UtshovChapter 136
136.1
वैशंपायन उवाच
कुन्त्यास्तु वचनं श्रुत्वा भीष्मद्रोणौ महारथौ
दुर्योधनमिदं वाक्यमूचतुः शासनातिगम्
Vaishampayana uvacha
Kuntyastu vachanam shrutva bhishmadronau maharathau
Duryodhanamidam vakyamuchatuh shasanatigam
136.2
श्रुतं ते पुरुषव्याघ्र कुन्त्याः कृष्णस्य संनिधौ
वाक्यमर्थवदव्यग्रमुक्तं धर्म्यमनुत्तमम्
Shrutam te purushavyaghra kuntyah krishnasya sannidhau
Vakyamarthavadavyagramuktam dharmyamanuttamam
136.3
तत्करिष्यन्ति कौन्तेया वासुदेवस्य संमतम्
न हि ते जातु शाम्येरन्नृते राज्येन कौरव
Tatkarishyanti kaunteya vasudevasya sammatam
Na hi te jatu shamyerannrite rajyena kaurava
136.4
क्लेशिता हि त्वया पार्था धर्मपाशसितास्तदा
सभायां द्रौपदी चैव तैश्च तन्मर्षितं तव
Kleshita hi tvaya partha dharmapashasitastada
Sabhayam draupadi chaiva taishcha tanmarshitam tava
136.5
कृतास्त्रं ह्यर्जुनं प्राप्य भीमं च कृतनिश्रमम्
गाण्डीवं चेषुधी चैव रथं च ध्वजमेव च
सहायं वासुदेवं च न क्षंस्यति युधिष्ठिरः
Kritastram hyarjunam prapya bhimam cha kritanishramam
Gandivam cheshudhi chaiva ratham cha dhvajameva cha
Sahayam vasudevam cha na kshansyati yudhishthirah
136.6
प्रत्यक्षं ते महाबाहो यथा पार्थेन धीमता
विराटनगरे पूर्वं सर्वे स्म युधि निर्जिताः
Pratyaksham te mahabaho yatha parthena dhimata
Viratanagare purvam sarve sma yudhi nirjitah
136.7
दानवान्घोरकर्माणो निवातकवचान्युधि
रौद्रमस्त्रं समाधाय दग्धवानस्त्रवह्निना
Danavanghorakarmano nivatakavachanyudhi
Raudramastram samadhaya dagdhavanastravahnina
136.8
कर्णप्रभृतयश्चेमे त्वं चापि कवची रथी
मोक्षिता घोषयात्रायां पर्याप्तं तन्निदर्शनम्
Karnaprabhritayashcheme tvam chapi kavachi rathi
Mokshita ghoshayatrayam paryaptam tannidarshanam
136.9
प्रशाम्य भरतश्रेष्ठ भ्रातृभिः सह पाण्डवैः
रक्षेमां पृथिवीं सर्वां मृत्योर्दंष्ट्रान्तरं गताम्
Prashamya bharatashreshtha bhratribhih saha pandavaih
Rakshemam prithivim sarvam mrityordanshtrantaram gatam
136.10
ज्येष्ठो भ्राता धर्मशीलो वत्सलः श्लक्ष्णवाक्शुचिः
तं गच्छ पुरुषव्याघ्रं व्यपनीयेह किल्बिषम्
Jyeshtho bhrata dharmashilo vatsalah shlakshnavakshuchih
Tam gachchha purushavyaghram vyapaniyeha kilbisham
136.11
दृष्टश्चेत्त्वं पाण्डवेन व्यपनीतशरासनः
प्रसन्नभ्रुकुटिः श्रीमान्कृता शान्तिः कुलस्य नः
Drishtashchettvam pandavena vyapanitasharasanah
Prasannabhrukutih shrimankrita shantih kulasya nah
136.12
तमभ्येत्य सहामात्यः परिष्वज्य नृपात्मजम्
अभिवादय राजानं यथापूर्वमरिंदम
Tamabhyetya sahamatyah parishvajya nripatmajam
Abhivadaya rajanam yathapurvamarindama
136.13
अभिवादयमानं त्वां पाणिभ्यां भीमपूर्वजः
प्रतिगृह्णातु सौहार्दात्कुन्तीपुत्रो युधिष्ठिरः
Abhivadayamanam tvam panibhyam bhimapurvajah
Pratigrihnatu sauhardatkuntiputro yudhishthirah
136.14
सिंहस्कन्धोरुबाहुस्त्वां वृत्तायतमहाभुजः
परिष्वजतु बाहुभ्यां भीमः प्रहरतां वरः
Sinhaskandhorubahustvam vrittayatamahabhujah
Parishvajatu bahubhyam bhimah praharatam varah
136.15
सिंहग्रीवो गुडाकेशस्ततस्त्वां पुष्करेक्षणः
अभिवादयतां पार्थः कुन्तीपुत्रो धनंजयः
Sinhagrivo gudakeshastatastvam pushkarekshanah
Abhivadayatam parthah kuntiputro dhananjayah
136.16
आश्विनेयौ नरव्याघ्रौ रूपेणाप्रतिमौ भुवि
तौ च त्वां गुरुवत्प्रेम्णा पूजया प्रत्युदीयताम्
Ashvineyau naravyaghrau rupenapratimau bhuvi
Tau cha tvam guruvatpremna pujaya pratyudiyatam
136.17
मुञ्चन्त्वानन्दजाश्रूणि दाशार्हप्रमुखा नृपाः
संगच्छ भ्रातृभिः सार्धं मानं संत्यज्य पार्थिव
Munchantvanandajashruni dasharhapramukha nripah
Sangachchha bhratribhih sardham manam santyajya parthiva
136.18
प्रशाधि पृथिवीं कृत्स्नां ततस्तं भ्रातृभिः सह
समालिङ्ग्य च हर्षेण नृपा यान्तु परस्परम्
Prashadhi prithivim kritsnam tatastam bhratribhih saha
Samalingya cha harshena nripa yantu parasparam
136.19
अलं युद्धेन राजेन्द्र सुहृदां शृणु कारणम्
ध्रुवं विनाशो युद्धे हि क्षत्रियाणां प्रदृश्यते
Alam yuddhena rajendra suhridam shrinu karanam
Dhruvam vinasho yuddhe hi kshatriyanam pradrishyate
136.20
ज्योतींषि प्रतिकूलानि दारुणा मृगपक्षिणः
उत्पाता विविधा वीर दृश्यन्ते क्षत्रनाशनाः
Jyotinshi pratikulani daruna mrigapakshinah
Utpata vividha vira drishyante kshatranashanah
136.21
विशेषत इहास्माकं निमित्तानि विनाशने
उल्काभिर्हि प्रदीप्ताभिर्वध्यते पृतना तव
Visheshata ihasmakam nimittani vinashane
Ulkabhirhi pradiptabhirvadhyate pritana tava
136.22
वाहनान्यप्रहृष्टानि रुदन्तीव विशां पते
गृध्रास्ते पर्युपासन्ते सैन्यानि च समन्ततः
Vahananyaprahrishtani rudantiva visham pate
Gridhraste paryupasante sainyani cha samantatah
136.23
नगरं न यथापूर्वं तथा राजनिवेशनम्
शिवाश्चाशिवनिर्घोषा दीप्तां सेवन्ति वै दिशम्
Nagaram na yathapurvam tatha rajaniveshanam
Shivashchashivanirghosha diptam sevanti vai disham
136.24
कुरु वाक्यं पितुर्मातुरस्माकं च हितैषिणाम्
त्वय्यायत्तो महाबाहो शमो व्यायाम एव च
Kuru vakyam piturmaturasmakam cha hitaishinam
Tvayyayatto mahabaho shamo vyayama eva cha
136.25
न चेत्करिष्यसि वचः सुहृदामरिकर्शन
तप्स्यसे वाहिनीं दृष्ट्वा पार्थबाणप्रपीडिताम्
Na chetkarishyasi vachah suhridamarikarshana
Tapsyase vahinim drishtva parthabanaprapiditam
136.26
भीमस्य च महानादं नदतः शुष्मिणो रणे
श्रुत्वा स्मर्तासि मे वाक्यं गाण्डीवस्य च निस्वनम्
यद्येतदपसव्यं ते भविष्यति वचो मम
Bhimasya cha mahanadam nadatah shushmino rane
Shrutva smartasi me vakyam gandivasya cha nisvanam
Yadyetadapasavyam te bhavishyati vacho mama