Utshovঅধ্যায় 145
145.1
বৈশংপায়ন উবাচ
আগম্য হাস্তিনপুরাদুপপ্লব্যমরিংদমঃ
পাণ্ডবানাং যথাবৃত্তং কেশবঃ সর্বমুক্তবান্
145.2
সংভাষ্য সুচিরং কালং মন্ত্রয়িত্বা পুনঃ পুনঃ
স্বমেবাবসথং শৌরির্বিশ্রামার্থং জগাম হ
145.3
বিসৃজ্য সর্বান্নৃপতীন্বিরাটপ্রমুখাংস্তদা
পাণ্ডবা ভ্রাতরঃ পঞ্চ ভানাবস্তংগতে সতি
145.4
সংধ্যামুপাস্য ধ্যায়ন্তস্তমেব গতমানসাঃ
আনায্য কৃষ্ণং দাশার্হং পুনর্মন্ত্রমমন্ত্রয়ন্
145.5
যুধিষ্ঠির উবাচ
ত্বয়া নাগপুরং গত্বা সভায়াং ধৃতরাষ্ট্রজঃ
কিমুক্তঃ পুণ্ডরীকাক্ষ তন্নঃ শংসিতুমর্হসি
145.6
বাসুদেব উবাচ
ময়া নাগপুরং গত্বা সভায়াং ধৃতরাষ্ট্রজঃ
তথ্যং পথ্যং হিতং চোক্তো ন চ গৃহ্ণাতি দুর্মতিঃ
145.7
যুধিষ্ঠির উবাচ
তস্মিন্নুত্পথমাপন্নে কুরুবৃদ্ধঃ পিতামহঃ
কিমুক্তবান্হৃষীকেশ দুর্যোধনমমর্ষণম্
আচার্যো বা মহাবাহো ভারদ্বাজঃ কিমব্রবীৎ
145.8
পিতা যবীয়ানস্মাকং ক্ষত্তা ধর্মভৃতাং বরঃ
পুত্রশোকাভিসংতপ্তঃ কিমাহ ধৃতরাষ্ট্রজম্
145.9
কিং চ সর্বে নৃপতয়ঃ সভায়াং যে সমাসতে
উক্তবন্তো যথাতত্ত্বং তদ্ব্রূহি ত্বং জনার্দন
145.10
উক্তবান্হি ভবান্সর্বং বচনং কুরুমুখ্যয়োঃ
কামলোভাভিভূতস্য মন্দস্য প্রাজ্ঞমানিনঃ
145.11
অপ্রিয়ং হৃদয়ে মহ্যং তন্ন তিষ্ঠতি কেশব
তেষাং বাক্যানি গোবিন্দ শ্রোতুমিচ্ছাম্যহং বিভো
145.12
যথা চ নাভিপদ্যেত কালস্তাত তথা কুরু
ভবান্হি নো গতিঃ কৃষ্ণ ভবান্নাথো ভবান্গুরুঃ
145.13
বাসুদেব উবাচ
শৃণু রাজন্যথা বাক্যমুক্তো রাজা সুয়োধনঃ
মধ্যে কুরূণাং রাজেন্দ্র সভায়াং তন্নিবোধ মে
145.14
ময়া বৈ শ্রাবিতে বাক্যে জহাস ধৃতরাষ্ট্রজঃ
অথ ভীষ্মঃ সুসংক্রুদ্ধ ইদং বচনমব্রবীৎ
145.15
দুর্যোধন নিবোধেদং কুলার্থে যদ্ব্রবীমি তে
তচ্ছ্রুত্বা রাজশার্দূল স্বকুলস্য হিতং কুরু
145.16
মম তাত পিতা রাজঞ্শংতনুর্লোকবিশ্রুতঃ
তস্যাহমেক এবাসং পুত্রঃ পুত্রবতাং বরঃ
145.17
তস্য বুদ্ধিঃ সমুত্পন্না দ্বিতীয়ঃ স্যাত্কথং সুতঃ
একপুত্রমপুত্রং বৈ প্রবদন্তি মনীষিণঃ
145.18
ন চোচ্ছেদং কুলং যায়াদ্বিস্তীর্যেত কথং যশঃ
তস্যাহমীপ্সিতং বুদ্ধ্বা কালীং মাতরমাবহম্
145.19
প্রতিজ্ঞাং দুষ্করাং কৃত্বা পিতুরর্থে কুলস্য চ
অরাজা চোর্ধ্বরেতাশ্চ যথা সুবিদিতং তব
প্রতীতো নিবসাম্যেষ প্রতিজ্ঞামনুপালয়ন্
145.20
তস্যাং জজ্ঞে মহাবাহুঃ শ্রীমান্কুরুকুলোদ্বহঃ
বিচিত্রবীর্যো ধর্মাত্মা কনীয়ান্মম পার্থিবঃ
145.21
স্বর্যাতেঽহং পিতরি তং স্বরাজ্যে সংন্যবেশয়ম্
বিচিত্রবীর্যং রাজানং ভৃত্যো ভূত্বা হ্যধশ্চরঃ
145.22
তস্যাহং সদৃশান্দারান্রাজেন্দ্র সমুদাবহম্
জিত্বা পার্থিবসংঘাতমপি তে বহুশঃ শ্রুতম্
145.23
ততো রামেণ সমরে দ্বন্দ্বয়ুদ্ধমুপাগমম্
স হি রামভয়াদেভির্নাগরৈর্বিপ্রবাসিতঃ
দারেষ্বতিপ্রসক্তশ্চ যক্ষ্মাণং সমপদ্যত
145.24
যদা ত্বরাজকে রাষ্ট্রে ন ববর্ষ সুরেশ্বরঃ
তদাভ্যধাবন্মামেব প্রজাঃ ক্ষুদ্ভয়পীডিতাঃ
145.25
প্রজা ঊচুঃ
উপক্ষীণাঃ প্রজাঃ সর্বা রাজা ভব ভবায় নঃ
ঈতয়ো নুদ ভদ্রং তে শংতনোঃ কুলবর্ধন
145.26
পীড্যন্তে তে প্রজাঃ সর্বা ব্যাধিভির্ভৃশদারুণৈঃ
অল্পাবশিষ্টা গাঙ্গেয় তাঃ পরিত্রাতুমর্হসি
145.27
ব্যাধীন্প্রণুদ্য বীর ত্বং প্রজা ধর্মেণ পালয়
ত্বয়ি জীবতি মা রাষ্ট্রং বিনাশমুপগচ্ছতু
145.28
ভীষ্ম উবাচ
প্রজানাং ক্রোশতীনাং বৈ নৈবাক্ষুভ্যত মে মনঃ
প্রতিজ্ঞাং রক্ষমাণস্য সদ্বৃত্তং স্মরতস্তথা
145.29
ততঃ পৌরা মহারাজ মাতা কালী চ মে শুভা
ভৃত্যাঃ পুরোহিতাচার্যা ব্রাহ্মণাশ্চ বহুশ্রুতাঃ
মামূচুর্ভৃশসংতপ্তা ভব রাজেতি সংততম্
145.30
প্রতীপরক্ষিতং রাষ্ট্রং ত্বাং প্রাপ্য বিনশিষ্যতি
স ত্বমস্মদ্ধিতার্থং বৈ রাজা ভব মহামতে
145.31
ইত্যুক্তঃ প্রাঞ্জলির্ভূত্বা দুঃখিতো ভৃশমাতুরঃ
তেভ্যো ন্যবেদয়ং পুত্র প্রতিজ্ঞাং পিতৃগৌরবাৎ
ঊর্ধ্বরেতা হ্যরাজা চ কুলস্যার্থে পুনঃ পুনঃ
145.32
ততোঽহং প্রাঞ্জলির্ভূত্বা মাতরং সংপ্রসাদয়ম্
নাম্ব শংতনুনা জাতঃ কৌরবং বংশমুদ্বহন্
প্রতিজ্ঞাং বিতথাং কুর্যামিতি রাজন্পুনঃ পুনঃ
145.33
বিশেষতস্ত্বদর্থং চ ধুরি মা মাং নিয়োজয়
অহং প্রেষ্যশ্চ দাসশ্চ তবাম্ব সুতবত্সলে
145.34
এবং তামনুনীয়াহং মাতরং জনমেব চ
অয়াচং ভ্রাতৃদারেষু তদা ব্যাসং মহামুনিম্
145.35
সহ মাত্রা মহারাজ প্রসাদ্য তমৃষিং তদা
অপত্যার্থময়াচং বৈ প্রসাদং কৃতবাংশ্চ সঃ
ত্রীন্স পুত্রানজনয়ত্তদা ভরতসত্তম
145.36
অন্ধঃ করণহীনেতি ন বৈ রাজা পিতা তব
রাজা তু পাণ্ডুরভবন্মহাত্মা লোকবিশ্রুতঃ
145.37
স রাজা তস্য তে পুত্রাঃ পিতুর্দায়াদ্যহারিণঃ
মা তাত কলহং কার্ষী রাজ্যস্যার্ধং প্রদীয়তাম্
145.38
ময়ি জীবতি রাজ্যং কঃ সংপ্রশাসেত্পুমানিহ
মাবমংস্থা বচো মহ্যং শমমিচ্ছামি বঃ সদা
145.39
ন বিশেষোঽস্তি মে পুত্র ত্বয়ি তেষু চ পার্থিব
মতমেতত্পিতুস্তুভ্যং গান্ধার্যা বিদুরস্য চ
145.40
শ্রোতব্যং যদি বৃদ্ধানাং মাতিশঙ্কীর্বচো মম
নাশয়িষ্যসি মা সর্বমাত্মানং পৃথিবীং তথা