Utshovঅধ্যায় 138
138.1
ধৃতরাষ্ট্র উবাচ
রাজপুত্রৈঃ পরিবৃতস্তথামাত্যৈশ্চ সংজয়
উপারোপ্য রথে কর্ণং নির্যাতো মধুসূদনঃ
138.2
কিমব্রবীদ্রথোপস্থে রাধেয়ং পরবীরহা
কানি সান্ত্বানি গোবিন্দঃ সূতপুত্রে প্রয়ুক্তবান্
138.3
ওঘমেঘস্বনঃ কালে যত্কৃষ্ণঃ কর্ণমব্রবীৎ
মৃদু বা যদি বা তীক্ষ্ণং তন্মমাচক্ষ্ব সংজয়
138.4
সংজয় উবাচ
আনুপূর্ব্যেণ বাক্যানি শ্লক্ষ্ণানি চ মৃদূনি চ
প্রিয়াণি ধর্ময়ুক্তানি সত্যানি চ হিতানি চ
138.5
হৃদয়গ্রহণীয়ানি রাধেয়ং মধুসূদনঃ
যান্যব্রবীদমেয়াত্মা তানি মে শৃণু ভারত
138.6
বাসুদেব উবাচ
উপাসিতাস্তে রাধেয় ব্রাহ্মণা বেদপারগাঃ
তত্ত্বার্থং পরিপৃষ্টাশ্চ নিয়তেনানসূয়য়া
138.7
ত্বমেব কর্ণ জানাসি বেদবাদান্সনাতনান্
ত্বং হ্যেব ধর্মশাস্ত্রেষু সূক্ষ্মেষু পরিনিষ্ঠিতঃ
138.8
কানীনশ্চ সহোঢশ্চ কন্যায়াং যশ্চ জায়তে
বোঢারং পিতরং তস্য প্রাহুঃ শাস্ত্রবিদো জনাঃ
138.9
সোঽসি কর্ণ তথা জাতঃ পাণ্ডোঃ পুত্রোঽসি ধর্মতঃ
নিগ্রহাদ্ধর্মশাস্ত্রাণামেহি রাজা ভবিষ্যসি
138.10
পিতৃপক্ষে হি তে পার্থা মাতৃপক্ষে চ বৃষ্ণয়ঃ
দ্বৌ পক্ষাবভিজানীহি ত্বমেতৌ পুরুষর্ষভ
138.11
ময়া সার্ধমিতো যাতমদ্য ত্বাং তাত পাণ্ডবাঃ
অভিজানন্তু কৌন্তেয়ং পূর্বজাতং যুধিষ্ঠিরাৎ
138.12
পাদৌ তব গ্রহীষ্যন্তি ভ্রাতরঃ পঞ্চ পাণ্ডবাঃ
দ্রৌপদেয়াস্তথা পঞ্চ সৌভদ্রশ্চাপরাজিতঃ
138.13
রাজানো রাজপুত্রাশ্চ পাণ্ডবার্থে সমাগতাঃ
পাদৌ তব গ্রহীষ্যন্তি সর্বে চান্ধকবৃষ্ণয়ঃ
138.14
হিরণ্ময়াংশ্চ তে কুম্ভান্রাজতান্পার্থিবাংস্তথা
ওষধ্যঃ সর্ববীজানি সর্বরত্নানি বীরুধঃ
138.15
রাজন্যা রাজকন্যাশ্চাপ্যানয়ন্ত্বভিষেচনম্
ষষ্ঠে চ ত্বাং তথা কালে দ্রৌপদ্যুপগমিষ্যতি
138.16
অদ্য ত্বামভিষিঞ্চন্তু চাতুর্বৈদ্যা দ্বিজাতয়ঃ
পুরোহিতঃ পাণ্ডবানাং ব্যাঘ্রচর্মণ্যবস্থিতম্
138.17
তথৈব ভ্রাতরঃ পঞ্চ পাণ্ডবাঃ পুরুষর্ষভাঃ
দ্রৌপদেয়াস্তথা পঞ্চ পাঞ্চালাশ্চেদয়স্তথা
138.18
অহং চ ত্বাভিষেক্ষ্যামি রাজানং পৃথিবীপতিম্
যুবরাজোঽস্তু তে রাজা কুন্তীপুত্রো যুধিষ্ঠিরঃ
138.19
গৃহীত্বা ব্যজনং শ্বেতং ধর্মাত্মা সংশিতব্রতঃ
উপান্বারোহতু রথং কুন্তীপুত্রো যুধিষ্ঠিরঃ
138.20
ছত্রং চ তে মহচ্ছ্বেতং ভীমসেনো মহাবলঃ
অভিষিক্তস্য কৌন্তেয় কৌন্তেয়ো ধারয়িষ্যতি
138.21
কিঙ্কিণীশতনির্ঘোষং বৈয়াঘ্রপরিবারণম্
রথং শ্বেতহয়ৈর্যুক্তমর্জুনো বাহয়িষ্যতি
138.22
অভিমন্যুশ্চ তে নিত্যং প্রত্যাসন্নো ভবিষ্যতি
নকুলঃ সহদেবশ্চ দ্রৌপদেয়াশ্চ পঞ্চ যে
138.23
পাঞ্চালাস্ত্বানুয়াস্যন্তি শিখণ্ডী চ মহারথঃ
অহং চ ত্বানুয়াস্যামি সর্বে চান্ধকবৃষ্ণয়ঃ
দাশার্হাঃ পরিবারাস্তে দাশার্ণাশ্চ বিশাং পতে
138.24
ভুঙ্ক্ষ্ব রাজ্যং মহাবাহো ভ্রাতৃভিঃ সহ পাণ্ডবৈঃ
জপৈর্হোমৈশ্চ সংয়ুক্তো মঙ্গলৈশ্চ পৃথগ্বিধৈঃ
138.25
পুরোগমাশ্চ তে সন্তু দ্রবিডাঃ সহ কুন্তলৈঃ
আন্ধ্রাস্তালচরাশ্চৈব চূচুপা বেণুপাস্তথা
138.26
স্তুবন্তু ত্বাদ্য বহুশঃ স্তুতিভিঃ সূতমাগধাঃ
বিজয়ং বসুষেণস্য ঘোষয়ন্তু চ পাণ্ডবাঃ
138.27
স ত্বং পরিবৃতঃ পার্থৈর্নক্ষত্রৈরিব চন্দ্রমাঃ
প্রশাধি রাজ্যং কৌন্তেয় কুন্তীং চ প্রতিনন্দয়
138.28
মিত্রাণি তে প্রহৃষ্যন্তু ব্যথন্তু রিপবস্তথা
সৌভ্রাত্রং চৈব তেঽদ্যাস্তু ভ্রাতৃভিঃ সহ পাণ্ডবৈঃ