Utshovঅধ্যায় 146
146.1
বাসুদেব উবাচ
ভীষ্মেণোক্তে ততো দ্রোণো দুর্যোধনমভাষত
মধ্যে নৃপাণাং ভদ্রং তে বচনং বচনক্ষমঃ
146.2
প্রাতীপঃ শংতনুস্তাত কুলস্যার্থে যথোত্থিতঃ
তথা দেবব্রতো ভীষ্মঃ কুলস্যার্থে স্থিতোঽভবৎ
146.3
ততঃ পাণ্ডুর্নরপতিঃ সত্যসংধো জিতেন্দ্রিয়ঃ
রাজা কুরূণাং ধর্মাত্মা সুব্রতঃ সুসমাহিতঃ
146.4
জ্যেষ্ঠায় রাজ্যমদদাদ্ধৃতরাষ্ট্রায় ধীমতে
যবীয়সস্তথা ক্ষত্তুঃ কুরুবংশবিবর্ধনঃ
146.5
ততঃ সিংহাসনে রাজন্স্থাপয়িত্বৈনমচ্যুতম্
বনং জগাম কৌরব্যো ভার্যাভ্যাং সহিতোঽনঘ
146.6
নীচৈঃ স্থিত্বা তু বিদুর উপাস্তে স্ম বিনীতবৎ
প্রেষ্যবত্পুরুষব্যাঘ্রো বালব্যজনমুত্ক্ষিপন্
146.7
ততঃ সর্বাঃ প্রজাস্তাত ধৃতরাষ্ট্রং জনেশ্বরম্
অন্বপদ্যন্ত বিধিবদ্যথা পাণ্ডুং নরাধিপম্
146.8
বিসৃজ্য ধৃতরাষ্ট্রায় রাজ্যং স বিদুরায় চ
চচার পৃথিবীং পাণ্ডুঃ সর্বাং পরপুরংজয়ঃ
146.9
কোশসংজননে দানে ভৃত্যানাং চান্ববেক্ষণে
ভরণে চৈব সর্বস্য বিদুরঃ সত্যসংগরঃ
146.10
সংধিবিগ্রহসংয়ুক্তো রাজ্ঞঃ সংবাহনক্রিয়াঃ
অবৈক্ষত মহাতেজা ভীষ্মঃ পরপুরংজয়ঃ
146.11
সিংহাসনস্থো নৃপতির্ধৃতরাষ্ট্রো মহাবলঃ
অন্বাস্যমানঃ সততং বিদুরেণ মহাত্মনা
146.12
কথং তস্য কুলে জাতঃ কুলভেদং ব্যবস্যসি
সংভূয় ভ্রাতৃভিঃ সার্ধং ভুঙ্ক্ষ্ব ভোগাঞ্জনাধিপ
146.13
ব্রবীম্যহং ন কার্পণ্যান্নার্থহেতোঃ কথংচন
ভীষ্মেণ দত্তমশ্নামি ন ত্বয়া রাজসত্তম
146.14
নাহং ত্বত্তোঽভিকাঙ্ক্ষিষ্যে বৃত্ত্যুপায়ং জনাধিপ
যতো ভীষ্মস্ততো দ্রোণো যদ্ভীষ্মস্ত্বাহ তত্কুরু
146.15
দীয়তাং পাণ্ডুপুত্রেভ্যো রাজ্যার্ধমরিকর্শন
সমমাচার্যকং তাত তব তেষাং চ মে সদা
146.16
অশ্বত্থামা যথা মহ্যং তথা শ্বেতহয়ো মম
বহুনা কিং প্রলাপেন যতো ধর্মস্ততো জয়ঃ
146.17
এবমুক্তে মহারাজ দ্রোণেনামিততেজসা
ব্যাজহার ততো বাক্যং বিদুরঃ সত্যসংগরঃ
পিতুর্বদনমন্বীক্ষ্য পরিবৃত্য চ ধর্মবিৎ
146.18
দেবব্রত নিবোধেদং বচনং মম ভাষতঃ
প্রনষ্টঃ কৌরবো বংশস্ত্বয়ায়ং পুনরুদ্ধৃতঃ
146.19
তন্মে বিলপমানস্য বচনং সমুপেক্ষসে
কোঽয়ং দুর্যোধনো নাম কুলেঽস্মিন্কুলপাংসনঃ
146.20
যস্য লোভাভিভূতস্য মতিং সমনুবর্তসে
অনার্যস্যাকৃতজ্ঞস্য লোভোপহতচেতসঃ
অতিক্রামতি যঃ শাস্ত্রং পিতুর্ধর্মার্থদর্শিনঃ
146.21
এতে নশ্যন্তি কুরবো দুর্যোধনকৃতেন বৈ
যথা তে ন প্রণশ্যেয়ুর্মহারাজ তথা কুরু
146.22
মাং চৈব ধৃতরাষ্ট্রং চ পূর্বমেব মহাদ্যুতে
চিত্রকার ইবালেখ্যং কৃত্বা মা স্ম বিনাশয়
প্রজাপতিঃ প্রজাঃ সৃষ্ট্বা যথা সংহরতে তথা
146.23
নোপেক্ষস্ব মহাবাহো পশ্যমানঃ কুলক্ষয়ম্
অথ তেঽদ্য মতির্নষ্টা বিনাশে প্রত্যুপস্থিতে
বনং গচ্ছ ময়া সার্ধং ধৃতরাষ্ট্রেণ চৈব হ
146.24
বদ্ধ্বা বা নিকৃতিপ্রজ্ঞং ধার্তরাষ্ট্রং সুদুর্মতিম্
সাধ্বিদং রাজ্যমদ্যাস্তু পাণ্ডবৈরভিরক্ষিতম্
146.25
প্রসীদ রাজশার্দূল বিনাশো দৃশ্যতে মহান্
পাণ্ডবানাং কুরূণাং চ রাজ্ঞাং চামিততেজসাম্
146.26
বিররামৈবমুক্ত্বা তু বিদুরো দীনমানসঃ
প্রধ্যায়মানঃ স তদা নিঃশ্বসংশ্চ পুনঃ পুনঃ
146.27
ততোঽথ রাজ্ঞঃ সুবলস্য পুত্রী; ধর্মার্থয়ুক্তং কুলনাশভীতা
দুর্যোধনং পাপমতিং নৃশংসং; রাজ্ঞাং সমক্ষং সুতমাহ কোপাৎ
146.28
যে পার্থিবা রাজসভাং প্রবিষ্টা; ব্রহ্মর্ষয়ো যে চ সভাসদোঽন্যে
শৃণ্বন্তু বক্ষ্যামি তবাপরাধং; পাপস্য সামাত্যপরিচ্ছদস্য
146.29
রাজ্যং কুরূণামনুপূর্বভোগ্যং; ক্রমাগতো নঃ কুলধর্ম এষঃ
ত্বং পাপবুদ্ধেঽতিনৃশংসকর্ম;ন্রাজ্যং কুরূণামনয়াদ্বিহংসি
146.30
রাজ্যে স্থিতো ধৃতরাষ্ট্রো মনীষী; তস্যানুজো বিদুরো দীর্ঘদর্শী
এতাবতিক্রম্য কথং নৃপত্বং; দুর্যোধন প্রার্থয়সেঽদ্য মোহাৎ
146.31
রাজা চ ক্ষত্তা চ মহানুভাবৌ; ভীষ্মে স্থিতে পরবন্তৌ ভবেতাম্
অয়ং তু ধর্মজ্ঞতয়া মহাত্মা; ন রাজ্যকামো নৃবরো নদীজঃ
146.32
রাজ্যং তু পাণ্ডোরিদমপ্রধৃষ্যং; তস্যাদ্য পুত্রাঃ প্রভবন্তি নান্যে
রাজ্যং তদেতন্নিখিলং পাণ্ডবানাং; পৈতামহং পুত্রপৌত্রানুগামি
146.33
যদ্বৈ ব্রূতে কুরুমুখ্যো মহাত্মা; দেবব্রতঃ সত্যসংধো মনীষী
সর্বং তদস্মাভিরহত্য ধর্মং; গ্রাহ্যং স্বধর্মং পরিপালয়দ্ভিঃ
146.34
অনুজ্ঞয়া চাথ মহাব্রতস্য; ব্রূয়ান্নৃপো যদ্বিদুরস্তথৈব
কার্যং ভবেত্তত্সুহৃদ্ভির্নিয়ুজ্য; ধর্মং পুরস্কৃত্য সুদীর্ঘকালম্
146.35
ন্যায়াগতং রাজ্যমিদং কুরূণাং; যুধিষ্ঠিরঃ শাস্তু বৈ ধর্মপুত্রঃ
প্রচোদিতো ধৃতরাষ্ট্রেণ রাজ্ঞা; পুরস্কৃতঃ শাংতনবেন চৈব