Utshovঅধ্যায় 144
144.1
বৈশংপায়ন উবাচ
ততঃ সূর্যান্নিশ্চরিতাং কর্ণঃ শুশ্রাব ভারতীম্
দুরত্যয়াং প্রণয়িনীং পিতৃবদ্ভাস্করেরিতাম্
144.2
সত্যমাহ পৃথা বাক্যং কর্ণ মাতৃবচঃ কুরু
শ্রেয়স্তে স্যান্নরব্যাঘ্র সর্বমাচরতস্তথা
144.3
এবমুক্তস্য মাত্রা চ স্বয়ং পিত্রা চ ভানুনা
চচাল নৈব কর্ণস্য মতিঃ সত্যধৃতেস্তদা
144.4
কর্ণ উবাচ
ন তে ন শ্রদ্দধে বাক্যং ক্ষত্রিয়ে ভাষিতং ত্বয়া
ধর্মদ্বারং মমৈতত্স্যান্নিয়োগকরণং তব
144.5
অকরোন্ময়ি যত্পাপং ভবতী সুমহাত্যয়ম্
অবকীর্ণোঽস্মি তে তেন তদ্যশঃকীর্তিনাশনম্
144.6
অহং চ ক্ষত্রিয়ো জাতো ন প্রাপ্তঃ ক্ষত্রসত্ক্রিয়াম্
ত্বত্কৃতে কিং নু পাপীয়ঃ শত্রুঃ কুর্যান্মমাহিতম্
144.7
ক্রিয়াকালে ত্বনুক্রোশমকৃত্বা ত্বমিমং মম
হীনসংস্কারসময়মদ্য মাং সমচূচুদঃ
144.8
ন বৈ মম হিতং পূর্বং মাতৃবচ্চেষ্টিতং ত্বয়া
সা মাং সংবোধয়স্যদ্য কেবলাত্মহিতৈষিণী
144.9
কৃষ্ণেন সহিতাত্কো বৈ ন ব্যথেত ধনংজয়াৎ
কোঽদ্য ভীতং ন মাং বিদ্যাত্পার্থানাং সমিতিং গতম্
144.10
অভ্রাতা বিদিতঃ পূর্বং যুদ্ধকালে প্রকাশিতঃ
পাণ্ডবান্যদি গচ্ছামি কিং মাং ক্ষত্রং বদিষ্যতি
144.11
সর্বকামৈঃ সংবিভক্তঃ পূজিতশ্চ সদা ভৃশম্
অহং বৈ ধার্তরাষ্ট্রাণাং কুর্যাং তদফলং কথম্
144.12
উপনহ্য পরৈর্বৈরং যে মাং নিত্যমুপাসতে
নমস্কুর্বন্তি চ সদা বসবো বাসবং যথা
144.13
মম প্রাণেন যে শত্রূঞ্শক্তাঃ প্রতিসমাসিতুম্
মন্যন্তেঽদ্য কথং তেষামহং ভিন্দ্যাং মনোরথম্
144.14
ময়া প্লবেন সংগ্রামং তিতীর্ষন্তি দুরত্যয়ম্
অপারে পারকামা যে ত্যজেয়ং তানহং কথম্
144.15
অয়ং হি কালঃ সংপ্রাপ্তো ধার্তরাষ্ট্রোপজীবিনাম্
নির্বেষ্টব্যং ময়া তত্র প্রাণানপরিরক্ষতা
144.16
কৃতার্থাঃ সুভৃতা যে হি কৃত্যকাল উপস্থিতে
অনবেক্ষ্য কৃতং পাপা বিকুর্বন্ত্যনবস্থিতাঃ
144.17
রাজকিল্বিষিণাং তেষাং ভর্তৃপিণ্ডাপহারিণাম্
নৈবায়ং ন পরো লোকো বিদ্যতে পাপকর্মণাম্
144.18
ধৃতরাষ্ট্রস্য পুত্রাণামর্থে যোত্স্যামি তে সুতৈঃ
বলং চ শক্তিং চাস্থায় ন বৈ ত্বয্যনৃতং বদে
144.19
আনৃশংস্যমথো বৃত্তং রক্ষন্সত্পুরুষোচিতম্
অতোঽর্থকরমপ্যেতন্ন করোম্যদ্য তে বচঃ
144.20
ন তু তেঽয়ং সমারম্ভো ময়ি মোঘো ভবিষ্যতি
বধ্যান্বিষহ্যান্সংগ্রামে ন হনিষ্যামি তে সুতান্
যুধিষ্ঠিরং চ ভীমং চ যমৌ চৈবার্জুনাদৃতে
144.21
অর্জুনেন সমং যুদ্ধং মম যৌধিষ্ঠিরে বলে
অর্জুনং হি নিহত্যাজৌ সংপ্রাপ্তং স্যাত্ফলং ময়া
যশসা চাপি যুজ্যেয়ং নিহতঃ সব্যসাচিনা
144.22
ন তে জাতু নশিষ্যন্তি পুত্রাঃ পঞ্চ যশস্বিনি
নিরর্জুনাঃ সকর্ণা বা সার্জুনা বা হতে ময়ি
144.23
বৈশংপায়ন উবাচ
ইতি কর্ণবচঃ শ্রুত্বা কুন্তী দুঃখাত্প্রবেপতী
উবাচ পুত্রমাশ্লিষ্য কর্ণং ধৈর্যাদকম্পিতম্
144.24
এবং বৈ ভাব্যমেতেন ক্ষয়ং যাস্যন্তি কৌরবাঃ
যথা ত্বং ভাষসে কর্ণ দৈবং তু বলবত্তরম্
144.25
ত্বয়া চতুর্ণাং ভ্রাতৄণামভয়ং শত্রুকর্শন
দত্তং তত্প্রতিজানীহি সংগরপ্রতিমোচনম্
144.26
অনাময়ং স্বস্তি চেতি পৃথাথো কর্ণমব্রবীৎ
তাং কর্ণোঽভ্যবদত্প্রীতস্ততস্তৌ জগ্মতুঃ পৃথক্