অধ্যায় 143

143.1

কর্ণ উবাচ
রাধেয়োঽহমাধিরথিঃ কর্ণস্ত্বামভিবাদয়ে
প্রাপ্তা কিমর্থং ভবতী ব্রূহি কিং করবাণি তে

কুন্ত্যুবাচ
কৌন্তেয়স্ত্বং ন রাধেয়ো ন তবাধিরথঃ পিতা
নাসি সূতকুলে জাতঃ কর্ণ তদ্বিদ্ধি মে বচঃ

কানীনস্ত্বং ময়া জাতঃ পূর্বজঃ কুক্ষিণা ধৃতঃ
কুন্তিভোজস্য ভবনে পার্থস্ত্বমসি পুত্রক

প্রকাশকর্মা তপনো যোঽয়ং দেবো বিরোচনঃ
অজীজনত্ত্বাং ময্যেষ কর্ণ শস্ত্রভৃতাং বরম্

কুণ্ডলী বদ্ধকবচো দেবগর্ভঃ শ্রিয়া বৃতঃ
জাতস্ত্বমসি দুর্ধর্ষ ময়া পুত্র পিতুর্গৃহে

স ত্বং ভ্রাতৄনসংবুদ্ধ্বা মোহাদ্যদুপসেবসে
ধার্তরাষ্ট্রান্ন তদ্যুক্তং ত্বয়ি পুত্র বিশেষতঃ

এতদ্ধর্মফলং পুত্র নরাণাং ধর্মনিশ্চয়ে
যত্তুষ্যন্ত্যস্য পিতরো মাতা চাপ্যেকদর্শিনী

অর্জুনেনার্জিতাং পূর্বং হৃতাং লোভাদসাধুভিঃ
আচ্ছিদ্য ধার্তরাষ্ট্রেভ্যো ভুঙ্ক্ষ্ব যৌধিষ্ঠিরীং শ্রিয়ম্

অদ্য পশ্যন্তু কুরবঃ কর্ণার্জুনসমাগমম্
সৌভ্রাত্রেণ তদালক্ষ্য সংনমন্তামসাধবঃ

কর্ণার্জুনৌ বৈ ভবতাং যথা রামজনার্দনৌ
অসাধ্যং কিং নু লোকে স্যাদ্যুবয়োঃ সহিতাত্মনোঃ

কর্ণ শোভিষ্যসে নূনং পঞ্চভির্ভ্রাতৃভির্বৃতঃ
বেদৈঃ পরিবৃতো ব্রহ্মা যথা বেদাঙ্গপঞ্চমৈঃ

উপপন্নো গুণৈঃ শ্রেষ্ঠো জ্যেষ্ঠঃ শ্রেষ্ঠেষু বন্ধুষু
সূতপুত্রেতি মা শব্দঃ পার্থস্ত্বমসি বীর্যবান্