Utshovঅধ্যায় 149
149.1
বৈশংপায়ন উবাচ
জনার্দনবচঃ শ্রুত্বা ধর্মরাজো যুধিষ্ঠিরঃ
ভ্রাতৄনুবাচ ধর্মাত্মা সমক্ষং কেশবস্য হ
149.2
শ্রুতং ভবদ্ভির্যদ্বৃত্তং সভায়াং কুরুসংসদি
কেশবস্যাপি যদ্বাক্যং তত্সর্বমবধারিতম্
149.3
তস্মাত্সেনাবিভাগং মে কুরুধ্বং নরসত্তমাঃ
অক্ষৌহিণ্যস্তু সপ্তৈতাঃ সমেতা বিজয়ায় বৈ
149.4
তাসাং মে পতয়ঃ সপ্ত বিখ্যাতাস্তান্নিবোধত
দ্রুপদশ্চ বিরাটশ্চ ধৃষ্টদ্যুম্নশিখণ্ডিনৌ
149.5
সাত্যকিশ্চেকিতানশ্চ ভীমসেনশ্চ বীর্যবান্
এতে সেনাপ্রণেতারো বীরাঃ সর্বে তনুত্যজঃ
149.6
সর্বে বেদবিদঃ শূরাঃ সর্বে সুচরিতব্রতাঃ
হ্রীমন্তো নীতিমন্তশ্চ সর্বে যুদ্ধবিশারদাঃ
ইষ্বস্ত্রকুশলাশ্চৈব তথা সর্বাস্ত্রয়োধিনঃ
149.7
সপ্তানামপি যো নেতা সেনানাং প্রবিভাগবিৎ
যঃ সহেত রণে ভীষ্মং শরার্চিঃপাবকোপমম্
149.8
ত্বং তাবত্সহদেবাত্র প্রব্রূহি কুরুনন্দন
স্বমতং পুরুষব্যাঘ্র কো নঃ সেনাপতিঃ ক্ষমঃ
149.9
সহদেব উবাচ
সংয়ুক্ত একদুঃখশ্চ বীর্যবাংশ্চ মহীপতিঃ
যং সমাশ্রিত্য ধর্মজ্ঞং স্বমংশমনুয়ুঞ্জ্মহে
149.10
মত্স্যো বিরাটো বলবান্কৃতাস্ত্রো যুদ্ধদুর্মদঃ
প্রসহিষ্যতি সংগ্রামে ভীষ্মং তাংশ্চ মহারথান্
149.11
বৈশংপায়ন উবাচ
তথোক্তে সহদেবেন বাক্যে বাক্যবিশারদঃ
নকুলোঽনন্তরং তস্মাদিদং বচনমাদদে
149.12
বয়সা শাস্ত্রতো ধৈর্যাত্কুলেনাভিজনেন চ
হ্রীমান্কুলান্বিতঃ শ্রীমান্সর্বশাস্ত্রবিশারদঃ
149.13
বেদ চাস্ত্রং ভরদ্বাজাদ্দুর্ধর্ষঃ সত্যসংগরঃ
যো নিত্যং স্পর্ধতে দ্রোণং ভীষ্মং চৈব মহাবলম্
149.14
শ্লাঘ্যঃ পার্থিবসংঘস্য প্রমুখে বাহিনীপতিঃ
পুত্রপৌত্রৈঃ পরিবৃতঃ শতশাখ ইব দ্রুমঃ
149.15
যস্ততাপ তপো ঘোরং সদারঃ পৃথিবীপতিঃ
রোষাদ্দ্রোণবিনাশায় বীরঃ সমিতিশোভনঃ
149.16
পিতেবাস্মান্সমাধত্তে যঃ সদা পার্থিবর্ষভঃ
শ্বশুরো দ্রুপদোঽস্মাকং সেনামগ্রে প্রকর্ষতু
149.17
স দ্রোণভীষ্মাবায়ান্তৌ সহেদিতি মতির্মম
স হি দিব্যাস্ত্রবিদ্রাজা সখা চাঙ্গিরসো নৃপঃ
149.18
মাদ্রীসুতাভ্যামুক্তে তু স্বমতে কুরুনন্দনঃ
বাসবির্বাসবসমঃ সব্যসাচ্যব্রবীদ্বচঃ
149.19
যোঽয়ং তপঃপ্রভাবেন ঋষিসংতোষণেন চ
দিব্যঃ পুরুষ উত্পন্নো জ্বালাবর্ণো মহাবলঃ
149.20
ধনুষ্মান্কবচী খড্গী রথমারুহ্য দংশিতঃ
দিব্যৈর্হয়বরৈর্যুক্তমগ্নিকুণ্ডাত্সমুত্থিতঃ
149.21
গর্জন্নিব মহামেঘো রথঘোষেণ বীর্যবান্
সিংহসংহননো বীরঃ সিংহবিক্রান্তবিক্রমঃ
149.22
সিংহোরস্কো মহাবাহুঃ সিংহবক্ষা মহাবলঃ
সিংহপ্রগর্জনো বীরঃ সিংহস্কন্ধো মহাদ্যুতিঃ
149.23
সুভ্রূঃ সুদংষ্ট্রঃ সুহনুঃ সুবাহুঃ সুমুখোঽকৃশঃ
সুজত্রুঃ সুবিশালাক্ষঃ সুপাদঃ সুপ্রতিষ্ঠিতঃ
149.24
অভেদ্যঃ সর্বশস্ত্রাণাং প্রভিন্ন ইব বারণঃ
জজ্ঞে দ্রোণবিনাশায় সত্যবাদী জিতেন্দ্রিয়ঃ
149.25
ধৃষ্টদ্যুম্নমহং মন্যে সহেদ্ভীষ্মস্য সায়কান্
বজ্রাশনিসমস্পর্শান্দীপ্তাস্যানুরগানিব
149.26
যমদূতসমান্বেগে নিপাতে পাবকোপমান্
রামেণাজৌ বিষহিতান্বজ্রনিষ্পেষদারুণান্
149.27
পুরুষং তং ন পশ্যামি যঃ সহেত মহাব্রতম্
ধৃষ্টদ্যুম্নমৃতে রাজন্নিতি মে ধীয়তে মতিঃ
149.28
ক্ষিপ্রহস্তশ্চিত্রয়োধী মতঃ সেনাপতির্মম
অভেদ্যকবচঃ শ্রীমান্মাতঙ্গ ইব যূথপঃ
149.29
ভীম উবাচ
বধার্থং যঃ সমুত্পন্নঃ শিখণ্ডী দ্রুপদাত্মজঃ
বদন্তি সিদ্ধা রাজেন্দ্র ঋষয়শ্চ সমাগতাঃ
149.30
যস্য সংগ্রামমধ্যেষু দিব্যমস্ত্রং বিকুর্বতঃ
রূপং দ্রক্ষ্যন্তি পুরুষা রামস্যেব মহাত্মনঃ
149.31
ন তং যুদ্ধেষু পশ্যামি যো বিভিন্দ্যাচ্ছিখণ্ডিনম্
শস্ত্রেণ সমরে রাজন্সংনদ্ধং স্যন্দনে স্থিতম্
149.32
দ্বৈরথে বিষহেন্নান্যো ভীষ্মং রাজন্মহাব্রতম্
শিখণ্ডিনমৃতে বীরং স মে সেনাপতির্মতঃ
149.33
যুধিষ্ঠির উবাচ
সর্বস্য জগতস্তাত সারাসারং বলাবলম্
সর্বং জানাতি ধর্মাত্মা গতমেষ্যচ্চ কেশবঃ
149.34
যমাহ কৃষ্ণো দাশার্হঃ সোঽস্তু নো বাহিনীপতিঃ
কৃতাস্ত্রো হ্যকৃতাস্ত্রো বা বৃদ্ধো বা যদি বা যুবা
149.35
এষ নো বিজয়ে মূলমেষ তাত বিপর্যয়ে
অত্র প্রাণাশ্চ রাজ্যং চ ভাবাভাবৌ সুখাসুখে
149.36
এষ ধাতা বিধাতা চ সিদ্ধিরত্র প্রতিষ্ঠিতা
যমাহ কৃষ্ণো দাশার্হঃ স নঃ সেনাপতিঃ ক্ষমঃ
ব্রবীতু বদতাং শ্রেষ্ঠো নিশা সমতিবর্ততে
149.37
ততঃ সেনাপতিং কৃত্বা কৃষ্ণস্য বশবর্তিনম্
রাত্রিশেষে ব্যতিক্রান্তে প্রয়াস্যামো রণাজিরম্
অধিবাসিতশস্ত্রাশ্চ কৃতকৌতুকমঙ্গলাঃ
149.38
বৈশংপায়ন উবাচ
তস্য তদ্বচনং শ্রুত্বা ধর্মরাজস্য ধীমতঃ
অব্রবীত্পুণ্ডরীকাক্ষো ধনংজয়মবেক্ষ্য হ
149.39
মমাপ্যেতে মহারাজ ভবদ্ভির্য উদাহৃতাঃ
নেতারস্তব সেনায়াঃ শূরা বিক্রান্তয়োধিনঃ
সর্ব এতে সমর্থা হি তব শত্রূন্প্রমর্দিতুম্
149.40
ইন্দ্রস্যাপি ভয়ং হ্যেতে জনয়েয়ুর্মহাহবে
কিং পুনর্ধার্তরাষ্ট্রাণাং লুব্ধানাং পাপচেতসাম্
149.41
ময়াপি হি মহাবাহো ত্বত্প্রিয়ার্থমরিংদম
কৃতো যত্নো মহাংস্তত্র শমঃ স্যাদিতি ভারত
ধর্মস্য গতমানৃণ্যং ন স্ম বাচ্যা বিবক্ষতাম্
149.42
কৃতার্থং মন্যতে বালঃ সোঽঽত্মানমবিচক্ষণঃ
ধার্তরাষ্ট্রো বলস্থং চ মন্যতেঽঽত্মানমাতুরঃ
149.43
যুজ্যতাং বাহিনী সাধু বধসাধ্যা হি তে মতাঃ
ন ধার্তরাষ্ট্রাঃ শক্ষ্যন্তি স্থাতুং দৃষ্ট্বা ধনংজয়ম্
149.44
ভীমসেনং চ সংক্রুদ্ধং যমৌ চাপি যমোপমৌ
যুয়ুধানদ্বিতীয়ং চ ধৃষ্টদ্যুম্নমমর্ষণম্
149.45
অভিমন্যুং দ্রৌপদেয়ান্বিরাটদ্রুপদাবপি
অক্ষৌহিণীপতীংশ্চান্যান্নরেন্দ্রান্দৃঢবিক্রমান্
149.46
সারবদ্বলমস্মাকং দুষ্প্রধর্ষং দুরাসদম্
ধার্তরাষ্ট্রবলং সংখ্যে বধিষ্যতি ন সংশয়ঃ
149.47
এবমুক্তে তু কৃষ্ণেন সংপ্রহৃষ্যন্নরোত্তমাঃ
তেষাং প্রহৃষ্টমনসাং নাদঃ সমভবন্মহান্
149.48
যোগ ইত্যথ সৈন্যানাং ত্বরতাং সংপ্রধাবতাম্
হয়বারণশব্দশ্চ নেমিঘোষশ্চ সর্বশঃ
শঙ্খদুন্দুভিনির্ঘোষস্তুমুলঃ সর্বতোঽভবৎ
149.49
প্রয়াস্যতাং পাণ্ডবানাং সসৈন্যানাং সমন্ততঃ
গঙ্গেব পূর্ণা দুর্ধর্ষা সমদৃশ্যত বাহিনী
149.50
অগ্রানীকে ভীমসেনো মাদ্রীপুত্রৌ চ দংশিতৌ
সৌভদ্রো দ্রৌপদেয়াশ্চ ধৃষ্টদ্যুম্নশ্চ পার্ষতঃ
প্রভদ্রকাশ্চ পাঞ্চালা ভীমসেনমুখা যয়ুঃ
149.51
ততঃ শব্দঃ সমভবত্সমুদ্রস্যেব পর্বণি
হৃষ্টানাং সংপ্রয়াতানাং ঘোষো দিবমিবাস্পৃশৎ
149.52
প্রহৃষ্টা দংশিতা যোধাঃ পরানীকবিদারণাঃ
তেষাং মধ্যে যয়ৌ রাজা কুন্তীপুত্রো যুধিষ্ঠিরঃ
149.53
শকটাপণবেশাশ্চ যানয়ুগ্যং চ সর্বশঃ
কোশয়ন্ত্রায়ুধং চৈব যে চ বৈদ্যাশ্চিকিত্সকাঃ
149.54
ফল্গু যচ্চ বলং কিংচিত্তথৈব কৃশদুর্বলম্
তত্সংগৃহ্য যয়ৌ রাজা যে চাপি পরিচারকাঃ
149.55
উপপ্লব্যে তু পাঞ্চালী দ্রৌপদী সত্যবাদিনী
সহ স্ত্রীভির্নিববৃতে দাসীদাসসমাবৃতা
149.56
কৃত্বা মূলপ্রতীকারান্গুল্মৈঃ স্থাবরজঙ্গমৈঃ
স্কন্ধাবারেণ মহতা প্রয়য়ুঃ পাণ্ডুনন্দনাঃ
149.57
দদতো গাং হিরণ্যং চ ব্রাহ্মণৈরভিসংবৃতাঃ
স্তূয়মানা যয়ূ রাজন্রথৈর্মণিবিভূষিতৈঃ
149.58
কেকয়া ধৃষ্টকেতুশ্চ পুত্রঃ কাশ্যস্য চাভিভূঃ
শ্রেণিমান্বসুদানশ্চ শিখণ্ডী চাপরাজিতঃ
149.59
হৃষ্টাস্তুষ্টাঃ কবচিনঃ সশস্ত্রাঃ সমলংকৃতাঃ
রাজানমন্বয়ুঃ সর্বে পরিবার্য যুধিষ্ঠিরম্
149.60
জঘনার্ধে বিরাটশ্চ যজ্ঞসেনশ্চ সোমকিঃ
সুধর্মা কুন্তিভোজশ্চ ধৃষ্টদ্যুম্নস্য চাত্মজাঃ
149.61
রথায়ুতানি চত্বারি হয়াঃ পঞ্চগুণাস্ততঃ
পত্তিসৈন্যং দশগুণং সাদিনাময়ুতানি ষট্
149.62
অনাধৃষ্টিশ্চেকিতানশ্চেদিরাজোঽথ সাত্যকিঃ
পরিবার্য যয়ুঃ সর্বে বাসুদেবধনংজয়ৌ
149.63
আসাদ্য তু কুরুক্ষেত্রং ব্যূঢানীকাঃ প্রহারিণঃ
পাণ্ডবাঃ সমদৃশ্যন্ত নর্দন্তো বৃষভা ইব
149.64
তেঽবগাহ্য কুরুক্ষেত্রং শঙ্খান্দধ্মুররিংদমাঃ
তথৈব দধ্মতুঃ শঙ্খৌ বাসুদেবধনংজয়ৌ
149.65
পাঞ্চজন্যস্য নির্ঘোষং বিস্ফূর্জিতমিবাশনেঃ
নিশম্য সর্বসৈন্যানি সমহৃষ্যন্ত সর্বশঃ
149.66
শঙ্খদুন্দুভিসংসৃষ্টঃ সিংহনাদস্তরস্বিনাম্
পৃথিবীং চান্তরিক্ষং চ সাগরাংশ্চান্বনাদয়ৎ
149.67
ততো দেশে সমে স্নিগ্ধে প্রভূতয়বসেন্ধনে
নিবেশয়ামাস তদা সেনাং রাজা যুধিষ্ঠিরঃ
149.68
পরিহৃত্য শ্মশানানি দেবতায়তনানি চ
আশ্রমাংশ্চ মহর্ষীণাং তীর্থান্যায়তনানি চ
149.69
মধুরানূষরে দেশে শিবে পুণ্যে মহীপতিঃ
নিবেশং কারয়ামাস কুন্তীপুত্রো যুধিষ্ঠিরঃ
149.70
ততশ্চ পুনরুত্থায় সুখী বিশ্রান্তবাহনঃ
প্রয়য়ৌ পৃথিবীপালৈর্বৃতঃ শতসহস্রশঃ
149.71
বিদ্রাব্য শতশো গুল্মান্ধার্তরাষ্ট্রস্য সৈনিকান্
পর্যক্রামত্সমন্তাচ্চ পার্থেন সহ কেশবঃ
149.72
শিবিরং মাপয়ামাস ধৃষ্টদ্যুম্নশ্চ পার্ষতঃ
সাত্যকিশ্চ রথোদারো যুয়ুধানঃ প্রতাপবান্
149.73
আসাদ্য সরিতং পুণ্যাং কুরুক্ষেত্রে হিরণ্বতীম্
সূপতীর্থাং শুচিজলাং শর্করাপঙ্কবর্জিতাম্
149.74
খানয়ামাস পরিখাং কেশবস্তত্র ভারত
গুপ্ত্যর্থমপি চাদিশ্য বলং তত্র ন্যবেশয়ৎ
149.75
বিধির্যঃ শিবিরস্যাসীত্পাণ্ডবানাং মহাত্মনাম্
তদ্বিধানি নরেন্দ্রাণাং কারয়ামাস কেশবঃ
149.76
প্রভূতজলকাষ্ঠানি দুরাধর্ষতরাণি চ
ভক্ষ্যভোজ্যোপপন্নানি শতশোঽথ সহস্রশঃ
149.77
শিবিরাণি মহার্হাণি রাজ্ঞাং তত্র পৃথক্পৃথক্
বিমানানীব রাজেন্দ্র নিবিষ্টানি মহীতলে
149.78
তত্রাসঞ্শিল্পিনঃ প্রাজ্ঞাঃ শতশো দত্তবেতনাঃ
সর্বোপকরণৈর্যুক্তা বৈদ্যাশ্চ সুবিশারদাঃ
149.79
জ্যাধনুর্বর্মশস্ত্রাণাং তথৈব মধুসর্পিষোঃ
সসর্জরসপাংসূনাং রাশয়ঃ পর্বতোপমাঃ
149.80
বহূদকং সুয়বসং তুষাঙ্গারসমন্বিতম্
শিবিরে শিবিরে রাজা সংচকার যুধিষ্ঠিরঃ
149.81
মহায়ন্ত্রাণি নারাচাস্তোমরর্ষ্টিপরশ্বধাঃ
ধনূংষি কবচাদীনি হৃদ্যভূবন্নৃণাং তদা
149.82
গজাঃ কঙ্কটসংনাহা লোহবর্মোত্তরচ্ছদাঃ
অদৃশ্যংস্তত্র গির্যাভাঃ সহস্রশতয়োধিনঃ
149.83
নিবিষ্টান্পাণ্ডবাংস্তত্র জ্ঞাত্বা মিত্রাণি ভারত
অভিসস্রুর্যথোদ্দেশং সবলাঃ সহবাহনাঃ
149.84
চরিতব্রহ্মচর্যাস্তে সোমপা ভূরিদক্ষিণাঃ
জয়ায় পাণ্ডুপুত্রাণাং সমাজগ্মুর্মহীক্ষিতঃ