অধ্যায় 140

140.1

সংজয় উবাচ
কর্ণস্য বচনং শ্রুত্বা কেশবঃ পরবীরহা
উবাচ প্রহসন্বাক্যং স্মিতপূর্বমিদং তদা

অপি ত্বাং ন তপেত্কর্ণ রাজ্যলাভোপপাদনা
ময়া দত্তাং হি পৃথিবীং ন প্রশাসিতুমিচ্ছসি

ধ্রুবো জয়ঃ পাণ্ডবানামিতীদং; ন সংশয়ঃ কশ্চন বিদ্যতেঽত্র
জয়ধ্বজো দৃশ্যতে পাণ্ডবস্য; সমুচ্ছ্রিতো বানররাজ উগ্রঃ

দিব্যা মায়া বিহিতা ভৌবনেন; সমুচ্ছ্রিতা ইন্দ্রকেতুপ্রকাশা
দিব্যানি ভূতানি ভয়াবহানি; দৃশ্যন্তি চৈবাত্র ভয়ানকানি

ন সজ্জতে শৈলবনস্পতিভ্য; ঊর্ধ্বং তির্যগ্যোজনমাত্ররূপঃ
শ্রীমান্ধ্বজঃ কর্ণ ধনংজয়স্য; সমুচ্ছ্রিতঃ পাবকতুল্যরূপঃ

যদা দ্রক্ষ্যসি সংগ্রামে শ্বেতাশ্বং কৃষ্ণসারথিম্
ঐন্দ্রমস্ত্রং বিকুর্বাণমুভে চৈবাগ্নিমারুতে

গাণ্ডীবস্য চ নির্ঘোষং বিস্ফূর্জিতমিবাশনেঃ
ন তদা ভবিতা ত্রেতা ন কৃতং দ্বাপরং ন চ

যদা দ্রক্ষ্যসি সংগ্রামে কুন্তীপুত্রং যুধিষ্ঠিরম্
জপহোমসমায়ুক্তং স্বাং রক্ষন্তং মহাচমূম্

আদিত্যমিব দুর্ধর্ষং তপন্তং শত্রুবাহিনীম্
ন তদা ভবিতা ত্রেতা ন কৃতং দ্বাপরং ন চ

যদা দ্রক্ষ্যসি সংগ্রামে ভীমসেনং মহাবলম্
দুঃশাসনস্য রুধিরং পীত্বা নৃত্যন্তমাহবে

প্রভিন্নমিব মাতঙ্গং প্রতিদ্বিরদঘাতিনম্
ন তদা ভবিতা ত্রেতা ন কৃতং দ্বাপরং ন চ

যদা দ্রক্ষ্যসি সংগ্রামে মাদ্রীপুত্রৌ মহারথৌ
বাহিনীং ধার্তরাষ্ট্রাণাং ক্ষোভয়ন্তৌ গজাবিব

বিগাঢে শস্ত্রসংপাতে পরবীররথারুজৌ
ন তদা ভবিতা ত্রেতা ন কৃতং দ্বাপরং ন চ

যদা দ্রক্ষ্যসি সংগ্রামে দ্রোণং শাংতনবং কৃপম্
সুয়োধনং চ রাজানং সৈন্ধবং চ জয়দ্রথম্

যুদ্ধায়াপততস্তূর্ণং বারিতান্সব্যসাচিনা
ন তদা ভবিতা ত্রেতা ন কৃতং দ্বাপরং ন চ

ব্রূয়াঃ কর্ণ ইতো গত্বা দ্রোণং শাংতনবং কৃপম্
সৌম্যোঽয়ং বর্ততে মাসঃ সুপ্রাপয়বসেন্ধনঃ

পক্বৌষধিবনস্ফীতঃ ফলবানল্পমক্ষিকঃ
নিষ্পঙ্কো রসবত্তোয়ো নাত্যুষ্ণশিশিরঃ সুখঃ

সপ্তমাচ্চাপি দিবসাদমাবাস্যা ভবিষ্যতি
সংগ্রামং যোজয়েত্তত্র তাং হ্যাহুঃ শক্রদেবতাম্

তথা রাজ্ঞো বদেঃ সর্বান্যে যুদ্ধায়াভ্যুপাগতাঃ
যদ্বো মনীষিতং তদ্বৈ সর্বং সংপাদয়ামি বঃ

রাজানো রাজপুত্রাশ্চ দুর্যোধনবশানুগাঃ
প্রাপ্য শস্ত্রেণ নিধনং প্রাপ্স্যন্তি গতিমুত্তমাম্