Utshovঅধ্যায় 151
151.1
বৈশংপায়ন উবাচ
বাসুদেবস্য তদ্বাক্যমনুস্মৃত্য যুধিষ্ঠিরঃ
পুনঃ পপ্রচ্ছ বার্ষ্ণেয়ং কথং মন্দোঽব্রবীদিদম্
151.2
অস্মিন্নভ্যাগতে কালে কিং চ নঃ ক্ষমমচ্যুত
কথং চ বর্তমানা বৈ স্বধর্মান্ন চ্যবেমহি
151.3
দুর্যোধনস্য কর্ণস্য শকুনেঃ সৌবলস্য চ
বাসুদেব মতজ্ঞোঽসি মম সভ্রাতৃকস্য চ
151.4
বিদুরস্যাপি তে বাক্যং শ্রুতং ভীষ্মস্য চোভয়োঃ
কুন্ত্যাশ্চ বিপুলপ্রজ্ঞ প্রজ্ঞা কার্ত্স্ন্যেন তে শ্রুতা
151.5
সর্বমেতদতিক্রম্য বিচার্য চ পুনঃ পুনঃ
যন্নঃ ক্ষমং মহাবাহো তদ্ব্রবীহ্যবিচারয়ন্
151.6
শ্রুত্বৈতদ্ধর্মরাজস্য ধর্মার্থসহিতং বচঃ
মেঘদুন্দুভিনির্ঘোষঃ কৃষ্ণো বচনমব্রবীৎ
151.7
উক্তবানস্মি যদ্বাক্যং ধর্মার্থসহিতং হিতম্
ন তু তন্নিকৃতিপ্রজ্ঞে কৌরব্যে প্রতিতিষ্ঠতি
151.8
ন চ ভীষ্মস্য দুর্মেধাঃ শৃণোতি বিদুরস্য বা
মম বা ভাষিতং কিংচিত্সর্বমেবাতিবর্ততে
151.9
ন স কাময়তে ধর্মং ন স কাময়তে যশঃ
জিতং স মন্যতে সর্বং দুরাত্মা কর্ণমাশ্রিতঃ
151.10
বন্ধমাজ্ঞাপয়ামাস মম চাপি সুয়োধনঃ
ন চ তং লব্ধবান্কামং দুরাত্মা শাসনাতিগঃ
151.11
ন চ ভীষ্মো ন চ দ্রোণো যুক্তং তত্রাহতুর্বচঃ
সর্বে তমনুবর্তন্তে ঋতে বিদুরমচ্যুত
151.12
শকুনিঃ সৌবলশ্চৈব কর্ণদুঃশাসনাবপি
ত্বয্যয়ুক্তান্যভাষন্ত মূঢা মূঢমমর্ষণম্
151.13
কিং চ তেন ময়োক্তেন যান্যভাষন্ত কৌরবাঃ
সংক্ষেপেণ দুরাত্মাসৌ ন যুক্তং ত্বয়ি বর্ততে
151.14
ন পার্থিবেষু সর্বেষু য ইমে তব সৈনিকাঃ
যত্পাপং যন্ন কল্যাণং সর্বং তস্মিন্প্রতিষ্ঠিতম্
151.15
ন চাপি বয়মত্যর্থং পরিত্যাগেন কর্হিচিৎ
কৌরবৈঃ শমমিচ্ছামস্তত্র যুদ্ধমনন্তরম্
151.16
তচ্ছ্রুত্বা পার্থিবাঃ সর্বে বাসুদেবস্য ভাষিতম্
অব্রুবন্তো মুখং রাজ্ঞঃ সমুদৈক্ষন্ত ভারত
151.17
যুধিষ্ঠিরস্ত্বভিপ্রায়মুপলভ্য মহীক্ষিতাম্
যোগমাজ্ঞাপয়ামাস ভীমার্জুনয়মৈঃ সহ
151.18
ততঃ কিলকিলাভূতমনীকং পাণ্ডবস্য হ
আজ্ঞাপিতে তদা যোগে সমহৃষ্যন্ত সৈনিকাঃ
151.19
অবধ্যানাং বধং পশ্যন্ধর্মরাজো যুধিষ্ঠিরঃ
নিষ্টনন্ভীমসেনং চ বিজয়ং চেদমব্রবীৎ
151.20
যদর্থং বনবাসশ্চ প্রাপ্তং দুঃখং চ যন্ময়া
সোঽয়মস্মানুপৈত্যেব পরোঽনর্থঃ প্রয়ত্নতঃ
151.21
যস্মিন্যত্নঃ কৃতোঽস্মাভিঃ স নো হীনঃ প্রয়ত্নতঃ
অকৃতে তু প্রয়ত্নেঽস্মানুপাবৃত্তঃ কলির্মহান্
151.22
কথং হ্যবধ্যৈঃ সংগ্রামঃ কার্যঃ সহ ভবিষ্যতি
কথং হত্বা গুরূন্বৃদ্ধান্বিজয়ো নো ভবিষ্যতি
151.23
তচ্ছ্রুত্বা ধর্মরাজস্য সব্যসাচী পরংতপঃ
যদুক্তং বাসুদেবেন শ্রাবয়ামাস তদ্বচঃ
151.24
উক্তবান্দেবকীপুত্রঃ কুন্ত্যাশ্চ বিদুরস্য চ
বচনং তত্ত্বয়া রাজন্নিখিলেনাবধারিতম্
151.25
ন চ তৌ বক্ষ্যতোঽধর্মমিতি মে নৈষ্ঠিকী মতিঃ
ন চাপি যুক্তং কৌন্তেয় নিবর্তিতুময়ুধ্যতঃ
151.26
তচ্ছ্রুত্বা বাসুদেবোঽপি সব্যসাচিবচস্তদা
স্ময়মানোঽব্রবীত্পার্থমেবমেতদিতি ব্রুবন্
151.27
ততস্তে ধৃতসংকল্পা যুদ্ধায় সহসৈনিকাঃ
পাণ্ডবেয়া মহারাজ তাং রাত্রিং সুখমাবসন্