অধ্যায় 148

148.1

বাসুদেব উবাচ
এবমুক্তে তু ভীষ্মেণ দ্রোণেন বিদুরেণ চ
গান্ধার্যা ধৃতরাষ্ট্রেণ ন চ মন্দোঽন্ববুধ্যত

অবধূয়োত্থিতঃ ক্রুদ্ধো রোষাত্সংরক্তলোচনঃ
অন্বদ্রবন্ত তং পশ্চাদ্রাজানস্ত্যক্তজীবিতাঃ

অজ্ঞাপয়চ্চ রাজ্ঞস্তান্পার্থিবান্দুষ্টচেতসঃ
প্রয়াধ্বং বৈ কুরুক্ষেত্রং পুষ্যোঽদ্যেতি পুনঃ পুনঃ

ততস্তে পৃথিবীপালাঃ প্রয়য়ুঃ সহসৈনিকাঃ
ভীষ্মং সেনাপতিং কৃত্বা সংহৃষ্টাঃ কালচোদিতাঃ

অক্ষৌহিণ্যো দশৈকা চ পার্থিবানাং সমাগতাঃ
তাসাং প্রমুখতো ভীষ্মস্তালকেতুর্ব্যরোচত
যদত্র যুক্তং প্রাপ্তং চ তদ্বিধত্স্ব বিশাং পতে

উক্তং ভীষ্মেণ যদ্বাক্যং দ্রোণেন বিদুরেণ চ
গান্ধার্যা ধৃতরাষ্ট্রেণ সমক্ষং মম ভারত
এতত্তে কথিতং রাজন্যদ্বৃত্তং কুরুসংসদি

সাম আদৌ প্রয়ুক্তং মে রাজন্সৌভ্রাত্রমিচ্ছতা
অভেদাত্কুরুবংশস্য প্রজানাং চ বিবৃদ্ধয়ে

পুনর্ভেদশ্চ মে যুক্তো যদা সাম ন গৃহ্যতে
কর্মানুকীর্তনং চৈব দেবমানুষসংহিতম্

যদা নাদ্রিয়তে বাক্যং সামপূর্বং সুয়োধনঃ
তদা ময়া সমানীয় ভেদিতাঃ সর্বপার্থিবাঃ

অদ্ভুতানি চ ঘোরাণি দারুণানি চ ভারত
অমানুষাণি কর্মাণি দর্শিতানি চ মে বিভো

ভর্ত্সয়িত্বা তু রাজ্ঞস্তাংস্তৃণীকৃত্য সুয়োধনম্
রাধেয়ং ভীষয়িত্বা চ সৌবলং চ পুনঃ পুনঃ

ন্যূনতাং ধার্তরাষ্ট্রাণাং নিন্দাং চৈব পুনঃ পুনঃ
ভেদয়িত্বা নৃপান্সর্বান্বাগ্ভির্মন্ত্রেণ চাসকৃৎ

পুনঃ সামাভিসংয়ুক্তং সংপ্রদানমথাব্রুবম্
অভেদাত্কুরুবংশস্য কার্যয়োগাত্তথৈব চ

তে বালা ধৃতরাষ্ট্রস্য ভীষ্মস্য বিদুরস্য চ
তিষ্ঠেয়ুঃ পাণ্ডবাঃ সর্বে হিত্বা মানমধশ্চরাঃ

প্রয়চ্ছন্তু চ তে রাজ্যমনীশাস্তে ভবন্তু চ
যথাহ রাজা গাঙ্গেয়ো বিদুরশ্চ তথাস্তু তৎ

সর্বং ভবতু তে রাজ্যং পঞ্চ গ্রামান্বিসর্জয়
অবশ্যং ভরণীয়া হি পিতুস্তে রাজসত্তম

এবমুক্তস্তু দুষ্টাত্মা নৈব ভাবং ব্যমুঞ্চত
দণ্ডং চতুর্থং পশ্যামি তেষু পাপেষু নান্যথা

নির্যাতাশ্চ বিনাশায় কুরুক্ষেত্রং নরাধিপাঃ
এতত্তে কথিতং সর্বং যদ্বৃত্তং কুরুসংসদি

ন তে রাজ্যং প্রয়চ্ছন্তি বিনা যুদ্ধেন পাণ্ডব
বিনাশহেতবঃ সর্বে প্রত্যুপস্থিতমৃত্যবঃ