UtshovChapter 140
140.1
संजय उवाच
कर्णस्य वचनं श्रुत्वा केशवः परवीरहा
उवाच प्रहसन्वाक्यं स्मितपूर्वमिदं तदा
Sanjaya uvacha
Karnasya vachanam shrutva keshavah paraviraha
Uvacha prahasanvakyam smitapurvamidam tada
140.2
अपि त्वां न तपेत्कर्ण राज्यलाभोपपादना
मया दत्तां हि पृथिवीं न प्रशासितुमिच्छसि
Api tvam na tapetkarna rajyalabhopapadana
Maya dattam hi prithivim na prashasitumichchhasi
140.3
ध्रुवो जयः पाण्डवानामितीदं; न संशयः कश्चन विद्यतेऽत्र
जयध्वजो दृश्यते पाण्डवस्य; समुच्छ्रितो वानरराज उग्रः
Dhruvo jayah pandavanamitidam; na sanshayah kashchana vidyatetra
Jayadhvajo drishyate pandavasya; samuchchhrito vanararaja ugrah
140.4
दिव्या माया विहिता भौवनेन; समुच्छ्रिता इन्द्रकेतुप्रकाशा
दिव्यानि भूतानि भयावहानि; दृश्यन्ति चैवात्र भयानकानि
Divya maya vihita bhauvanena; samuchchhrita indraketuprakasha
Divyani bhutani bhayavahani; drishyanti chaivatra bhayanakani
140.5
न सज्जते शैलवनस्पतिभ्य; ऊर्ध्वं तिर्यग्योजनमात्ररूपः
श्रीमान्ध्वजः कर्ण धनंजयस्य; समुच्छ्रितः पावकतुल्यरूपः
Na sajjate shailavanaspatibhya; urdhvam tiryagyojanamatrarupah
Shrimandhvajah karna dhananjayasya; samuchchhritah pavakatulyarupah
140.6
यदा द्रक्ष्यसि संग्रामे श्वेताश्वं कृष्णसारथिम्
ऐन्द्रमस्त्रं विकुर्वाणमुभे चैवाग्निमारुते
Yada drakshyasi sangrame shvetashvam krishnasarathim
Aindramastram vikurvanamubhe chaivagnimarute
140.7
गाण्डीवस्य च निर्घोषं विस्फूर्जितमिवाशनेः
न तदा भविता त्रेता न कृतं द्वापरं न च
Gandivasya cha nirghosham visphurjitamivashaneh
Na tada bhavita treta na kritam dvaparam na cha
140.8
यदा द्रक्ष्यसि संग्रामे कुन्तीपुत्रं युधिष्ठिरम्
जपहोमसमायुक्तं स्वां रक्षन्तं महाचमूम्
Yada drakshyasi sangrame kuntiputram yudhishthiram
Japahomasamayuktam svam rakshantam mahachamum
140.9
आदित्यमिव दुर्धर्षं तपन्तं शत्रुवाहिनीम्
न तदा भविता त्रेता न कृतं द्वापरं न च
Adityamiva durdharsham tapantam shatruvahinim
Na tada bhavita treta na kritam dvaparam na cha
140.10
यदा द्रक्ष्यसि संग्रामे भीमसेनं महाबलम्
दुःशासनस्य रुधिरं पीत्वा नृत्यन्तमाहवे
Yada drakshyasi sangrame bhimasenam mahabalam
Duhshasanasya rudhiram pitva nrityantamahave
140.11
प्रभिन्नमिव मातङ्गं प्रतिद्विरदघातिनम्
न तदा भविता त्रेता न कृतं द्वापरं न च
Prabhinnamiva matangam pratidviradaghatinam
Na tada bhavita treta na kritam dvaparam na cha
140.12
यदा द्रक्ष्यसि संग्रामे माद्रीपुत्रौ महारथौ
वाहिनीं धार्तराष्ट्राणां क्षोभयन्तौ गजाविव
Yada drakshyasi sangrame madriputrau maharathau
Vahinim dhartarashtranam kshobhayantau gajaviva
140.13
विगाढे शस्त्रसंपाते परवीररथारुजौ
न तदा भविता त्रेता न कृतं द्वापरं न च
Vigadhe shastrasampate paraviraratharujau
Na tada bhavita treta na kritam dvaparam na cha
140.14
यदा द्रक्ष्यसि संग्रामे द्रोणं शांतनवं कृपम्
सुयोधनं च राजानं सैन्धवं च जयद्रथम्
Yada drakshyasi sangrame dronam shantanavam kripam
Suyodhanam cha rajanam saindhavam cha jayadratham
140.15
युद्धायापततस्तूर्णं वारितान्सव्यसाचिना
न तदा भविता त्रेता न कृतं द्वापरं न च
Yuddhayapatatasturnam varitansavyasachina
Na tada bhavita treta na kritam dvaparam na cha
140.16
ब्रूयाः कर्ण इतो गत्वा द्रोणं शांतनवं कृपम्
सौम्योऽयं वर्तते मासः सुप्रापयवसेन्धनः
Bruyah karna ito gatva dronam shantanavam kripam
Saumyoyam vartate masah suprapayavasendhanah
140.17
पक्वौषधिवनस्फीतः फलवानल्पमक्षिकः
निष्पङ्को रसवत्तोयो नात्युष्णशिशिरः सुखः
Pakvaushadhivanasphitah phalavanalpamakshikah
Nishpanko rasavattoyo natyushnashishirah sukhah
140.18
सप्तमाच्चापि दिवसादमावास्या भविष्यति
संग्रामं योजयेत्तत्र तां ह्याहुः शक्रदेवताम्
Saptamachchapi divasadamavasya bhavishyati
Sangramam yojayettatra tam hyahuh shakradevatam
140.19
तथा राज्ञो वदेः सर्वान्ये युद्धायाभ्युपागताः
यद्वो मनीषितं तद्वै सर्वं संपादयामि वः
Tatha ragyo vadeh sarvanye yuddhayabhyupagatah
Yadvo manishitam tadvai sarvam sampadayami vah
140.20
राजानो राजपुत्राश्च दुर्योधनवशानुगाः
प्राप्य शस्त्रेण निधनं प्राप्स्यन्ति गतिमुत्तमाम्
Rajano rajaputrashcha duryodhanavashanugah
Prapya shastrena nidhanam prapsyanti gatimuttamam