UtshovChapter 148
148.1
वासुदेव उवाच
एवमुक्ते तु भीष्मेण द्रोणेन विदुरेण च
गान्धार्या धृतराष्ट्रेण न च मन्दोऽन्वबुध्यत
Vasudeva uvacha
Evamukte tu bhishmena dronena vidurena cha
Gandharya dhritarashtrena na cha mandonvabudhyata
148.2
अवधूयोत्थितः क्रुद्धो रोषात्संरक्तलोचनः
अन्वद्रवन्त तं पश्चाद्राजानस्त्यक्तजीविताः
Avadhuyotthitah kruddho roshatsanraktalochanah
Anvadravanta tam pashchadrajanastyaktajivitah
148.3
अज्ञापयच्च राज्ञस्तान्पार्थिवान्दुष्टचेतसः
प्रयाध्वं वै कुरुक्षेत्रं पुष्योऽद्येति पुनः पुनः
Agyapayachcha ragyastanparthivandushtachetasah
Prayadhvam vai kurukshetram pushyodyeti punah punah
148.4
ततस्ते पृथिवीपालाः प्रययुः सहसैनिकाः
भीष्मं सेनापतिं कृत्वा संहृष्टाः कालचोदिताः
Tataste prithivipalah prayayuh sahasainikah
Bhishmam senapatim kritva sanhrishtah kalachoditah
148.5
अक्षौहिण्यो दशैका च पार्थिवानां समागताः
तासां प्रमुखतो भीष्मस्तालकेतुर्व्यरोचत
यदत्र युक्तं प्राप्तं च तद्विधत्स्व विशां पते
Akshauhinyo dashaika cha parthivanam samagatah
Tasam pramukhato bhishmastalaketurvyarochata
Yadatra yuktam praptam cha tadvidhatsva visham pate
148.6
उक्तं भीष्मेण यद्वाक्यं द्रोणेन विदुरेण च
गान्धार्या धृतराष्ट्रेण समक्षं मम भारत
एतत्ते कथितं राजन्यद्वृत्तं कुरुसंसदि
Uktam bhishmena yadvakyam dronena vidurena cha
Gandharya dhritarashtrena samaksham mama bharata
Etatte kathitam rajanyadvrittam kurusansadi
148.7
साम आदौ प्रयुक्तं मे राजन्सौभ्रात्रमिच्छता
अभेदात्कुरुवंशस्य प्रजानां च विवृद्धये
Sama adau prayuktam me rajansaubhratramichchhata
Abhedatkuruvanshasya prajanam cha vivriddhaye
148.8
पुनर्भेदश्च मे युक्तो यदा साम न गृह्यते
कर्मानुकीर्तनं चैव देवमानुषसंहितम्
Punarbhedashcha me yukto yada sama na grihyate
Karmanukirtanam chaiva devamanushasanhitam
148.9
यदा नाद्रियते वाक्यं सामपूर्वं सुयोधनः
तदा मया समानीय भेदिताः सर्वपार्थिवाः
Yada nadriyate vakyam samapurvam suyodhanah
Tada maya samaniya bheditah sarvaparthivah
148.10
अद्भुतानि च घोराणि दारुणानि च भारत
अमानुषाणि कर्माणि दर्शितानि च मे विभो
Adbhutani cha ghorani darunani cha bharata
Amanushani karmani darshitani cha me vibho
148.11
भर्त्सयित्वा तु राज्ञस्तांस्तृणीकृत्य सुयोधनम्
राधेयं भीषयित्वा च सौबलं च पुनः पुनः
Bhartsayitva tu ragyastanstrinikritya suyodhanam
Radheyam bhishayitva cha saubalam cha punah punah
148.12
न्यूनतां धार्तराष्ट्राणां निन्दां चैव पुनः पुनः
भेदयित्वा नृपान्सर्वान्वाग्भिर्मन्त्रेण चासकृत्
Nyunatam dhartarashtranam nindam chaiva punah punah
Bhedayitva nripansarvanvagbhirmantrena chasakrit
148.13
पुनः सामाभिसंयुक्तं संप्रदानमथाब्रुवम्
अभेदात्कुरुवंशस्य कार्ययोगात्तथैव च
Punah samabhisanyuktam sampradanamathabruvam
Abhedatkuruvanshasya karyayogattathaiva cha
148.14
ते बाला धृतराष्ट्रस्य भीष्मस्य विदुरस्य च
तिष्ठेयुः पाण्डवाः सर्वे हित्वा मानमधश्चराः
Te bala dhritarashtrasya bhishmasya vidurasya cha
Tishtheyuh pandavah sarve hitva manamadhashcharah
148.15
प्रयच्छन्तु च ते राज्यमनीशास्ते भवन्तु च
यथाह राजा गाङ्गेयो विदुरश्च तथास्तु तत्
Prayachchhantu cha te rajyamanishaste bhavantu cha
Yathaha raja gangeyo vidurashcha tathastu tat
148.16
सर्वं भवतु ते राज्यं पञ्च ग्रामान्विसर्जय
अवश्यं भरणीया हि पितुस्ते राजसत्तम
Sarvam bhavatu te rajyam pancha gramanvisarjaya
Avashyam bharaniya hi pituste rajasattama
148.17
एवमुक्तस्तु दुष्टात्मा नैव भावं व्यमुञ्चत
दण्डं चतुर्थं पश्यामि तेषु पापेषु नान्यथा
Evamuktastu dushtatma naiva bhavam vyamunchata
Dandam chaturtham pashyami teshu papeshu nanyatha
148.18
निर्याताश्च विनाशाय कुरुक्षेत्रं नराधिपाः
एतत्ते कथितं सर्वं यद्वृत्तं कुरुसंसदि
Niryatashcha vinashaya kurukshetram naradhipah
Etatte kathitam sarvam yadvrittam kurusansadi
148.19
न ते राज्यं प्रयच्छन्ति विना युद्धेन पाण्डव
विनाशहेतवः सर्वे प्रत्युपस्थितमृत्यवः
Na te rajyam prayachchhanti vina yuddhena pandava
Vinashahetavah sarve pratyupasthitamrityavah