Utshovঅধ্যায় 152
152.1
বৈশংপায়ন উবাচ
ব্যুষিতায়াং রজন্যাং তু রাজা দুর্যোধনস্ততঃ
ব্যভজত্তান্যনীকানি দশ চৈকং চ ভারত
152.2
নরহস্তিরথাশ্বানাং সারং মধ্যং চ ফল্গু চ
সর্বেষ্বেতেষ্বনীকেষু সংদিদেশ মহীপতিঃ
152.3
সানুকর্ষাঃ সতূণীরাঃ সবরূথাঃ সতোমরাঃ
সোপাসঙ্গাঃ সশক্তীকাঃ সনিষঙ্গাঃ সপোথিকাঃ
152.4
সধ্বজাঃ সপতাকাশ্চ সশরাসনতোমরাঃ
রজ্জুভিশ্চ বিচিত্রাভিঃ সপাশাঃ সপরিস্তরাঃ
152.5
সকচগ্রহবিক্ষেপাঃ সতৈলগুডবালুকাঃ
সাশীবিষঘটাঃ সর্বে সসর্জরসপাংসবঃ
152.6
সঘণ্টাফলকাঃ সর্বে বাসীবৃক্ষাদনান্বিতাঃ
ব্যাঘ্রচর্মপরীবারা বৃতাশ্চ দ্বীপিচর্মভিঃ
152.7
সবস্তয়ঃ সশৃঙ্গাশ্চ সপ্রাসবিবিধায়ুধাঃ
সকুঠারাঃ সকুদ্দালাঃ সতৈলক্ষৌমসর্পিষঃ
152.8
চিত্রানীকাঃ সুবপুষো জ্বলিতা ইব পাবকাঃ
তথা কবচিনঃ শূরাঃ শস্ত্রেষু কৃতনিশ্রমাঃ
152.9
কুলীনা হয়য়োনিজ্ঞাঃ সারথ্যে বিনিবেশিতাঃ
বদ্ধারিষ্টা বদ্ধকক্ষ্যা বদ্ধধ্বজপতাকিনঃ
152.10
চতুর্যুজো রথাঃ সর্বে সর্বে শস্ত্রসমায়ুতাঃ
সংহৃষ্টবাহনাঃ সর্বে সর্বে শতশরাসনাঃ
152.11
ধুর্যয়োর্হয়য়োরেকস্তথান্যৌ পার্ষ্ণিসারথী
তৌ চাপি রথিনাং শ্রেষ্ঠৌ রথী চ হয়বিত্তথা
152.12
নগরাণীব গুপ্তানি দুরাদেয়ানি শত্রুভিঃ
আসন্রথসহস্রাণি হেমমালীনি সর্বশঃ
152.13
যথা রথাস্তথা নাগা বদ্ধকক্ষ্যাঃ স্বলংকৃতাঃ
বভূবুঃ সপ্ত পুরুষা রত্নবন্ত ইবাদ্রয়ঃ
152.14
দ্বাবঙ্কুশধরৌ তেষু দ্বাবুত্তমধনুর্ধরৌ
দ্বৌ বরাসিধরৌ রাজন্নেকঃ শক্তিপতাকধৃক্
152.15
গজৈর্মত্তৈঃ সমাকীর্ণং সবর্মায়ুধকোশকৈঃ
তদ্বভূব বলং রাজন্কৌরব্যস্য সহস্রশঃ
152.16
বিচিত্রকবচামুক্তৈঃ সপতাকৈঃ স্বলংকৃতৈঃ
সাদিভিশ্চোপসংপন্না আসন্নয়ুতশো হয়াঃ
152.17
সুসংগ্রাহাঃ সুসংতোষা হেমভাণ্ডপরিচ্ছদাঃ
অনেকশতসাহস্রাস্তে চ সাদিবশে স্থিতাঃ
152.18
নানারূপবিকারাশ্চ নানাকবচশস্ত্রিণঃ
পদাতিনো নরাস্তত্র বভূবুর্হেমমালিনঃ
152.19
রথস্যাসন্দশ গজা গজস্য দশ বাজিনঃ
নরা দশ হয়স্যাসন্পাদরক্ষাঃ সমন্ততঃ
152.20
রথস্য নাগাঃ পঞ্চাশন্নাগস্যাসঞ্শতং হয়াঃ
হয়স্য পুরুষাঃ সপ্ত ভিন্নসংধানকারিণঃ
152.21
সেনা পঞ্চশতং নাগা রথাস্তাবন্ত এব চ
দশসেনা চ পৃতনা পৃতনা দশবাহিনী
152.22
বাহিনী পৃতনা সেনা ধ্বজিনী সাদিনী চমূঃ
অক্ষৌহিণীতি পর্যায়ৈর্নিরুক্তাথ বরূথিনী
এবং ব্যূঢান্যনীকানি কৌরবেয়েণ ধীমতা
152.23
অক্ষৌহিণ্যো দশৈকা চ সংখ্যাতাঃ সপ্ত চৈব হ
অক্ষৌহিণ্যস্তু সপ্তৈব পাণ্ডবানামভূদ্বলম্
অক্ষৌহিণ্যো দশৈকা চ কৌরবাণামভূদ্বলম্
152.24
নরাণাং পঞ্চপঞ্চাশদেষা পত্তির্বিধীয়তে
সেনামুখং চ তিস্রস্তা গুল্ম ইত্যভিসংজ্ঞিতঃ
152.25
দশ গুল্মা গণস্ত্বাসীদ্গণাস্ত্বয়ুতশোঽভবন্
দুর্যোধনস্য সেনাসু যোত্স্যমানাঃ প্রহারিণঃ
152.26
তত্র দুর্যোধনো রাজা শূরান্বুদ্ধিমতো নরান্
প্রসমীক্ষ্য মহাবাহুশ্চক্রে সেনাপতীংস্তদা
152.27
পৃথগক্ষৌহিণীনাং চ প্রণেতৄন্নরসত্তমান্
বিধিপূর্বং সমানীয় পার্থিবানভ্যষেচয়ৎ
152.28
কৃপং দ্রোণং চ শল্যং চ সৈন্ধবং চ মহারথম্
সুদক্ষিণং চ কাম্বোজং কৃতবর্মাণমেব চ
152.29
দ্রোণপুত্রং চ কর্ণং চ ভূরিশ্রবসমেব চ
শকুনিং সৌবলং চৈব বাহ্লীকং চ মহারথম্
152.30
দিবসে দিবসে তেষাং প্রতিবেলং চ ভারত
চক্রে স বিবিধাঃ সংজ্ঞাঃ প্রত্যক্ষং চ পুনঃ পুনঃ
152.31
তথা বিনিয়তাঃ সর্বে যে চ তেষাং পদানুগাঃ
বভূবুঃ সৈনিকা রাজন্রাজ্ঞঃ প্রিয়চিকীর্ষবঃ