Utshovঅধ্যায় 153
153.1
বৈশংপায়ন উবাচ
ততঃ শাংতনবং ভীষ্মং প্রাঞ্জলির্ধৃতরাষ্ট্রজঃ
সহ সর্বৈর্মহীপালৈরিদং বচনমব্রবীৎ
153.2
ঋতে সেনাপ্রণেতারং পৃতনা সুমহত্যপি
দীর্যতে যুদ্ধমাসাদ্য পিপীলিকপুটং যথা
153.3
ন হি জাতু দ্বয়োর্বুদ্ধিঃ সমা ভবতি কর্হিচিৎ
শৌর্যং চ নাম নেতৄণাং স্পর্ধতে চ পরস্পরম্
153.4
শ্রূয়তে চ মহাপ্রাজ্ঞ হৈহয়ানমিতৌজসঃ
অভ্যয়ুর্ব্রাহ্মণাঃ সর্বে সমুচ্ছ্রিতকুশধ্বজাঃ
153.5
তানন্বয়ুস্তদা বৈশ্যাঃ শূদ্রাশ্চৈব পিতামহ
একতস্তু ত্রয়ো বর্ণা একতঃ ক্ষত্রিয়র্ষভাঃ
153.6
তে স্ম যুদ্ধেষ্বভজ্যন্ত ত্রয়ো বর্ণাঃ পুনঃ পুনঃ
ক্ষত্রিয়াস্তু জয়ন্ত্যেব বহুলং চৈকতো বলম্
153.7
ততস্তে ক্ষত্রিয়ানেব পপ্রচ্ছুর্দ্বিজসত্তমাঃ
তেভ্যঃ শশংসুর্ধর্মজ্ঞা যাথাতথ্যং পিতামহ
153.8
বয়মেকস্য শৃণুমো মহাবুদ্ধিমতো রণে
ভবন্তস্তু পৃথক্সর্বে স্ববুদ্ধিবশবর্তিনঃ
153.9
ততস্তে ব্রাহ্মণাশ্চক্রুরেকং সেনাপতিং দ্বিজম্
নয়েষু কুশলং শূরমজয়ন্ক্ষত্রিয়াংস্ততঃ
153.10
এবং যে কুশলং শূরং হিতে স্থিতমকল্মষম্
সেনাপতিং প্রকুর্বন্তি তে জয়ন্তি রণে রিপূন্
153.11
ভবানুশনসা তুল্যো হিতৈষী চ সদা মম
অসংহার্যঃ স্থিতো ধর্মে স নঃ সেনাপতির্ভব
153.12
রশ্মীবতামিবাদিত্যো বীরুধামিব চন্দ্রমাঃ
কুবের ইব যক্ষাণাং মরুতামিব বাসবঃ
153.13
পর্বতানাং যথা মেরুঃ সুপর্ণঃ পততামিব
কুমার ইব ভূতানাং বসূনামিব হব্যবাট্
153.14
ভবতা হি বয়ং গুপ্তাঃ শক্রেণেব দিবৌকসঃ
অনাধৃষ্যা ভবিষ্যামস্ত্রিদশানামপি ধ্রুবম্
153.15
প্রয়াতু নো ভবানগ্রে দেবানামিব পাবকিঃ
বয়ং ত্বামনুয়াস্যামঃ সৌরভেয়া ইবর্ষভম্
153.16
ভীষ্ম উবাচ
এবমেতন্মহাবাহো যথা বদসি ভারত
যথৈব হি ভবন্তো মে তথৈব মম পাণ্ডবাঃ
153.17
অপি চৈব ময়া শ্রেয়ো বাচ্যং তেষাং নরাধিপ
যোদ্ধব্যং তু তবার্থায় যথা স সময়ঃ কৃতঃ
153.18
ন তু পশ্যামি যোদ্ধারমাত্মনঃ সদৃশং ভুবি
ঋতে তস্মান্নরব্যাঘ্রাত্কুন্তীপুত্রাদ্ধনংজয়াৎ
153.19
স হি বেদ মহাবাহুর্দিব্যান্যস্ত্রাণি সর্বশঃ
ন তু মাং বিবৃতো যুদ্ধে জাতু যুধ্যেত পাণ্ডবঃ
153.20
অহং স চ ক্ষণেনৈব নির্মনুষ্যমিদং জগৎ
কুর্যাং শস্ত্রবলেনৈব সসুরাসুররাক্ষসম্
153.21
ন ত্বেবোত্সাদনীয়া মে পাণ্ডোঃ পুত্রা নরাধিপ
তস্মাদ্যোধান্হনিষ্যামি প্রয়োগেণায়ুতং সদা
153.22
এবমেষাং করিষ্যামি নিধনং কুরুনন্দন
ন চেত্তে মাং হনিষ্যন্তি পূর্বমেব সমাগমে
153.23
সেনাপতিস্ত্বহং রাজন্সময়েনাপরেণ তে
ভবিষ্যামি যথাকামং তন্মে শ্রোতুমিহার্হসি
153.24
কর্ণো বা যুধ্যতাং পূর্বমহং বা পৃথিবীপতে
স্পর্ধতে হি সদাত্যর্থং সূতপুত্রো ময়া রণে
153.25
কর্ণ উবাচ
নাহং জীবতি গাঙ্গেয়ে যোত্স্যে রাজন্কথংচন
হতে ভীষ্মে তু যোত্স্যামি সহ গাণ্ডীবধন্বনা
153.26
বৈশংপায়ন উবাচ
ততঃ সেনাপতিং চক্রে বিধিবদ্ভূরিদক্ষিণম্
ধৃতরাষ্ট্রাত্মজো ভীষ্মং সোঽভিষিক্তো ব্যরোচত
153.27
ততো ভেরীশ্চ শঙ্খাংশ্চ শতশশ্চৈব পুষ্করান্
বাদয়ামাসুরব্যগ্রাঃ পুরুষা রাজশাসনাৎ
153.28
সিংহনাদাশ্চ বিবিধা বাহনানাং চ নিস্বনাঃ
প্রাদুরাসন্ননভ্রে চ বর্ষং রুধিরকর্দমম্
153.29
নির্ঘাতাঃ পৃথিবীকম্পা গজবৃংহিতনিস্বনাঃ
আসংশ্চ সর্বয়োধানাং পাতয়ন্তো মনাংস্যুত
153.30
বাচশ্চাপ্যশরীরিণ্যো দিবশ্চোল্কাঃ প্রপেদিরে
শিবাশ্চ ভয়বেদিন্যো নেদুর্দীপ্তস্বরা ভৃশম্
153.31
সেনাপত্যে যদা রাজা গাঙ্গেয়মভিষিক্তবান্
তদৈতান্যুগ্ররূপাণি অভবঞ্শতশো নৃপ
153.32
ততঃ সেনাপতিং কৃত্বা ভীষ্মং পরবলার্দনম্
বাচয়িত্বা দ্বিজশ্রেষ্ঠান্নিষ্কৈর্গোভিশ্চ ভূরিশঃ
153.33
বর্ধমানো জয়াশীর্ভির্নির্যয়ৌ সৈনিকৈর্বৃতঃ
আপগেয়ং পুরস্কৃত্য ভ্রাতৃভিঃ সহিতস্তদা
স্কন্ধাবারেণ মহতা কুরুক্ষেত্রং জগাম হ
153.34
পরিক্রম্য কুরুক্ষেত্রং কর্ণেন সহ কৌরবঃ
শিবিরং মাপয়ামাস সমে দেশে নরাধিপঃ
153.35
মধুরানূষরে দেশে প্রভূতয়বসেন্ধনে
যথৈব হাস্তিনপুরং তদ্বচ্ছিবিরমাবভৌ