Utshovঅধ্যায় 150
150.1
জনমেজয় উবাচ
যুধিষ্ঠিরং সহানীকমুপয়ান্তং যুয়ুত্সয়া
সংনিবিষ্টং কুরুক্ষেত্রে বাসুদেবেন পালিতম্
150.2
বিরাটদ্রুপদাভ্যাং চ সপুত্রাভ্যাং সমন্বিতম্
কেকয়ৈর্বৃষ্ণিভিশ্চৈব পার্থিবৈঃ শতশো বৃতম্
150.3
মহেন্দ্রমিব চাদিত্যৈরভিগুপ্তং মহারথৈঃ
শ্রুত্বা দুর্যোধনো রাজা কিং কার্যং প্রত্যপদ্যত
150.4
এতদিচ্ছাম্যহং শ্রোতুং বিস্তরেণ তপোধন
সংভ্রমে তুমুলে তস্মিন্যদাসীত্কুরুজাঙ্গলে
150.5
ব্যথয়েয়ুর্হি দেবানাং সেনামপি সমাগমে
পাণ্ডবা বাসুদেবশ্চ বিরাটদ্রুপদৌ তথা
150.6
ধৃষ্টদ্যুম্নশ্চ পাঞ্চাল্যঃ শিখণ্ডী চ মহারথঃ
যুয়ুধানশ্চ বিক্রান্তো দেবৈরপি দুরাসদঃ
150.7
এতদিচ্ছাম্যহং শ্রোতুং বিস্তরেণ তপোধন
কুরূণাং পাণ্ডবানাং চ যদ্যদাসীদ্বিচেষ্টিতম্
150.8
বৈশংপায়ন উবাচ
প্রতিয়াতে তু দাশার্হে রাজা দুর্যোধনস্তদা
কর্ণং দুঃশাসনং চৈব শকুনিং চাব্রবীদিদম্
150.9
অকৃতেনৈব কার্যেণ গতঃ পার্থানধোক্ষজঃ
স এনান্মন্যুনাবিষ্টো ধ্রুবং বক্ষ্যত্যসংশয়ম্
150.10
ইষ্টো হি বাসুদেবস্য পাণ্ডবৈর্মম বিগ্রহঃ
ভীমসেনার্জুনৌ চৈব দাশার্হস্য মতে স্থিতৌ
150.11
অজাতশত্রুরপ্যদ্য ভীমার্জুনবশানুগঃ
নিকৃতশ্চ ময়া পূর্বং সহ সর্বৈঃ সহোদরৈঃ
150.12
বিরাটদ্রুপদৌ চৈব কৃতবৈরৌ ময়া সহ
তৌ চ সেনাপ্রণেতারৌ বাসুদেববশানুগৌ
150.13
ভবিতা বিগ্রহঃ সোঽয়ং তুমুলো লোমহর্ষণঃ
তস্মাত্সাংগ্রামিকং সর্বং কারয়ধ্বমতন্দ্রিতাঃ
150.14
শিবিরাণি কুরুক্ষেত্রে ক্রিয়ন্তাং বসুধাধিপাঃ
সুপর্যাপ্তাবকাশানি দুরাদেয়ানি শত্রুভিঃ
150.15
আসন্নজলকাষ্ঠানি শতশোঽথ সহস্রশঃ
অচ্ছেদ্যাহারমার্গাণি রত্নোচ্চয়চিতানি চ
বিবিধায়ুধপূর্ণানি পতাকাধ্বজবন্তি চ
150.16
সমাশ্চ তেষাং পন্থানঃ ক্রিয়ন্তাং নগরাদ্বহিঃ
প্রয়াণং ঘুষ্যতামদ্য শ্বোভূত ইতি মাচিরম্
150.17
তে তথেতি প্রতিজ্ঞায় শ্বোভূতে চক্রিরে তথা
হৃষ্টরূপা মহাত্মানো বিনাশায় মহীক্ষিতাম্
150.18
ততস্তে পার্থিবাঃ সর্বে তচ্ছ্রুত্বা রাজশাসনম্
আসনেভ্যো মহার্হেভ্য উদতিষ্ঠন্নমর্ষিতাঃ
150.19
বাহূন্পরিঘসংকাশান্সংস্পৃশন্তঃ শনৈঃ শনৈঃ
কাঞ্চনাঙ্গদদীপ্তাংশ্চ চন্দনাগরুভূষিতান্
150.20
উষ্ণীষাণি নিয়চ্ছন্তঃ পুণ্ডরীকনিভৈঃ করৈঃ
অন্তরীয়োত্তরীয়াণি ভূষণানি চ সর্বশঃ
150.21
তে রথান্রথিনঃ শ্রেষ্ঠা হয়াংশ্চ হয়কোবিদাঃ
সজ্জয়ন্তি স্ম নাগাংশ্চ নাগশিক্ষাসু নিষ্ঠিতাঃ
150.22
অথ বর্মাণি চিত্রাণি কাঞ্চনানি বহূনি চ
বিবিধানি চ শস্ত্রাণি চক্রুঃ সজ্জানি সর্বশঃ
150.23
পদাতয়শ্চ পুরুষাঃ শস্ত্রাণি বিবিধানি চ
উপজহ্রুঃ শরীরেষু হেমচিত্রাণ্যনেকশঃ
150.24
তদুত্সব ইবোদগ্রং সংপ্রহৃষ্টনরাবৃতম্
নগরং ধার্তরাষ্ট্রস্য ভারতাসীত্সমাকুলম্
150.25
জনৌঘসলিলাবর্তো রথনাগাশ্বমীনবান্
শঙ্খদুন্দুভিনির্ঘোষঃ কোশসংচয়রত্নবান্
150.26
চিত্রাভরণবর্মোর্মিঃ শস্ত্রনির্মলফেনবান্
প্রাসাদমালাদ্রিবৃতো রথ্যাপণমহাহ্রদঃ
150.27
যোধচন্দ্রোদয়োদ্ভূতঃ কুরুরাজমহার্ণবঃ
অদৃশ্যত তদা রাজংশ্চন্দ্রোদয় ইবার্ণবঃ