Utshovঅধ্যায় 139
139.1
কর্ণ উবাচ
অসংশয়ং সৌহৃদান্মে প্রণয়াচ্চাত্থ কেশব
সখ্যেন চৈব বার্ষ্ণেয় শ্রেয়স্কামতয়ৈব চ
139.2
সর্বং চৈবাভিজানামি পাণ্ডোঃ পুত্রোঽস্মি ধর্মতঃ
নিগ্রহাদ্ধর্মশাস্ত্রাণাং যথা ত্বং কৃষ্ণ মন্যসে
139.3
কন্যা গর্ভং সমাধত্ত ভাস্করান্মাং জনার্দন
আদিত্যবচনাচ্চৈব জাতং মাং সা ব্যসর্জয়ৎ
139.4
সোঽস্মি কৃষ্ণ তথা জাতঃ পাণ্ডোঃ পুত্রোঽস্মি ধর্মতঃ
কুন্ত্যা ত্বহমপাকীর্ণো যথা ন কুশলং তথা
139.5
সূতো হি মামধিরথো দৃষ্ট্বৈব অনয়দ্গৃহান্
রাধায়াশ্চৈব মাং প্রাদাত্সৌহার্দান্মধুসূদন
139.6
মত্স্নেহাচ্চৈব রাধায়াঃ সদ্যঃ ক্ষীরমবাতরৎ
সা মে মূত্রং পুরীষং চ প্রতিজগ্রাহ মাধব
139.7
তস্যাঃ পিণ্ডব্যপনয়ং কুর্যাদস্মদ্বিধঃ কথম্
ধর্মবিদ্ধর্মশাস্ত্রাণাং শ্রবণে সততং রতঃ
139.8
তথা মামভিজানাতি সূতশ্চাধিরথঃ সুতম্
পিতরং চাভিজানামি তমহং সৌহৃদাত্সদা
139.9
স হি মে জাতকর্মাদি কারয়ামাস মাধব
শাস্ত্রদৃষ্টেন বিধিনা পুত্রপ্রীত্যা জনার্দন
139.10
নাম মে বসুষেণেতি কারয়ামাস বৈ দ্বিজৈঃ
ভার্যাশ্চোঢা মম প্রাপ্তে যৌবনে তেন কেশব
139.11
তাসু পুত্রাশ্চ পৌত্রাশ্চ মম জাতা জনার্দন
তাসু মে হৃদয়ং কৃষ্ণ সংজাতং কামবন্ধনম্
139.12
ন পৃথিব্যা সকলয়া ন সুবর্ণস্য রাশিভিঃ
হর্ষাদ্ভয়াদ্বা গোবিন্দ অনৃতং বক্তুমুত্সহে
139.13
ধৃতরাষ্ট্রকুলে কৃষ্ণ দুর্যোধনসমাশ্রয়াৎ
ময়া ত্রয়োদশ সমা ভুক্তং রাজ্যমকণ্টকম্
139.14
ইষ্টং চ বহুভির্যজ্ঞৈঃ সহ সূতৈর্ময়াসকৃৎ
আবাহাশ্চ বিবাহাশ্চ সহ সূতৈঃ কৃতা ময়া
139.15
মাং চ কৃষ্ণ সমাশ্রিত্য কৃতঃ শস্ত্রসমুদ্যমঃ
দুর্যোধনেন বার্ষ্ণেয় বিগ্রহশ্চাপি পাণ্ডবৈঃ
139.16
তস্মাদ্রণে দ্বৈরথে মাং প্রত্যুদ্যাতারমচ্যুত
বৃতবান্পরমং হৃষ্টঃ প্রতীপং সব্যসাচিনঃ
139.17
বধাদ্বন্ধাদ্ভয়াদ্বাপি লোভাদ্বাপি জনার্দন
অনৃতং নোত্সহে কর্তুং ধার্তরাষ্ট্রস্য ধীমতঃ
139.18
যদি হ্যদ্য ন গচ্ছেয়ং দ্বৈরথং সব্যসাচিনা
অকীর্তিঃ স্যাদ্ধৃষীকেশ মম পার্থস্য চোভয়োঃ
139.19
অসংশয়ং হিতার্থায় ব্রূয়াস্ত্বং মধুসূদন
সর্বং চ পাণ্ডবাঃ কুর্যুস্ত্বদ্বশিত্বান্ন সংশয়ঃ
139.20
মন্ত্রস্য নিয়মং কুর্যাস্ত্বমত্র পুরুষোত্তম
এতদত্র হিতং মন্যে সর্বয়াদবনন্দন
139.21
যদি জানাতি মাং রাজা ধর্মাত্মা সংশিতব্রতঃ
কুন্ত্যাঃ প্রথমজং পুত্রং ন স রাজ্যং গ্রহীষ্যতি
139.22
প্রাপ্য চাপি মহদ্রাজ্যং তদহং মধুসূদন
স্ফীতং দুর্যোধনায়ৈব সংপ্রদদ্যামরিংদম
139.23
স এব রাজা ধর্মাত্মা শাশ্বতোঽস্তু যুধিষ্ঠিরঃ
নেতা যস্য হৃষীকেশো যোদ্ধা যস্য ধনংজয়ঃ
139.24
পৃথিবী তস্য রাষ্ট্রং চ যস্য ভীমো মহারথঃ
নকুলঃ সহদেবশ্চ দ্রৌপদেয়াশ্চ মাধব
139.25
উত্তমৌজা যুধামন্যুঃ সত্যধর্মা চ সোমকিঃ
চৈদ্যশ্চ চেকিতানশ্চ শিখণ্ডী চাপরাজিতঃ
139.26
ইন্দ্রগোপকবর্ণাশ্চ কেকয়া ভ্রাতরস্তথা
ইন্দ্রায়ুধসবর্ণশ্চ কুন্তিভোজো মহারথঃ
139.27
মাতুলো ভীমসেনস্য সেনজিচ্চ মহারথঃ
শঙ্খঃ পুত্রো বিরাটস্য নিধিস্ত্বং চ জনার্দন
139.28
মহানয়ং কৃষ্ণ কৃতঃ ক্ষত্রস্য সমুদানয়ঃ
রাজ্যং প্রাপ্তমিদং দীপ্তং প্রথিতং সর্বরাজসু
139.29
ধার্তরাষ্ট্রস্য বার্ষ্ণেয় শস্ত্রয়জ্ঞো ভবিষ্যতি
অস্য যজ্ঞস্য বেত্তা ত্বং ভবিষ্যসি জনার্দন
আধ্বর্যবং চ তে কৃষ্ণ ক্রতাবস্মিন্ভবিষ্যতি
139.30
হোতা চৈবাত্র বীভত্সুঃ সংনদ্ধঃ স কপিধ্বজঃ
গাণ্ডীবং স্রুক্তথাজ্যং চ বীর্যং পুংসাং ভবিষ্যতি
139.31
ঐন্দ্রং পাশুপতং ব্রাহ্মং স্থূণাকর্ণং চ মাধব
মন্ত্রাস্তত্র ভবিষ্যন্তি প্রয়ুক্তাঃ সব্যসাচিনা
139.32
অনুয়াতশ্চ পিতরমধিকো বা পরাক্রমে
গ্রাবস্তোত্রং স সৌভদ্রঃ সম্যক্তত্র করিষ্যতি
139.33
উদ্গাতাত্র পুনর্ভীমঃ প্রস্তোতা সুমহাবলঃ
বিনদন্স নরব্যাঘ্রো নাগানীকান্তকৃদ্রণে
139.34
স চৈব তত্র ধর্মাত্মা শশ্বদ্রাজা যুধিষ্ঠিরঃ
জপৈর্হোমৈশ্চ সংয়ুক্তো ব্রহ্মত্বং কারয়িষ্যতি
139.35
শঙ্খশব্দাঃ সমুরজা ভের্যশ্চ মধুসূদন
উত্কৃষ্টসিংহনাদাশ্চ সুব্রহ্মণ্যো ভবিষ্যতি
139.36
নকুলঃ সহদেবশ্চ মাদ্রীপুত্রৌ যশস্বিনৌ
শামিত্রং তৌ মহাবীর্যৌ সম্যক্তত্র করিষ্যতঃ
139.37
কল্মাষদণ্ডা গোবিন্দ বিমলা রথশক্তয়ঃ
যূপাঃ সমুপকল্পন্তামস্মিন্যজ্ঞে জনার্দন
139.38
কর্ণিনালীকনারাচা বত্সদন্তোপবৃংহণাঃ
তোমরাঃ সোমকলশাঃ পবিত্রাণি ধনূংষি চ
139.39
অসয়োঽত্র কপালানি পুরোডাশাঃ শিরাংসি চ
হবিস্তু রুধিরং কৃষ্ণ অস্মিন্যজ্ঞে ভবিষ্যতি
139.40
ইধ্মাঃ পরিধয়শ্চৈব শক্ত্যোঽথ বিমলা গদাঃ
সদস্যা দ্রোণশিষ্যাশ্চ কৃপস্য চ শরদ্বতঃ
139.41
ইষবোঽত্র পরিস্তোমা মুক্তা গাণ্ডীবধন্বনা
মহারথপ্রয়ুক্তাশ্চ দ্রোণদ্রৌণিপ্রচোদিতাঃ
139.42
প্রাতিপ্রস্থানিকং কর্ম সাত্যকিঃ স করিষ্যতি
দীক্ষিতো ধার্তরাষ্ট্রোঽত্র পত্নী চাস্য মহাচমূঃ
139.43
ঘটোত্কচোঽত্র শামিত্রং করিষ্যতি মহাবলঃ
অতিরাত্রে মহাবাহো বিততে যজ্ঞকর্মণি
139.44
দক্ষিণা ত্বস্য যজ্ঞস্য ধৃষ্টদ্যুম্নঃ প্রতাপবান্
বৈতানে কর্মণি ততে জাতো যঃ কৃষ্ণ পাবকাৎ
139.45
যদব্রুবমহং কৃষ্ণ কটুকানি স্ম পাণ্ডবান্
প্রিয়ার্থং ধার্তরাষ্ট্রস্য তেন তপ্যেঽদ্য কর্মণা
139.46
যদা দ্রক্ষ্যসি মাং কৃষ্ণ নিহতং সব্যসাচিনা
পুনশ্চিতিস্তদা চাস্য যজ্ঞস্যাথ ভবিষ্যতি
139.47
দুঃশাসনস্য রুধিরং যদা পাস্যতি পাণ্ডবঃ
আনর্দং নর্দতঃ সম্যক্তদা সুত্যং ভবিষ্যতি
139.48
যদা দ্রোণং চ ভীষ্মং চ পাঞ্চাল্যৌ পাতয়িষ্যতঃ
তদা যজ্ঞাবসানং তদ্ভবিষ্যতি জনার্দন
139.49
দুর্যোধনং যদা হন্তা ভীমসেনো মহাবলঃ
তদা সমাপ্স্যতে যজ্ঞো ধার্তরাষ্ট্রস্য মাধব
139.50
স্নুষাশ্চ প্রস্নুষাশ্চৈব ধৃতরাষ্ট্রস্য সংগতাঃ
হতেশ্বরা হতসুতা হতনাথাশ্চ কেশব
139.51
গান্ধার্যা সহ রোদন্ত্যঃ শ্বগৃধ্রকুররাকুলে
স যজ্ঞেঽস্মিন্নবভৃথো ভবিষ্যতি জনার্দন
139.52
বিদ্যাবৃদ্ধা বয়োবৃদ্ধাঃ ক্ষত্রিয়াঃ ক্ষত্রিয়র্ষভ
বৃথামৃত্যুং ন কুর্বীরংস্ত্বত্কৃতে মধুসূদন
139.53
শস্ত্রেণ নিধনং গচ্ছেত্সমৃদ্ধং ক্ষত্রমণ্ডলম্
কুরুক্ষেত্রে পুণ্যতমে ত্রৈলোক্যস্যাপি কেশব
139.54
তদত্র পুণ্ডরীকাক্ষ বিধত্স্ব যদভীপ্সিতম্
যথা কার্ত্স্ন্যেন বার্ষ্ণেয় ক্ষত্রং স্বর্গমবাপ্নুয়াৎ
139.55
যাবত্স্থাস্যন্তি গিরয়ঃ সরিতশ্চ জনার্দন
তাবত্কীর্তিভবঃ শব্দঃ শাশ্বতোঽয়ং ভবিষ্যতি
139.56
ব্রাহ্মণাঃ কথয়িষ্যন্তি মহাভারতমাহবম্
সমাগমেষু বার্ষ্ণেয় ক্ষত্রিয়াণাং যশোধরম্
139.57
সমুপানয় কৌন্তেয়ং যুদ্ধায় মম কেশব
মন্ত্রসংবরণং কুর্বন্নিত্যমেব পরংতপ