর
135.20
বিদিতৌ হি তবাত্যন্তং ক্রুদ্ধাবিব যমান্তকৌ
ভীমার্জুনৌ নয়েতাং হি দেবানপি পরাং গতিম্
135.21
তয়োশ্চৈতদবজ্ঞানং যত্সা কৃষ্ণা সভাগতা
দুঃশাসনশ্চ যদ্ভীমং কটুকান্যভ্যভাষত
পশ্যতাং কুরুবীরাণাং তচ্চ সংস্মারয়েঃ পুনঃ
135.22
পাণ্ডবান্কুশলং পৃচ্ছেঃ সপুত্রান্কৃষ্ণয়া সহ
মাং চ কুশলিনীং ব্রূয়াস্তেষু ভূয়ো জনার্দন
অরিষ্টং গচ্ছ পন্থানং পুত্রান্মে পরিপালয়
135.23
বৈশংপায়ন উবাচ
অভিবাদ্যাথ তাং কৃষ্ণঃ কৃত্বা চাভিপ্রদক্ষিণম্
নিশ্চক্রাম মহাবাহুঃ সিংহখেলগতিস্ততঃ
135.24
ততো বিসর্জয়ামাস ভীষ্মাদীন্কুরুপুংগবান্
আরোপ্য চ রথে কর্ণং প্রায়াত্সাত্যকিনা সহ
135.25
ততঃ প্রয়াতে দাশার্হে কুরবঃ সংগতা মিথঃ
জজল্পুর্মহদাশ্চর্যং কেশবে পরমাদ্ভুতম্
135.26
প্রমূঢা পৃথিবী সর্বা মৃত্যুপাশসিতা কৃতা
দুর্যোধনস্য বালিশ্যান্নৈতদস্তীতি চাব্রুবন্
135.27
ততো নির্যায় নগরাত্প্রয়য়ৌ পুরুষোত্তমঃ
মন্ত্রয়ামাস চ তদা কর্ণেন সুচিরং সহ
135.28
বিসর্জয়িত্বা রাধেয়ং সর্বয়াদবনন্দনঃ
ততো জবেন মহতা তূর্ণমশ্বানচোদয়ৎ
135.29
তে পিবন্ত ইবাকাশং দারুকেণ প্রচোদিতাঃ
হয়া জগ্মুর্মহাবেগা মনোমারুতরংহসঃ
135.30
তে ব্যতীত্য তমধ্বানং ক্ষিপ্রং শ্যেনা ইবাশুগাঃ
উচ্চৈঃ সূর্যমুপপ্লব্যং শার্ঙ্গধন্বানমাবহন্