অধ্যায় 137

137.1

বৈশংপায়ন উবাচ
এবমুক্তস্তু বিমনাস্তির্যগ্দৃষ্টিরধোমুখঃ
সংহত্য চ ভ্রুবোর্মধ্যং ন কিংচিদ্ব্যাজহার হ

তং বৈ বিমনসং দৃষ্ট্বা সংপ্রেক্ষ্যান্যোন্যমন্তিকাৎ
পুনরেবোত্তরং বাক্যমুক্তবন্তৌ নরর্ষভৌ

ভীষ্ম উবাচ
শুশ্রূষুমনসূয়ং চ ব্রহ্মণ্যং সত্যসংগরম্
প্রতিয়োত্স্যামহে পার্থমতো দুঃখতরং নু কিম্

দ্রোণ উবাচ
অশ্বত্থাম্নি যথা পুত্রে ভূয়ো মম ধনংজয়ে
বহুমানঃ পরো রাজন্সংনতিশ্চ কপিধ্বজে

তং চেত্পুত্রাত্প্রিয়তরং প্রতিয়োত্স্যে ধনংজয়ম্
ক্ষত্রধর্মমনুষ্ঠায় ধিগস্তু ক্ষত্রজীবিকাম্

যস্য লোকে সমো নাস্তি কশ্চিদন্যো ধনুর্ধরঃ
মত্প্রসাদাত্স বীভত্সুঃ শ্রেয়ানন্যৈর্ধনুর্ধরৈঃ

মিত্রধ্রুগ্দুষ্টভাবশ্চ নাস্তিকোঽথানৃজুঃ শঠঃ
ন সত্সু লভতে পূজাং যজ্ঞে মূর্খ ইবাগতঃ

বার্যমাণোঽপি পাপেভ্যঃ পাপাত্মা পাপমিচ্ছতি
চোদ্যমানোঽপি পাপেন শুভাত্মা শুভমিচ্ছতি

মিথ্যোপচরিতা হ্যেতে বর্তমানা হ্যনু প্রিয়ে
অহিতত্বায় কল্পন্তে দোষা ভরতসত্তম

ত্বমুক্তঃ কুরুবৃদ্ধেন ময়া চ বিদুরেণ চ
বাসুদেবেন চ তথা শ্রেয়ো নৈবাভিপদ্যসে

অস্তি মে বলমিত্যেব সহসা ত্বং তিতীর্ষসি
সগ্রাহনক্রমকরং গঙ্গাবেগমিবোষ্ণগে

বাস এব যথা হি ত্বং প্রাবৃণ্বানোঽদ্য মন্যসে
স্রজং ত্যক্তামিব প্রাপ্য লোভাদ্যৌধিষ্ঠিরীং শ্রিয়ম্

দ্রৌপদীসহিতং পার্থং সায়ুধৈর্ভ্রাতৃভির্বৃতম্
বনস্থমপি রাজ্যস্থঃ পাণ্ডবং কোঽতিজীবতি

নিদেশে যস্য রাজানঃ সর্বে তিষ্ঠন্তি কিংকরাঃ
তমৈলবিলমাসাদ্য ধর্মরাজো ব্যরাজত

কুবেরসদনং প্রাপ্য ততো রত্নান্যবাপ্য চ
স্ফীতমাক্রম্য তে রাষ্ট্রং রাজ্যমিচ্ছন্তি পাণ্ডবাঃ

দত্তং হুতমধীতং চ ব্রাহ্মণাস্তর্পিতা ধনৈঃ
আবয়োর্গতমায়ুশ্চ কৃতকৃত্যৌ চ বিদ্ধি নৌ

ত্বং তু হিত্বা সুখং রাজ্যং মিত্রাণি চ ধনানি চ
বিগ্রহং পাণ্ডবৈঃ কৃত্বা মহদ্ব্যসনমাপ্স্যসি

দ্রৌপদী যস্য চাশাস্তে বিজয়ং সত্যবাদিনী
তপোঘোরব্রতা দেবী ন ত্বং জেষ্যসি পাণ্ডবম্

মন্ত্রী জনার্দনো যস্য ভ্রাতা যস্য ধনংজয়ঃ
সর্বশস্ত্রভৃতাং শ্রেষ্ঠং কথং জেষ্যসি পাণ্ডবম্

সহায়া ব্রাহ্মণা যস্য ধৃতিমন্তো জিতেন্দ্রিয়াঃ
তমুগ্রতপসং বীরং কথং জেষ্যসি পাণ্ডবম্

পুনরুক্তং চ বক্ষ্যামি যত্কার্যং ভূতিমিচ্ছতা
সুহৃদা মজ্জমানেষু সুহৃত্সু ব্যসনার্ণবে

অলং যুদ্ধেন তৈর্বীরৈঃ শাম্য ত্বং কুরুবৃদ্ধয়ে
মা গমঃ সসুতামাত্যঃ সবলশ্চ পরাভবম্