UtshovChapter 135
135.1
कुन्त्युवाच
अर्जुनं केशव ब्रूयास्त्वयि जाते स्म सूतके
उपोपविष्टा नारीभिराश्रमे परिवारिता
Kuntyuvacha
Arjunam keshava bruyastvayi jate sma sutake
Upopavishta naribhirashrame parivarita
135.2
अथान्तरिक्षे वागासीद्दिव्यरूपा मनोरमा
सहस्राक्षसमः कुन्ति भविष्यत्येष ते सुतः
Athantarikshe vagasiddivyarupa manorama
Sahasrakshasamah kunti bhavishyatyesha te sutah
135.3
एष जेष्यति संग्रामे कुरून्सर्वान्समागतान्
भीमसेनद्वितीयश्च लोकमुद्वर्तयिष्यति
Esha jeshyati sangrame kurunsarvansamagatan
Bhimasenadvitiyashcha lokamudvartayishyati
135.4
पुत्रस्ते पृथिवीं जेता यशश्चास्य दिवस्पृशम्
हत्वा कुरून्ग्रामजन्ये वासुदेवसहायवान्
Putraste prithivim jeta yashashchasya divasprisham
Hatva kurungramajanye vasudevasahayavan
135.5
पित्र्यमंशं प्रनष्टं च पुनरप्युद्धरिष्यति
भ्रातृभिः सहितः श्रीमांस्त्रीन्मेधानाहरिष्यति
Pitryamansham pranashtam cha punarapyuddharishyati
Bhratribhih sahitah shrimanstrinmedhanaharishyati
135.6
तं सत्यसंधं बीभत्सुं सव्यसाचिनमच्युत
यथाहमेवं जानामि बलवन्तं दुरासदम्
तथा तदस्तु दाशार्ह यथा वागभ्यभाषत
Tam satyasandham bibhatsum savyasachinamachyuta
Yathahamevam janami balavantam durasadam
Tatha tadastu dasharha yatha vagabhyabhashata
135.7
धर्मश्चेदस्ति वार्ष्णेय तथा सत्यं भविष्यति
त्वं चापि तत्तथा कृष्ण सर्वं संपादयिष्यसि
Dharmashchedasti varshneya tatha satyam bhavishyati
Tvam chapi tattatha krishna sarvam sampadayishyasi
135.8
नाहं तदभ्यसूयामि यथा वागभ्यभाषत
नमो धर्माय महते धर्मो धारयति प्रजाः
Naham tadabhyasuyami yatha vagabhyabhashata
Namo dharmaya mahate dharmo dharayati prajah
135.9
एतद्धनंजयो वाच्यो नित्योद्युक्तो वृकोदरः
यदर्थं क्षत्रिया सूते तस्य कालोऽयमागतः
न हि वैरं समासाद्य सीदन्ति पुरुषर्षभाः
Etaddhananjayo vachyo nityodyukto vrikodarah
Yadartham kshatriya sute tasya kaloyamagatah
Na hi vairam samasadya sidanti purusharshabhah
135.10
विदिता ते सदा बुद्धिर्भीमस्य न स शाम्यति
यावदन्तं न कुरुते शत्रूणां शत्रुकर्शनः
Vidita te sada buddhirbhimasya na sa shamyati
Yavadantam na kurute shatrunam shatrukarshanah
135.11
सर्वधर्मविशेषज्ञां स्नुषां पाण्डोर्महात्मनः
ब्रूया माधव कल्याणीं कृष्णां कृष्ण यशस्विनीम्
Sarvadharmavisheshagyam snusham pandormahatmanah
Bruya madhava kalyanim krishnam krishna yashasvinim
135.12
युक्तमेतन्महाभागे कुले जाते यशस्विनि
यन्मे पुत्रेषु सर्वेषु यथावत्त्वमवर्तिथाः
Yuktametanmahabhage kule jate yashasvini
Yanme putreshu sarveshu yathavattvamavartithah
135.13
माद्रीपुत्रौ च वक्तव्यौ क्षत्रधर्मरतावुभौ
विक्रमेणार्जितान्भोगान्वृणीतं जीवितादपि
Madriputrau cha vaktavyau kshatradharmaratavubhau
Vikramenarjitanbhoganvrinitam jivitadapi
135.14
विक्रमाधिगता ह्यर्थाः क्षत्रधर्मेण जीवतः
मनो मनुष्यस्य सदा प्रीणन्ति पुरुषोत्तम
Vikramadhigata hyarthah kshatradharmena jivatah
Mano manushyasya sada prinanti purushottama
135.15
यच्च वः प्रेक्षमाणानां सर्वधर्मोपचायिनी
पाञ्चाली परुषाण्युक्ता को नु तत्क्षन्तुमर्हति
Yachcha vah prekshamananam sarvadharmopachayini
Panchali parushanyukta ko nu tatkshantumarhati
135.16
न राज्यहरणं दुःखं द्यूते चापि पराजयः
प्रव्राजनं सुतानां वा न मे तद्दुःखकारणम्
Na rajyaharanam duhkham dyute chapi parajayah
Pravrajanam sutanam va na me tadduhkhakaranam
135.17
यत्तु सा बृहती श्यामा सभायां रुदती तदा
अश्रौषीत्परुषा वाचस्तन्मे दुःखतरं मतम्
Yattu sa brihati shyama sabhayam rudati tada
Ashraushitparusha vachastanme duhkhataram matam
135.18
स्त्रीधर्मिणी वरारोहा क्षत्रधर्मरता सदा
नाध्यगच्छत्तदा नाथं कृष्णा नाथवती सती
Stridharmini vararoha kshatradharmarata sada
Nadhyagachchhattada natham krishna nathavati sati
135.19
तं वै ब्रूहि महाबाहो सर्वशस्त्रभृतां वरम्
अर्जुनं पुरुषव्याघ्रं द्रौपद्याः पदवीं चर
Tam vai bruhi mahabaho sarvashastrabhritam varam
Arjunam purushavyaghram draupadyah padavim chara
135.20
विदितौ हि तवात्यन्तं क्रुद्धाविव यमान्तकौ
भीमार्जुनौ नयेतां हि देवानपि परां गतिम्
Viditau hi tavatyantam kruddhaviva yamantakau
Bhimarjunau nayetam hi devanapi param gatim
135.21
तयोश्चैतदवज्ञानं यत्सा कृष्णा सभागता
दुःशासनश्च यद्भीमं कटुकान्यभ्यभाषत
पश्यतां कुरुवीराणां तच्च संस्मारयेः पुनः
Tayoshchaitadavagyanam yatsa krishna sabhagata
Duhshasanashcha yadbhimam katukanyabhyabhashata
Pashyatam kuruviranam tachcha sansmarayeh punah
135.22
पाण्डवान्कुशलं पृच्छेः सपुत्रान्कृष्णया सह
मां च कुशलिनीं ब्रूयास्तेषु भूयो जनार्दन
अरिष्टं गच्छ पन्थानं पुत्रान्मे परिपालय
Pandavankushalam prichchheh saputrankrishnaya saha
Mam cha kushalinim bruyasteshu bhuyo janardana
Arishtam gachchha panthanam putranme paripalaya
135.23
वैशंपायन उवाच
अभिवाद्याथ तां कृष्णः कृत्वा चाभिप्रदक्षिणम्
निश्चक्राम महाबाहुः सिंहखेलगतिस्ततः
Vaishampayana uvacha
Abhivadyatha tam krishnah kritva chabhipradakshinam
Nishchakrama mahabahuh sinhakhelagatistatah
135.24
ततो विसर्जयामास भीष्मादीन्कुरुपुंगवान्
आरोप्य च रथे कर्णं प्रायात्सात्यकिना सह
Tato visarjayamasa bhishmadinkurupungavan
Aropya cha rathe karnam prayatsatyakina saha
135.25
ततः प्रयाते दाशार्हे कुरवः संगता मिथः
जजल्पुर्महदाश्चर्यं केशवे परमाद्भुतम्
Tatah prayate dasharhe kuravah sangata mithah
Jajalpurmahadashcharyam keshave paramadbhutam
135.26
प्रमूढा पृथिवी सर्वा मृत्युपाशसिता कृता
दुर्योधनस्य बालिश्यान्नैतदस्तीति चाब्रुवन्
Pramudha prithivi sarva mrityupashasita krita
Duryodhanasya balishyannaitadastiti chabruvan
135.27
ततो निर्याय नगरात्प्रययौ पुरुषोत्तमः
मन्त्रयामास च तदा कर्णेन सुचिरं सह
Tato niryaya nagaratprayayau purushottamah
Mantrayamasa cha tada karnena suchiram saha
135.28
विसर्जयित्वा राधेयं सर्वयादवनन्दनः
ततो जवेन महता तूर्णमश्वानचोदयत्
Visarjayitva radheyam sarvayadavanandanah
Tato javena mahata turnamashvanachodayat
135.29
ते पिबन्त इवाकाशं दारुकेण प्रचोदिताः
हया जग्मुर्महावेगा मनोमारुतरंहसः
Te pibanta ivakasham darukena prachoditah
Haya jagmurmahavega manomarutaranhasah
135.30
ते व्यतीत्य तमध्वानं क्षिप्रं श्येना इवाशुगाः
उच्चैः सूर्यमुपप्लव्यं शार्ङ्गधन्वानमावहन्
Te vyatitya tamadhvanam kshipram shyena ivashugah
Uchchaih suryamupaplavyam sharngadhanvanamavahan