Utshovঅধ্যায় 142
142.1
বৈশংপায়ন উবাচ
অসিদ্ধানুনয়ে কৃষ্ণে কুরুভ্যঃ পাণ্ডবান্গতে
অভিগম্য পৃথাং ক্ষত্তা শনৈঃ শোচন্নিবাব্রবীৎ
142.2
জানাসি মে জীবপুত্রে ভাবং নিত্যমনুগ্রহে
ক্রোশতো ন চ গৃহ্ণীতে বচনং মে সুয়োধনঃ
142.3
উপপন্নো হ্যসৌ রাজা চেদিপাঞ্চালকেকয়ৈঃ
ভীমার্জুনাভ্যাং কৃষ্ণেন যুয়ুধানয়মৈরপি
142.4
উপপ্লব্যে নিবিষ্টোঽপি ধর্মমেব যুধিষ্ঠিরঃ
কাঙ্ক্ষতে জ্ঞাতিসৌহার্দাদ্বলবান্দুর্বলো যথা
142.5
রাজা তু ধৃতরাষ্ট্রোঽয়ং বয়োবৃদ্ধো ন শাম্যতি
মত্তঃ পুত্রমদেনৈব বিধর্মে পথি বর্ততে
142.6
জয়দ্রথস্য কর্ণস্য তথা দুঃশাসনস্য চ
সৌবলস্য চ দুর্বুদ্ধ্যা মিথোভেদঃ প্রবর্ততে
142.7
অধর্মেণ হি ধর্মিষ্ঠং হৃতং বৈ রাজ্যমীদৃশম্
যেষাং তেষাময়ং ধর্মঃ সানুবন্ধো ভবিষ্যতি
142.8
হ্রিয়মাণে বলাদ্ধর্মে কুরুভিঃ কো ন সংজ্বরেৎ
অসাম্না কেশবে যাতে সমুদ্যোক্ষ্যন্তি পাণ্ডবাঃ
142.9
ততঃ কুরূণামনয়ো ভবিতা বীরনাশনঃ
চিন্তয়ন্ন লভে নিদ্রামহঃসু চ নিশাসু চ
142.10
শ্রুত্বা তু কুন্তী তদ্বাক্যমর্থকামেন ভাষিতম্
অনিষ্টনন্তী দুঃখার্তা মনসা বিমমর্শ হ
142.11
ধিগস্ত্বর্থং যত্কৃতেঽয়ং মহাঞ্জ্ঞাতিবধে ক্ষয়ঃ
বর্ত্স্যতে সুহৃদাং হ্যেষাং যুদ্ধেঽস্মিন্বৈ পরাভবঃ
142.12
পাণ্ডবাশ্চেদিপাঞ্চালা যাদবাশ্চ সমাগতাঃ
ভারতৈর্যদি যোত্স্যন্তি কিং নু দুঃখমতঃ পরম্
142.13
পশ্যে দোষং ধ্রুবং যুদ্ধে তথা যুদ্ধে পরাভবম্
অধনস্য মৃতং শ্রেয়ো ন হি জ্ঞাতিক্ষয়ে জয়ঃ
142.14
পিতামহঃ শাংতনব আচার্যশ্চ যুধাং পতিঃ
কর্ণশ্চ ধার্তরাষ্ট্রার্থং বর্ধয়ন্তি ভয়ং মম
142.15
নাচার্যঃ কামবাঞ্শিষ্যৈর্দ্রোণো যুধ্যেত জাতু চিৎ
পাণ্ডবেষু কথং হার্দং কুর্যান্ন চ পিতামহঃ
142.16
অয়ং ত্বেকো বৃথাদৃষ্টির্ধার্তরাষ্ট্রস্য দুর্মতেঃ
মোহানুবর্তী সততং পাপো দ্বেষ্টি চ পাণ্ডবান্
142.17
মহত্যনর্থে নির্বন্ধী বলবাংশ্চ বিশেষতঃ
কর্ণঃ সদা পাণ্ডবানাং তন্মে দহতি সাংপ্রতম্
142.18
আশংসে ত্বদ্য কর্ণস্য মনোঽহং পাণ্ডবান্প্রতি
প্রসাদয়িতুমাসাদ্য দর্শয়ন্তী যথাতথম্
142.19
তোষিতো ভগবান্যত্র দুর্বাসা মে বরং দদৌ
আহ্বানং দেবসংয়ুক্তং বসন্ত্যাঃ পিতৃবেশ্মনি
142.20
সাহমন্তঃপুরে রাজ্ঞঃ কুন্তিভোজপুরস্কৃতা
চিন্তয়ন্তী বহুবিধং হৃদয়েন বিদূয়তা
142.21
বলাবলং চ মন্ত্রাণাং ব্রাহ্মণস্য চ বাগ্বলম্
স্ত্রীভাবাদ্বালভাবাচ্চ চিন্তয়ন্তী পুনঃ পুনঃ
142.22
ধাত্র্যা বিশ্রব্ধয়া গুপ্তা সখীজনবৃতা তদা
দোষং পরিহরন্তী চ পিতুশ্চারিত্ররক্ষিণী
142.23
কথং নু সুকৃতং মে স্যান্নাপরাধবতী কথম্
ভবেয়মিতি সংচিন্ত্য ব্রাহ্মণং তং নমস্য চ
142.24
কৌতূহলাত্তু তং লব্ধ্বা বালিশ্যাদাচরং তদা
কন্যা সতী দেবমর্কমাসাদয়মহং ততঃ
142.25
যোঽসৌ কানীনগর্ভো মে পুত্রবত্পরিবর্তিতঃ
কস্মান্ন কুর্যাদ্বচনং পথ্যং ভ্রাতৃহিতং তথা
142.26
ইতি কুন্তী বিনিশ্চিত্য কার্যং নিশ্চিতমুত্তমম্
কার্যার্থমভিনির্যায় যয়ৌ ভাগীরথীং প্রতি
142.27
আত্মজস্য ততস্তস্য ঘৃণিনঃ সত্যসঙ্গিনঃ
গঙ্গাতীরে পৃথাশৃণ্বদুপাধ্যয়ননিস্বনম্
142.28
প্রাঙ্মুখস্যোর্ধ্ববাহোঃ সা পর্যতিষ্ঠত পৃষ্ঠতঃ
জপ্যাবসানং কার্যার্থং প্রতীক্ষন্তী তপস্বিনী
142.29
অতিষ্ঠত্সূর্যতাপার্তা কর্ণস্যোত্তরবাসসি
কৌরব্যপত্নী বার্ষ্ণেয়ী পদ্মমালেব শুষ্যতী
142.30
আ পৃষ্ঠতাপাজ্জপ্ত্বা স পরিবৃত্য যতব্রতঃ
দৃষ্ট্বা কুন্তীমুপাতিষ্ঠদভিবাদ্য কৃতাঞ্জলিঃ
যথান্যায়ং মহাতেজা মানী ধর্মভৃতাং বরঃ