Utshovঅধ্যায় 141
141.1
সংজয় উবাচ
কেশবস্য তু তদ্বাক্যং কর্ণঃ শ্রুত্বা হিতং শুভম্
অব্রবীদভিসংপূজ্য কৃষ্ণং মধুনিষূদনম্
জানন্মাং কিং মহাবাহো সংমোহয়িতুমিচ্ছসি
141.2
যোঽয়ং পৃথিব্যাঃ কার্ত্স্ন্যেন বিনাশঃ সমুপস্থিতঃ
নিমিত্তং তত্র শকুনিরহং দুঃশাসনস্তথা
দুর্যোধনশ্চ নৃপতির্ধৃতরাষ্ট্রসুতোঽভবৎ
141.3
অসংশয়মিদং কৃষ্ণ মহদ্যুদ্ধমুপস্থিতম্
পাণ্ডবানাং কুরূণাং চ ঘোরং রুধিরকর্দমম্
141.4
রাজানো রাজপুত্রাশ্চ দুর্যোধনবশানুগাঃ
রণে শস্ত্রাগ্নিনা দগ্ধাঃ প্রাপ্স্যন্তি যমসাদনম্
141.5
স্বপ্না হি বহবো ঘোরা দৃশ্যন্তে মধুসূদন
নিমিত্তানি চ ঘোরাণি তথোত্পাতাঃ সুদারুণাঃ
141.6
পরাজয়ং ধার্তরাষ্ট্রে বিজয়ং চ যুধিষ্ঠিরে
শংসন্ত ইব বার্ষ্ণেয় বিবিধা লোমহর্ষণাঃ
141.7
প্রাজাপত্যং হি নক্ষত্রং গ্রহস্তীক্ষ্ণো মহাদ্যুতিঃ
শনৈশ্চরঃ পীডয়তি পীডয়ন্প্রাণিনোঽধিকম্
141.8
কৃত্বা চাঙ্গারকো বক্রং জ্যেষ্ঠায়াং মধুসূদন
অনুরাধাং প্রার্থয়তে মৈত্রং সংশময়ন্নিব
141.9
নূনং মহদ্ভয়ং কৃষ্ণ কুরূণাং সমুপস্থিতম্
বিশেষেণ হি বার্ষ্ণেয় চিত্রাং পীডয়তে গ্রহঃ
141.10
সোমস্য লক্ষ্ম ব্যাবৃত্তং রাহুরর্কমুপেষ্যতি
দিবশ্চোল্কাঃ পতন্ত্যেতাঃ সনির্ঘাতাঃ সকম্পনাঃ
141.11
নিষ্টনন্তি চ মাতঙ্গা মুঞ্চন্ত্যশ্রূণি বাজিনঃ
পানীয়ং যবসং চাপি নাভিনন্দন্তি মাধব
141.12
প্রাদুর্ভূতেষু চৈতেষু ভয়মাহুরুপস্থিতম্
নিমিত্তেষু মহাবাহো দারুণং প্রাণিনাশনম্
141.13
অল্পে ভুক্তে পুরীষং চ প্রভূতমিহ দৃশ্যতে
বাজিনাং বারণানাং চ মনুষ্যাণাং চ কেশব
141.14
ধার্তরাষ্ট্রস্য সৈন্যেষু সর্বেষু মধুসূদন
পরাভবস্য তল্লিঙ্গমিতি প্রাহুর্মনীষিণঃ
141.15
প্রহৃষ্টং বাহনং কৃষ্ণ পাণ্ডবানাং প্রচক্ষতে
প্রদক্ষিণা মৃগাশ্চৈব তত্তেষাং জয়লক্ষণম্
141.16
অপসব্যা মৃগাঃ সর্বে ধার্তরাষ্ট্রস্য কেশব
বাচশ্চাপ্যশরীরিণ্যস্তত্পরাভবলক্ষণম্
141.17
ময়ূরাঃ পুষ্পশকুনা হংসাঃ সারসচাতকাঃ
জীবং জীবকসংঘাশ্চাপ্যনুগচ্ছন্তি পাণ্ডবান্
141.18
গৃধ্রাঃ কাকা বডাঃ শ্যেনা যাতুধানাঃ শলাবৃকাঃ
মক্ষিকাণাং চ সংঘাতা অনুগচ্ছন্তি কৌরবান্
141.19
ধার্তরাষ্ট্রস্য সৈন্যেষু ভেরীণাং নাস্তি নিস্বনঃ
অনাহতাঃ পাণ্ডবানাং নদন্তি পটহাঃ কিল
141.20
উদপানাশ্চ নর্দন্তি যথা গোবৃষভাস্তথা
ধার্তরাষ্ট্রস্য সৈন্যেষু তত্পরাভবলক্ষণম্
141.21
মাংসশোণিতবর্ষং চ বৃষ্টং দেবেন মাধব
তথা গন্ধর্বনগরং ভানুমন্তমুপস্থিতম্
সপ্রাকারং সপরিখং সবপ্রং চারুতোরণম্
141.22
কৃষ্ণশ্চ পরিঘস্তত্র ভানুমাবৃত্য তিষ্ঠতি
উদয়াস্তময়ে সংধ্যে বেদয়ানো মহদ্ভয়ম্
একা সৃগ্বাশতে ঘোরং তত্পরাভবলক্ষণম্
141.23
কৃষ্ণগ্রীবাশ্চ শকুনা লম্বমানা ভয়ানকাঃ
সংধ্যামভিমুখা যান্তি তত্পরাভবলক্ষণম্
141.24
ব্রাহ্মণান্প্রথমং দ্বেষ্টি গুরূংশ্চ মধুসূদন
ভৃত্যান্ভক্তিমতশ্চাপি তত্পরাভবলক্ষণম্
141.25
পূর্বা দিগ্লোহিতাকারা শস্ত্রবর্ণা চ দক্ষিণা
আমপাত্রপ্রতীকাশা পশ্চিমা মধুসূদন
141.26
প্রদীপ্তাশ্চ দিশঃ সর্বা ধার্তরাষ্ট্রস্য মাধব
মহদ্ভয়ং বেদয়ন্তি তস্মিন্নুত্পাতলক্ষণে
141.27
সহস্রপাদং প্রাসাদং স্বপ্নান্তে স্ম যুধিষ্ঠিরঃ
অধিরোহন্ময়া দৃষ্টঃ সহ ভ্রাতৃভিরচ্যুত
141.28
শ্বেতোষ্ণীষাশ্চ দৃশ্যন্তে সর্বে তে শুক্লবাসসঃ
আসনানি চ শুভ্রাণি সর্বেষামুপলক্ষয়ে
141.29
তব চাপি ময়া কৃষ্ণ স্বপ্নান্তে রুধিরাবিলা
আন্ত্রেণ পৃথিবী দৃষ্টা পরিক্ষিপ্তা জনার্দন
141.30
অস্থিসংচয়মারূঢশ্চামিতৌজা যুধিষ্ঠিরঃ
সুবর্ণপাত্র্যাং সংহৃষ্টো ভুক্তবান্ঘৃতপায়সম্
141.31
যুধিষ্ঠিরো ময়া দৃষ্টো গ্রসমানো বসুংধরাম্
ত্বয়া দত্তামিমাং ব্যক্তং ভোক্ষ্যতে স বসুংধরাম্
141.32
উচ্চং পর্বতমারূঢো ভীমকর্মা বৃকোদরঃ
গদাপাণির্নরব্যাঘ্রো বীক্ষন্নিব মহীমিমাম্
141.33
ক্ষপয়িষ্যতি নঃ সর্বান্স সুব্যক্তং মহারণে
বিদিতং মে হৃষীকেশ যতো ধর্মস্ততো জয়ঃ
141.34
পাণ্ডুরং গজমারূঢো গাণ্ডীবী স ধনংজয়ঃ
ত্বয়া সার্ধং হৃষীকেশ শ্রিয়া পরময়া জ্বলন্
141.35
যূয়ং সর্বান্বধিষ্যধ্বং তত্র মে নাস্তি সংশয়ঃ
পার্থিবান্সমরে কৃষ্ণ দুর্যোধনপুরোগমান্
141.36
নকুলঃ সহদেবশ্চ সাত্যকিশ্চ মহারথঃ
শুদ্ধকেয়ূরকণ্ঠত্রাঃ শুক্লমাল্যাম্বরাবৃতাঃ
141.37
অধিরূঢা নরব্যাঘ্রা নরবাহনমুত্তমম্
ত্রয় এতে মহামাত্রাঃ পাণ্ডুরচ্ছত্রবাসসঃ
141.38
শ্বেতোষ্ণীষাশ্চ দৃশ্যন্তে ত্রয় এব জনার্দন
ধার্তরাষ্ট্রস্য সৈন্যেষু তান্বিজানীহি কেশব
141.39
অশ্বত্থামা কৃপশ্চৈব কৃতবর্মা চ সাত্বতঃ
রক্তোষ্ণীষাশ্চ দৃশ্যন্তে সর্বে মাধব পার্থিবাঃ
141.40
উষ্ট্রয়ুক্তং সমারূঢৌ ভীষ্মদ্রোণৌ জনার্দন
ময়া সার্ধং মহাবাহো ধার্তরাষ্ট্রেণ চাভিভো
141.41
অগস্ত্যশাস্তাং চ দিশং প্রয়াতাঃ স্ম জনার্দন
অচিরেণৈব কালেন প্রাপ্স্যামো যমসাদনম্
141.42
অহং চান্যে চ রাজানো যচ্চ তত্ক্ষত্রমণ্ডলম্
গাণ্ডীবাগ্নিং প্রবেক্ষ্যাম ইতি মে নাস্তি সংশয়ঃ
141.43
কৃষ্ণ উবাচ
উপস্থিতবিনাশেয়ং নূনমদ্য বসুংধরা
তথা হি মে বচঃ কর্ণ নোপৈতি হৃদয়ং তব
141.44
সর্বেষাং তাত ভূতানাং বিনাশে সমুপস্থিতে
অনয়ো নয়সংকাশো হৃদয়ান্নাপসর্পতি
141.45
কর্ণ উবাচ
অপি ত্বা কৃষ্ণ পশ্যাম জীবন্তোঽস্মান্মহারণাৎ
সমুত্তীর্ণা মহাবাহো বীরক্ষয়বিনাশনাৎ
141.46
অথ বা সংগমঃ কৃষ্ণ স্বর্গে নো ভবিতা ধ্রুবম্
তত্রেদানীং সমেষ্যামঃ পুনঃ সার্ধং ত্বয়ানঘ
141.47
সংজয় উবাচ
ইত্যুক্ত্বা মাধবং কর্ণঃ পরিষ্বজ্য চ পীডিতম্
বিসর্জিতঃ কেশবেন রথোপস্থাদবাতরৎ
141.48
ততঃ স্বরথমাস্থায় জাম্বূনদবিভূষিতম্
সহাস্মাভির্নিববৃতে রাধেয়ো দীনমানসঃ
141.49
ততঃ শীঘ্রতরং প্রায়াত্কেশবঃ সহসাত্যকিঃ
পুনরুচ্চারয়ন্বাণীং যাহি যাহীতি সারথিম্