Utshovঅধ্যায় 136
136.1
বৈশংপায়ন উবাচ
কুন্ত্যাস্তু বচনং শ্রুত্বা ভীষ্মদ্রোণৌ মহারথৌ
দুর্যোধনমিদং বাক্যমূচতুঃ শাসনাতিগম্
136.2
শ্রুতং তে পুরুষব্যাঘ্র কুন্ত্যাঃ কৃষ্ণস্য সংনিধৌ
বাক্যমর্থবদব্যগ্রমুক্তং ধর্ম্যমনুত্তমম্
136.3
তত্করিষ্যন্তি কৌন্তেয়া বাসুদেবস্য সংমতম্
ন হি তে জাতু শাম্যেরন্নৃতে রাজ্যেন কৌরব
136.4
ক্লেশিতা হি ত্বয়া পার্থা ধর্মপাশসিতাস্তদা
সভায়াং দ্রৌপদী চৈব তৈশ্চ তন্মর্ষিতং তব
136.5
কৃতাস্ত্রং হ্যর্জুনং প্রাপ্য ভীমং চ কৃতনিশ্রমম্
গাণ্ডীবং চেষুধী চৈব রথং চ ধ্বজমেব চ
সহায়ং বাসুদেবং চ ন ক্ষংস্যতি যুধিষ্ঠিরঃ
136.6
প্রত্যক্ষং তে মহাবাহো যথা পার্থেন ধীমতা
বিরাটনগরে পূর্বং সর্বে স্ম যুধি নির্জিতাঃ
136.7
দানবান্ঘোরকর্মাণো নিবাতকবচান্যুধি
রৌদ্রমস্ত্রং সমাধায় দগ্ধবানস্ত্রবহ্নিনা
136.8
কর্ণপ্রভৃতয়শ্চেমে ত্বং চাপি কবচী রথী
মোক্ষিতা ঘোষয়াত্রায়াং পর্যাপ্তং তন্নিদর্শনম্
136.9
প্রশাম্য ভরতশ্রেষ্ঠ ভ্রাতৃভিঃ সহ পাণ্ডবৈঃ
রক্ষেমাং পৃথিবীং সর্বাং মৃত্যোর্দংষ্ট্রান্তরং গতাম্
136.10
জ্যেষ্ঠো ভ্রাতা ধর্মশীলো বত্সলঃ শ্লক্ষ্ণবাক্শুচিঃ
তং গচ্ছ পুরুষব্যাঘ্রং ব্যপনীয়েহ কিল্বিষম্
136.11
দৃষ্টশ্চেত্ত্বং পাণ্ডবেন ব্যপনীতশরাসনঃ
প্রসন্নভ্রুকুটিঃ শ্রীমান্কৃতা শান্তিঃ কুলস্য নঃ
136.12
তমভ্যেত্য সহামাত্যঃ পরিষ্বজ্য নৃপাত্মজম্
অভিবাদয় রাজানং যথাপূর্বমরিংদম
136.13
অভিবাদয়মানং ত্বাং পাণিভ্যাং ভীমপূর্বজঃ
প্রতিগৃহ্ণাতু সৌহার্দাত্কুন্তীপুত্রো যুধিষ্ঠিরঃ
136.14
সিংহস্কন্ধোরুবাহুস্ত্বাং বৃত্তায়তমহাভুজঃ
পরিষ্বজতু বাহুভ্যাং ভীমঃ প্রহরতাং বরঃ
136.15
সিংহগ্রীবো গুডাকেশস্ততস্ত্বাং পুষ্করেক্ষণঃ
অভিবাদয়তাং পার্থঃ কুন্তীপুত্রো ধনংজয়ঃ
136.16
আশ্বিনেয়ৌ নরব্যাঘ্রৌ রূপেণাপ্রতিমৌ ভুবি
তৌ চ ত্বাং গুরুবত্প্রেম্ণা পূজয়া প্রত্যুদীয়তাম্
136.17
মুঞ্চন্ত্বানন্দজাশ্রূণি দাশার্হপ্রমুখা নৃপাঃ
সংগচ্ছ ভ্রাতৃভিঃ সার্ধং মানং সংত্যজ্য পার্থিব
136.18
প্রশাধি পৃথিবীং কৃত্স্নাং ততস্তং ভ্রাতৃভিঃ সহ
সমালিঙ্গ্য চ হর্ষেণ নৃপা যান্তু পরস্পরম্
136.19
অলং যুদ্ধেন রাজেন্দ্র সুহৃদাং শৃণু কারণম্
ধ্রুবং বিনাশো যুদ্ধে হি ক্ষত্রিয়াণাং প্রদৃশ্যতে
136.20
জ্যোতীংষি প্রতিকূলানি দারুণা মৃগপক্ষিণঃ
উত্পাতা বিবিধা বীর দৃশ্যন্তে ক্ষত্রনাশনাঃ
136.21
বিশেষত ইহাস্মাকং নিমিত্তানি বিনাশনে
উল্কাভির্হি প্রদীপ্তাভির্বধ্যতে পৃতনা তব
136.22
বাহনান্যপ্রহৃষ্টানি রুদন্তীব বিশাং পতে
গৃধ্রাস্তে পর্যুপাসন্তে সৈন্যানি চ সমন্ততঃ
136.23
নগরং ন যথাপূর্বং তথা রাজনিবেশনম্
শিবাশ্চাশিবনির্ঘোষা দীপ্তাং সেবন্তি বৈ দিশম্
136.24
কুরু বাক্যং পিতুর্মাতুরস্মাকং চ হিতৈষিণাম্
ত্বয্যায়ত্তো মহাবাহো শমো ব্যায়াম এব চ
136.25
ন চেত্করিষ্যসি বচঃ সুহৃদামরিকর্শন
তপ্স্যসে বাহিনীং দৃষ্ট্বা পার্থবাণপ্রপীডিতাম্
136.26
ভীমস্য চ মহানাদং নদতঃ শুষ্মিণো রণে
শ্রুত্বা স্মর্তাসি মে বাক্যং গাণ্ডীবস্য চ নিস্বনম্
যদ্যেতদপসব্যং তে ভবিষ্যতি বচো মম