Utshovঅধ্যায় 147
147.1
বাসুদেব উবাচ
এবমুক্তে তু গান্ধার্যা ধৃতরাষ্ট্রো জনেশ্বরঃ
দুর্যোধনমুবাচেদং নৃপমধ্যে জনাধিপ
147.2
দুর্যোধন নিবোধেদং যত্ত্বাং বক্ষ্যামি পুত্রক
তথা তত্কুরু ভদ্রং তে যদ্যস্তি পিতৃগৌরবম্
147.3
সোমঃ প্রজাপতিঃ পূর্বং কুরূণাং বংশবর্ধনঃ
সোমাদ্বভূব ষষ্ঠো বৈ যয়াতির্নহুষাত্মজঃ
147.4
তস্য পুত্রা বভূবুশ্চ পঞ্চ রাজর্ষিসত্তমাঃ
তেষাং যদুর্মহাতেজা জ্যেষ্ঠঃ সমভবত্প্রভুঃ
147.5
পূরুর্যবীয়াংশ্চ ততো যোঽস্মাকং বংশবর্ধনঃ
শর্মিষ্ঠায়াঃ সংপ্রসূতো দুহিতুর্বৃষপর্বণঃ
147.6
যদুশ্চ ভরতশ্রেষ্ঠ দেবয়ান্যাঃ সুতোঽভবৎ
দৌহিত্রস্তাত শুক্রস্য কাব্যস্যামিততেজসঃ
147.7
যাদবানাং কুলকরো বলবান্বীর্যসংমতঃ
অবমেনে স তু ক্ষত্রং দর্পপূর্ণঃ সুমন্দধীঃ
147.8
ন চাতিষ্ঠত্পিতুঃ শাস্ত্রে বলদর্পবিমোহিতঃ
অবমেনে চ পিতরং ভ্রাতৄংশ্চাপ্যপরাজিতঃ
147.9
পৃথিব্যাং চতুরন্তায়াং যদুরেবাভবদ্বলী
বশে কৃত্বা স নৃপতীনবসন্নাগসাহ্বয়ে
147.10
তং পিতা পরমক্রুদ্ধো যয়াতির্নহুষাত্মজঃ
শশাপ পুত্রং গান্ধারে রাজ্যাচ্চ ব্যপরোপয়ৎ
147.11
য চৈনমন্ববর্তন্ত ভ্রাতরো বলদর্পিতম্
শশাপ তানপি ক্রুদ্ধো যয়াতিস্তনয়ানথ
147.12
যবীয়াংসং ততঃ পূরুং পুত্রং স্ববশবর্তিনম্
রাজ্যে নিবেশয়ামাস বিধেয়ং নৃপসত্তমঃ
147.13
এবং জ্যেষ্ঠোঽপ্যথোত্সিক্তো ন রাজ্যমভিজায়তে
যবীয়াংসোঽভিজায়ন্তে রাজ্যং বৃদ্ধোপসেবয়া
147.14
তথৈব সর্বধর্মজ্ঞঃ পিতুর্মম পিতামহঃ
প্রতীপঃ পৃথিবীপালস্ত্রিষু লোকেষু বিশ্রুতঃ
147.15
তস্য পার্থিবসিংহস্য রাজ্যং ধর্মেণ শাসতঃ
ত্রয়ঃ প্রজজ্ঞিরে পুত্রা দেবকল্পা যশস্বিনঃ
147.16
দেবাপিরভবজ্জ্যেষ্ঠো বাহ্লীকস্তদনন্তরম্
তৃতীয়ঃ শংতনুস্তাত ধৃতিমান্মে পিতামহঃ
147.17
দেবাপিস্তু মহাতেজাস্ত্বগ্দোষী রাজসত্তমঃ
ধার্মিকঃ সত্যবাদী চ পিতুঃ শুশ্রূষণে রতঃ
147.18
পৌরজানপদানাং চ সংমতঃ সাধুসত্কৃতঃ
সর্বেষাং বালবৃদ্ধানাং দেবাপির্হৃদয়ংগমঃ
147.19
প্রাজ্ঞশ্চ সত্যসংধশ্চ সর্বভূতহিতে রতঃ
বর্তমানঃ পিতুঃ শাস্ত্রে ব্রাহ্মণানাং তথৈব চ
147.20
বাহ্লীকস্য প্রিয়ো ভ্রাতা শংতনোশ্চ মহাত্মনঃ
সৌভ্রাত্রং চ পরং তেষাং সহিতানাং মহাত্মনাম্
147.21
অথ কালস্য পর্যায়ে বৃদ্ধো নৃপতিসত্তমঃ
সংভারানভিষেকার্থং কারয়ামাস শাস্ত্রতঃ
মঙ্গলানি চ সর্বাণি কারয়ামাস চাভিভূঃ
147.22
তং ব্রাহ্মণাশ্চ বৃদ্ধাশ্চ পৌরজানপদৈঃ সহ
সর্বে নিবারয়ামাসুর্দেবাপেরভিষেচনম্
147.23
স তচ্ছ্রুত্বা তু নৃপতিরভিষেকনিবারণম্
অশ্রুকণ্ঠোঽভবদ্রাজা পর্যশোচত চাত্মজম্
147.24
এবং বদান্যো ধর্মজ্ঞঃ সত্যসংধশ্চ সোঽভবৎ
প্রিয়ঃ প্রজানামপি সংস্ত্বগ্দোষেণ প্রদূষিতঃ
147.25
হীনাঙ্গং পৃথিবীপালং নাভিনন্দন্তি দেবতাঃ
ইতি কৃত্বা নৃপশ্রেষ্ঠং প্রত্যষেধন্দ্বিজর্ষভাঃ
147.26
ততঃ প্রব্যথিতাত্মাসৌ পুত্রশোকসমন্বিতঃ
মমার তং মৃতং দৃষ্ট্বা দেবাপিঃ সংশ্রিতো বনম্
147.27
বাহ্লীকো মাতুলকুলে ত্যক্ত্বা রাজ্যং ব্যবস্থিতঃ
পিতৃভ্রাতৄন্পরিত্যজ্য প্রাপ্তবান্পুরমৃদ্ধিমৎ
147.28
বাহ্লীকেন ত্বনুজ্ঞাতঃ শংতনুর্লোকবিশ্রুতঃ
পিতর্যুপরতে রাজন্রাজা রাজ্যমকারয়ৎ
147.29
তথৈবাহং মতিমতা পরিচিন্ত্যেহ পাণ্ডুনা
জ্যেষ্ঠঃ প্রভ্রংশিতো রাজ্যাদ্ধীনাঙ্গ ইতি ভারত
147.30
পাণ্ডুস্তু রাজ্যং সংপ্রাপ্তঃ কনীয়ানপি সন্নৃপঃ
বিনাশে তস্য পুত্রাণামিদং রাজ্যমরিংদম
ময্যভাগিনি রাজ্যায় কথং ত্বং রাজ্যমিচ্ছসি
147.31
যুধিষ্ঠিরো রাজপুত্রো মহাত্মা; ন্যায়াগতং রাজ্যমিদং চ তস্য
স কৌরবস্যাস্য জনস্য ভর্তা; প্রশাসিতা চৈব মহানুভাবঃ
147.32
স সত্যসংধঃ সততাপ্রমত্তঃ; শাস্ত্রে স্থিতো বন্ধুজনস্য সাধুঃ
প্রিয়ঃ প্রজানাং সুহৃদানুকম্পী; জিতেন্দ্রিয়ঃ সাধুজনস্য ভর্তা
147.33
ক্ষমা তিতিক্ষা দম আর্জবং চ; সত্যব্রতত্বং শ্রুতমপ্রমাদঃ
ভূতানুকম্পা হ্যনুশাসনং চ; যুধিষ্ঠিরে রাজগুণাঃ সমস্তাঃ
147.34
অরাজপুত্রস্ত্বমনার্যবৃত্তো; লুব্ধস্তথা বন্ধুষু পাপবুদ্ধিঃ
ক্রমাগতং রাজ্যমিদং পরেষাং; হর্তুং কথং শক্ষ্যসি দুর্বিনীতঃ
147.35
প্রয়চ্ছ রাজ্যার্ধমপেতমোহঃ; সবাহনং ত্বং সপরিচ্ছদং চ
ততোঽবশেষং তব জীবিতস্য; সহানুজস্যৈব ভবেন্নরেন্দ্র